Aposol 7:14-39

¹⁴Anantera Josefe'a ke naneke atrenteno nefa Jekopunku ene ana miko tuzgarazga'agura nagritega eho huno hu'ne, ana mika'a 75fu'e.

¹⁵Hanki Jekopu'a Isipi umani'neno, anantega agrane tagehezanena fri'naze.

¹⁶Anantegatira zaferina'a eri'za Sekemu vazazamo'za, Abrahamuma zagoma atreno Hamori mofavre nagapinti'ma mago'a zagoreti'ma mizama asente'nea kerigampi Sekamu ome asente'naze. (Jen-Agf 50:13)

¹⁷Hu'neanagi, Anumzamo'ma, Abrahamuma huvempama hunte'nea knamo'a kofta huno eku nehigeno, Isipima tagri vahe'ma mani'naza vahe'mo'za tusi vahe krerfa fore hu'naze.

¹⁸Henka Josefema antahino keno osu'nea kini ne' Isipi fore huno kegva hu'ne.

¹⁹Ana kinimo'a vahetia rezmatga nehuno, tagehe'ina havi avu'ava hunezmanteno kasefa mofavrema ksentenazana megi'a zamatrenke'za friho huno huhanavetine. (Ekso-Uti 1:8–2:15)

²⁰Anama hianknafi Mosesena ksentegeno Anumzamofo avurera hentofa mofavre fore huteno, 3'a ikamofo agu'afina nefa nompi manitegeno,

²¹henka avare'za megi'a ometrageno, Fero mofamo'a avareno agri'a mofavregna huno kegva hu'ne.

²²Mosese'a Isipi vahe'mofo antahi'zana rempi huno maka eriteno, kema hu'zampine, avu'ava'zama'afina hankave nentake ne' fore huno mani'ne.

²³Hu'neanagi 40ti'a zagegafu huku'ma nehuno'a nafuhei, Israeli vahera nantu antezmante nagesahie huno antahi'ne.

²⁴Mosese nevuno keana Isipi ne'mo, Israeli kazokzo eri'za nera nehegeno negeno, Israeli ne'mofo ahoke heno Isipi nera ahe fri'ne.

²⁵Mosese'a antahiana agri vahe'mo'za antahi ama hu'za, nagripi huvazino Anumzamo'a huntegeno tagrira tahokeheno tavarenaku e'ne hu'za hugahaze huno antahine, hianagi zamagra Mosesena antahi omi'naze.

²⁶Umaseno nanterana Mosese'a nevuno keana, tare Israeli ne'tremoke ha' nehakeno, zanarimpa zanazeri fru hunaku, agra amu'noznifi vuno znazeri atrenaku nehuno anage hu'ne, Ama ve rarena, tanagra kogna mani'na'e. Nahigeta hara neha'e?

²⁷Magomo'ma haviza huno ahe frinaku nehimo'a, Mosesena retufe kanti netreno anage hu'ne, aza kva mani'nenka tagrira refako hurantegahane?

²⁸Kagra okima Isipi ne'ma hae fri'nananankna hunka nagrira nahe frinaku nehampi? (Ekso-Uti 2:14)

²⁹Ana kema hia Mosese'a nentahino, Isipia atreno viazamo, Midieni mopare anantega rurega vahe umani'ne. Mosese'ma Midienima umani'neno'a, tare ne'mofavre kseznante'ne.

³⁰Foti'a zgegfuma agateregeno mago ankeromo hagage kokampi Sainai agonamofo agiafi osi zafafi teve srasra huno nerefi fore humi'ne.

³¹Mosese'ma anazama negeno'a, naza fore nehieha nehuno kenakuma etvaoma higeno'a, Ra Anumzamo keza tino,

³²Nagra kagri kagehei Anumzane, Abrahamuma Aisakima Jekopu Anumzane, huno higeno, Mosesena, tusi ahirahitegeno avuge'zankura tusi agogogu nehuno uravao osu'ne.

³³Higeno Anumzamo'a Mosesena anage huno asami'ne, Kagia nona, kagaretira zafitro, na'ankure e'ima otinana mopa, Ruotge hu'nea mopare oti'nane.

³⁴Vahe'nima Isipima manine'za knama e'neriza zana tamage hu'na Nagra ke'noe, zamata hozama zamizage'za krafa kema nehazana Nagra nentahina zamaza hunaku menina erami'noe. Menina kagra eno, hugantesugenka, etenka Isipi vugahane.

³⁵E'ima ana Mosesima zamesra hunente'za, anagema hu'za, Iza kagrira kva mani'nenka vahera refko huo huno huntenemofo, e'i ana nera Anumzamo'a hunteno, kva ne' mani'nenka, zamazahu ne' manio huno Anumzamofo ankeromofo azampi osi zafafinti efore huno hunte'ne,

³⁶Ana ne'mo zamavreno nevuno Isipi mopare ene koranke hagerinte'ene ka'ma hagege mopafina kaguvazane avame'zana 40ti'a zgegfufina huzmeri hu'ne.

³⁷Ama ana Mosese, Israeli vahe'zgagura huno, Anumzamo'a kasnampa vahe'tmia tmagri'pintira nagrima hiaza huno azeri otigahie.

³⁸E'i ana ne'mo, vahe kevumokizmi amu'nompima ka'ma mopafi mani'negeno ankeromo Sainae agonafima tagri tagehemokizmi, Anumzamo kea huntegeno asimu erino mani naneke erino'ma eme tmi'nea nere.

³⁹Tagri tagehe'za ke'a antahizanku zamefi hunemi'za, retufeganti netre'za, zamagu'afina Isipigura tusi zamagesa antahi'naze.