Aposol 7:14-46

¹⁴Motong la Yosep iwanga pang tamana Yakop yo iyepe Kenan i, be ikap di rimana le di natunu, inbe di tooltool ki kapala yo iye di tiyepe nga le imot a tidu pang Isip. Ngan di tooltool tina le imot yo tiye Yakop tidu nga, ngan kinkatingi kidi ben 75.

¹⁵Ngan Yakop idu iyepe Isip le le imata, inbe di sasa kiidi tina, ngan di lapau timmata nango.

¹⁶Bong bobodi tina ngan tisolo a timulu lo titar di tilo tiken ye agoro ke matenge yo iken ye malala mai Sekem i. Ngan agoro tani, in iken ye tana yo Apram iyimi koot ye Amor di natunu ke Sekem nga.

¹⁷“Motong la ye lal tani yo Maro itaru be ole ipamulu di sasa kiidi ye i, in potai be ole kanono pombe ben tina yo muku ngan ipamede betanga medana pang Apram ye nga, ngan di rara kiidi tina yo tiyepe Isip nga, ngan tipasui a tiwurere le kinkatingi kidi ngan alunu san.

¹⁸Bong tool kuto mai san yo ikaua Pero nene a matan kala Isip i, in lon galanga ye Yosep pitiap yege.

¹⁹Ngan tool kuto mai tani in ikaua lungunu ye di sasa kiidi tina, inbe iyei urata moonoo masngana pang di. Ya in iwete betanga medana pang di Isrel nen, be di rimadi tipasui di kakase yo tamoto nga, ngan tiyei borrenge ye di be, bong tikatte di tidu ke diki a be nen ngan timmata.

²⁰“Ngan ye kene tani in Mose tinana ipasuiu, ngan le kase tani in matana dook mata san, le nga tiyei borrenge ye a iyepe rumu ke tamana ye taudu tol.

²¹Ngan taudu tol tina ngan imot, le nga tikaua Mose tani in du titaru ke diki. Motong la tool kuto mai tani in natunu garup ipuske, le ikauu a iyei borrenge ye dawa ben ya taunu natunu moolmool nga.

²²Le Mose tani in tipatomonaii le ikaua lo galanga dook mata ye dada le momo kidi Isip nga le imot. Inbe tikamata ye urata ki yo iyei nga, inbe ye betanga ki yo iwetewete nga, ngan gurana san le tipayiti dook.

²³“Mose iyepe a lo rai ki sangaul pai, le nga lon kaua urata be ole la matan so di diene kapala yo ke Isrel nga.

²⁴Ila, ngan ikamata tool ke Isip atu in iraua Mose di diene tina ke Isrel ngan atu le igarungu. Le nga Mose ilono ene ke Isrel tani, a be ikaua ene tani in kootoonoo, ngan le iraumata tool ke Isip tani le imata.

²⁵Ngan Mose iyeisa di diene Isrel tina ngan ole lodi galanga nen, be ya in la Maro ole iwanga be man ilon di i, bong ngan di Isrel tina ngan lodi galanga ye tiap.

²⁶Ngan iyepe le bongbongini ki, ngan ipa a ila mulu, ngan ikamata di tooltool ru ke Isrel di tapdi tipatoko. Motong la ila be la ilele di, le nga iyei ne, ‘Ai, angru nga taimim le toomim sa, e nga yelei a angru kakapye be kagarungang ang tapmim nga?’

²⁷“Bong ngan tool yo ipamaditi patokongo a iraua ene san i, in isurpaka Mose pang diki, inbe iwete panga nen, ‘Ong i, sei itarong be kuyei kuto mai pam a kukarata betanga kiam i?

²⁸Nga yelei, be kuraumatau lapau a amata dawa ben tool atu ke Isip yo rono ngan kuraumate i, too?’

²⁹Yeisa be Mose ilongo betanga nen, ngan iman tina le iyege di, inbe ikoo welewele a ila le la iyepe ye tana kidi Midien. Ngan la iyepe nango le ikere le rimana ipasui di natunu tamoto ru.

³⁰“Mose iyepe nango le rai sangaul pai iman a ila. Motong la bangabangana ke Maro atu pombe pang ye, ye tana sorrakene atu potai pang ye kawal Sinai. Ngan bangabangana ke Maro tani in iyepe ye ei loloana yo ikan ye kai lalana mai tiap atu i.

³¹Ngan Mose ikamata ei tani nen nga, le nga itakrai, inbe ipa le ila potai a be nen ngan la ikamata dook. Ngan ipa a ila potai, inbe se ilongo Tool Mai kalngana yo iwete panga nga. Iyei ne,

³²‘Au i Maro ke di sasa kiong. Au i Maro ke Apram ye Esaka ye Yakop.’ Ngan Mose tani in ilongo betanga nen nga, le nga itattadai a itangarur le lono be matan la mulu pang ye ni tani in tiap.

³³“Motong la Tool Mai iwete panga nen, ‘Nga ole kudur loningi ke kem ngan du tana, yesoo tana yo kukodo ye i, in tana mison ke Maro.

³⁴Au i akamata urata moonoo masngana yo di Isip tiyei pang di tooltool kiau, ngan oo. Inbe alongo tangini kidi, ngan la nookoot nga asi be si akap di a apamulu di ye di Isip baedi nga. Le kumadit a kuman, nga be awangong a kula pang Isip.’

³⁵“Ngan muku ngan di Isrel tina tiwala muridi pang Mose, inbe tiyei ne, ‘Ong i, sei itarong be kuyei kuto mai pam a kukarata betanga kiam i?’ Bong ngan Mose tani, in ya la Maro iwanga ben tool kuto mai, inbe tool yo be la ikap di Isrel tina a ipamulu di i. Moolmool, Maro ya taunu ikap gurana panga ye bangabangana ki in baene, ye kene yo pombe pang ye, ye ei loloana yo ikan ye kai lalana mai tiap atu i.

³⁶Motong la Mose ikap di Isrel tina a tiyege Isip a tila. Ngan tila le la iyei gogo mos matana matana a iyei ben tarkilanga panga ye tana mai Isip, inbe ye Tiek Kooroonoo, inbe ye kene yo tiyepe ni sorrakene ye rai sangaul pai ye i.

³⁷“Ngan Mose tani in la iwete pang di Isrel nen i. Iyei ne, ‘Maro kiang ole ipootoo tool kiang ang tapmim atu be iyei Maro koonoo pang dawa ben au i.’

³⁸Motong la di sasa kiidi tina ngan tila tiyepe ye ni sorrakene a tigaua nga, ngan Mose tani in iye di tiyepe lapau. Inbe ya in ilo kawal yo Sinai in kutono nga, ngan lo bangabangana ke Maro iwete panga ye betanga ke yepongo dook mata. Motong la ikap betanga tina ngan si ikap pang di sasa kiidi a be tikap paidi nga.

³⁹“Bong di sasa kiidi tina ngan Mose iwete pang di, ngan le lodi be tilongo betanga ki tiap, bong tiwala muridi panga, inbe lodi mulumulu ye yepongo kidi yo ke Isip nga.

⁴⁰Inbe tiwete pang Mose toonoo yo Aron in nen, ‘Ai, Mose yo ikau idi ke Isip a taman i, in am nga lomam galanga ye soo so yo pombe pang ye, in tiap. A be nen ngan ole kukarata di maro kiam yo be timuku pam inbe tiraram ye dada nga.’

⁴¹Di Isrel tina ngan tiwete pang Aron tani nen, le nga ye kene tani in tikarata tomonaia bulumakau natunu atu kanningana a iyei ben maro kidi, motong la tikap so ke paroranga man tiparoro panga, inbe tisiki a lodi ponana ye so yo di tapdi tikarata ye baedi i.

⁴²“Ngan nen le Maro iwala murini pang di be tiyepe nen, a nen ngan tisung pang ke le taudu le kanpitiki le so yo kapala nga. Ngan tiyei nen le itoo betanga tina yo tiwodo a iken ye rau ke di Maro koonoo nga. Ngan betanga tina ngan iwete nen, ‘Ang di Isrel, ye kene yo kayepe ye ni sorrakene ye rai sangaul pai nga, ngan karaumata di asara kiang yo edi bulumakau le sipsip a kayei paroranga ye di nga, ngan kayei paroranga ye sa pau, too? Tiap yege!

⁴³Ngan badabada ke sungunu yo kasola i, in badabada kiau tiap, bong ke maro kiang ke kaplungunu yo Molek i. Inbe kakarata tomonai so ben kanpitiki kanningana ke maro kiang yo ene Repan, in a kasola. Di maro kiang tina yo kakarata tomonai kanningadi nga, ngan la katu ye sungunu pang di nga. Ngan nen le ole angangang a kayege tana kiang ang tapmim i, inbe kakoo a kala le la kakapusu tana mai Babilon le la kayepe ye tana sa pang meneng anong ni.’

⁴⁴“Ye kene tani yo di sasa kiidi tina tiyepe tana sorrakene ye in nga, ngan badabada ke sungunu pang Maro in iken ye di. Ngan badabada ke sungunu tani, in tikarata dawa ben Maro iwete pang Mose, inbe itoo badabada tani in kanningana yo Maro ipatnaii panga i. Ngan le badabada ke sungunu tani, in ke be ipapos di ben di ngan Maro iyepe ye di.

⁴⁵Ngan rai kapala iman a ila, motong la di sasa kiidi tina ngan di natudi tisola a tiye Yesua tipa a tila pang ye tana mai Kenan. Ngan tila, motong la Maro inganga di tooltool tina yo tiyepe kala tana tani nga, inbe di sasa kiidi tina ngan la tiyepe ye. Motong la tipatokodo badabada ke sungunu tani in ye tana in, a iken nen le ise ye lal yo Dawiti iyei tool mai be matan kala tana kidi Isrel le imot ye i.

⁴⁶Ngan Dawiti in tool tani yo Maro iyeii dook mata i. Inbe ya in ipatarau pang Maro be imalum panga nga, ngan ole ire rumu sa dook mata pang Maro tani yo ke sasa kiidi Yakop i.