Aposol 7:1-6

¹Ngan tool kuto mai ke paroranga so pang Maro i, in itoro Tepan nen, “Ai, ngan betanga yo kulongo tipariu ong ye nga, ngan moolmool, too tiap?”

²Motong la Tepan iraua betanga ki nen, “Ang di took le di taik le di tamak nga, kapalongo a awete pang ngan. Kene yo sasa kiidi Apram in iyepe ye tana ke Mesopotemia le nga idik pang malala mai Aran tiao nga, ngan le Maro yo gurana ki mai mata i, in ipa ke malala ki a isi pang ye.

³Ngan le Maro si iwete panga nen, ‘Kumadit a kuyege tana kiong i le ipa ye di rara kiong si tiyepe, inbe kupa a kula ye tana atu yo be apatnaii pong i.’

⁴“Motong la Apram iyege tana kidi Kaldia, inbe ipa le la iyepe Aran. Ngan ila iyepe nango le tamana imata, motong la Maro iwanga mulu be ipa le iman iyepe ye tana yo nookoot ngan kayepe ye i.

⁵Ye kene tani in Maro ikap touo tana tani i gigini pa, too ipoto kasin pa a ikap pang Apram, ngan tiap. Bong Maro ipamede betanga medana panga nen, be pang dama ni nga, ngan ole ikaua tana i panga iye di sasa ki yo be pang dama ni ngan pompombe lapau nga, ngan le iken so. Ngan ye kene yo Maro iwete pang Apram nen ye in nga, ngan taukan natunu go.

⁶Ngan Maro iwete pang Apram nen, ‘Ole di sasa kiong tina, ngan tila a la tiyepe sokorai ye tana mai san yo tana kidi tapdi tiap i. Inbe di tooltool ke tana mai tani in ole tigarung di a tikap masngana pang di, inbe tiyei di a tiyei urata ben di poranga kidi nga ye rai 400.