Aposol 5:20-41

²⁰Motong la iwete pang di nen, “Kalo lo kakodo koongoo lono ke bareme mai ke sungunu ni, inbe kawetewete pang di tooltool ye dada yo be tikaua yepongo paunu ye i.”

²¹Di aposol tina, ngan tilongo betanga nen, le nga muntu yege inbe tilo bareme mai ke sungunu lono lo timadit ye patomonaingi di tooltool. Ye kene tani in tool kuto mai ke paroranga so pang Maro, in iye di diene man pombe, motong la tikiu di tooltool kuto maimai kidi Yuda yo matadi kala momo le yepongo kidi nga, ngan tise a se tigaua. Motong la tiwanga di bianga be du tikap di aposol ke Yesu tina a tise.

²²Le nga di bianga tina ngan tidu be du tikap di a tise, bong tidu pombe ngan tikamata di tiap. Motong la timulu a lo tiwete pang di kuto maimai tina ngan nen,

²³“Ai, dada ke rumu dook tiap ni titiukala, inbe tipamede le imede san. Inbe di tooltool yo tikodo a matadi kala dada nga, ngan amdu ngan tikododo. Bong kene yo be amso dada ye in nga, ngan amkamata touo tooltool siap.”

²⁴Ngan tool kuto mai yo matan kala di bianga yo tikodo kala bareme mai ke sungunu i, in iye di tooltool maimai ke paroranga so pang Maro tilongo betanga nen, le nga lodi gurrungu ye, inbe tiyei ne, “Ona tiap! Di tooltool nga tilledi belei na?”

²⁵Motong la tool atu se iwete pang di kuto maimai tina nen, “Kakamata! Di tooltool tina yo katar di lo rumu dook tiap kidi talnga dikidiki lono nga, ngan di nango lo tikododo koongoo lono ke bareme mai ke sungunu a tipatomonai di tooltool ngo.”

²⁶Motong la tool kuto mai tani yo matan kala di bianga i, in iye di bianga tilo alo tikap di aposol tina ngan dook mata a tisi. Bong tiyeie so sa pang di tiap, yesoo titattadai di tooltool be ole tikatmatamata di ye pat nga.

²⁷Le nga di bianga tikap di aposol tina a tilo le lo tipatokodo di dama kidi tooltool kuto maimai kidi Yuda yo matadi kala momo le yepongo kidi nga. Motong la tool kuto mai ke paroranga so pang Maro in itor di nen,

²⁸“Ai! Kalongo, ang nga amwete betanga pam, inbe amkodokalang be kin kapatomonai di tooltool mulu ye tool tani in ene be. Bong ngan tiap, kasak koomam, inbe kasudungu patomonaingi di tooltool. Le di tooltool le imot yo tiyepe Yerusalem nga, ngan tilongo betanga kiang oo. Inbe kasuku betanga pam a kawete be am la amraumata tool tani in a imata nga.”

²⁹Motong la Pita iye di diene aposol tiraua betanga ke tool kuto mai tani in nen, “Am nga be amtoo betanga ke Maro leu, bong be amtoo betanga ke di tooltool tiap.

³⁰Ngan Yesu yo kapatota lo kai palasingi kaini a imata i, in Maro kidi sasa kiidi la ipamaditi a imadit mulu ye ni ke matenge i.

³¹Le Maro ikauu a ilo le lo itaru a iwur ye baene oonoo, inbe iyei tool mai be matan kalidi tooltool nga le imot, inbe iyei tool yo be ipamulidi ye so dook tiap yo be igarungidi i. Ngan Maro iyei nen, a be nen ngan idi tooltool ke Isrel taportak lodo ye dada dook tiap kiidi yo tayei nga, ngan ole igiri noonoo kiidi.

³²Ngan nanga, so tina yo Maro iyei a amkamata nga, ngan la amwetewete pang di tooltool ye nga. Inbe Maro Amunu Silene la iwetewete ye so tina ngan lapau i. Ngan Maro ikaua Amunu Silene tani in pang di tooltool yo tilongo betanga ki a titoo, ngan oo.”

³³Di kuto maimai tina ngan tilongo Pita yo iwete nen nga, le tina katedi malmal le dook tiap yege, inbe lodi be le tiraumatamata di aposol tina a timmata.

³⁴Bong ngan di Paresi tina ngan atu yo ene Gamaliel i, in iyepe lapau. Ya in pannoongoo ke ger ke Maro, inbe di tooltool le imot tipayiti ye urata ki lapau. Ngan Gamaliel tani, in imadit le lo ikodo kataunu kidi tooltool kuto maimai tina, inbe iwete be tikap di aposol tina ngan a tidu tana du tinam kasin ngan.

³⁵Ngan tikap di a tidu tana, motong la Gamaliel tani in iwete pang di kuto maimai kapala nen, “Ai, ang tooltool ke Isrel nga, ngan lomim be kayeie so sa pang di tooltool ngo nga, ngan dook mata, bong ole lomim kaua urata dook ngan.

³⁶Ngan lomim galanga ye tool yo ene Tiodas i. Ye rai kapala yo ila koot nga, ngan Tiodas tani in imadit tina le iwete be ya in tool mai inbe ene mai lapau. Ngan nen le di tooltool yo titoo nga, ngan kinkatingi kidi ben 400. Bong yeisa be di tooltool tiraumata Tiodas a imata, ngan le di tooltool tina yo titoo nga, ngan timagirigiri le urata ki tani yo ipamaditi i, in ikino.

³⁷Le mooloo tiap, inbe ye lal yo ke be tiwodo di tooltool edi lo ye rau mai i, in pombe, ngan tool ke Galili atu yo ene Yuta i, in koon paweserai di tooltool kapala be titoo a iye di tiraua tool kuto mai yo iyei mata koro in a ikoo. Bong yeisa be tiraumata Yuta tani in, ngan le di tooltool ki yo titoo nga, ngan timagirigiri a tikoo lapau.

³⁸Ngan nanga, nookoot nga be awete pang nen, kin kayeie so sa pang di tooltool ngo be. Bong kawulai baemim ye di a tila, inbe takamata di. Kumata be dada le urata kidi yo tiyei ngo, ngan be pombe ye di tapdi lodi leu nga, ngan ole urata kidi taukan kanono.

³⁹Bong kumata be Maro ya taunu la ikap urata ngo pang be tiyei nga, ngan o ke be kalele di tiap. Be nen ngan ole kakamata ben nga kakapye be kaye Maro kapatoko.” Ngan betanga ke Gamaliel tina ngan iso di kuto maimai lodi,

⁴⁰le nga tikiu di aposol tina a tise. Motong la tiwete pang di bianga a tisalit di ye koro leu. Inbe tiwete tootoo pang di be kin tiwetewete betanga nen mulu pang di tooltool ye Yesu ene be, inbe tiwulai di a tila.

⁴¹Le nga di aposol tiyege di kuto maimai tina a tidu tana, ngan le lodi ponana kaiye, yesoo Maro ikamata di ngan ipayit di ben di la ke be tisolo moonoo, inbe moomoodi ye Yesu ene nga.