Aposol 2:5-33

⁵Ma Jerusalem kamonai na Jiu damsi i dobu bogii ma bogiiyai ma peyarisi na God ivovokaravei.

⁶Ma ti na nani gugurina ivi yanei na koroto ghamana iriyei. Ma ivi deyei da Pita turaturana yavata gamo bogii ma bogiiyai ivivi sisiya ma nani kamonai Jiu damsi sago sago duma ti mani gamosi ivivi yanei.

⁷Inota kavakavai da ivona bo, “Ede! Weni wawayisi gamo bogii ma bogiiyai isisiya, kudubisi na Gariri damsi.

⁸Ikikava da tota dam bogii ma bogiiyai ma gamotiyai isisiya?

⁹Ita dobu na Patiya, Midiya, Elam, Mesopotemiya, Judiya, Kapadosiya, Pontas ma Eisiya,

¹⁰Pirigiya, Pampiriya, Egypt ma Libiya, tuna na Sairini dobuna ririnai. Ma bade tota viya na Rome damta,

¹¹kamotiyai viya na Jiu vaghata, ma bade viya na kupuna damta ita vitumaghana tavirai da tavi Jiu. Ma bade viya na Kriti ma Arebiya damta. Peyarita tiyanesi da tota mani gamotiyai God ina bera ghamaghamasi isisiyei.”

¹²Jiu damsi ivi deyei ma inota kavakavai da ivona bo, “Weni tuna na bera avai?”

¹³Ma viya nani korotona kamonai vitumaghana damsi ivivi namesi, ivona bo, “Nani wawayisi na iuma neghanegha makai.”

¹⁴Pita ma aposol turaturana ivi 11 ivomiiri ma Pita koroto kurisi irumamara. Ivonesi bo, “Aku wawaya, Jiu dami ma Jerusalem makamakiimi. Weni berana iyamna ani debei kurimi. Kovi yana boga!

¹⁵Ke kona notai da weni damsi ituma neghenegheyana. Madegha karakava ina ghe paka, ma peyarita takovi da okowa rewapanisi na ke boiboiyai katumai.

¹⁶Kegha, mara katamaninai peroveta Joel ivona da weni matakirina ghamana ita tupuwa.

¹⁷Igiruma da God ivona bo, ‘Mara ina riyariyatawei na Kanumiku ana vonatawei inoru wawaya kudubisi kurisi. Natunatumi tomotomowa ma wivine ini peroveta da sisiya gwabikuwai ina viiya ma ini debei. Ana berai da ami yaraga bera mekeyusi ina kita, ma ami dobodoboro ini matu.

¹⁸E! Nani marasiyai Kanumiku ana vonatawei inoru aku bigabiga tomotomowisi ma wivinesi kurisi da aku bera gavugavusi ini debei.

¹⁹Bera ghamaghamasi kunumai ani beyebeyemi da koni deyei. Ma matakira dobuwai ana terei. Tara, keyama karakaratina ma bau ghamana kona kitai.

²⁰Madegha ini nubakutuvi ma nawaravi kana kita ina virei da taratarana. Weni berasi ina tupuwa ma murinai na Bada ina mara ghamanakina ma notakavakavana ina nekiibau.

²¹Ma meni wawayisi Bada kurina ini kwatu na ini yawasisi.’”

²²Ma Pita ina sisiya ikwapanatini bo, “Israel dami, aku sisiya kovi yanei! Yesu, tuna na Nasaret tomowa, bera ghamaghamasi ma matakira notakavakavasi gwabimiyai iberai da matamiyai kokitai. Tuna kubiine namada koakovi da tuna God ivonatawei kurimi.

²³Ma God ina nota kudubina namada ivorereghi ikovi da aviyavisina ita tupuwa Yesu kurina. Ma muriyai tami Yesu koviini da wawaya kawakiikiisi kurisi ma ivi vitemi da ku korosi kotuparatui da kovi raboboi.

²⁴Ma kegha da rabobo ke kovokovoghina da Yesu ita vokikini, iyamna God rabobowai ivi yawasi da ina inivisi na kudubina itatawei.

²⁵Kiivavo David, Yesu ivi sisiyei, ivona bo, ‘Akovi da Bada na gwabikuwai, Tuna katagheyakuwai kubiine na ke ana yabumana.

²⁶Tuna kubiine nuwanuwaku ibiibii kirakai ma kawakuwai avovokavakavara. Namanaki tupuwiku imitamita, nuwanuwaku nubanai Bada aitumaghanei,

²⁷iyamna kanumiku ke kuna kuyowei da karawaga kamonai ina kena, ma am bigabiga vovokaravina tupuwina ke kuna voterei da ina bowa.

²⁸Tam yawasa makamakii nonowina kana keta kuvi beyeku. Tam gwabikuwai, tuna kubiine ani nuwabiibii kirakai.’”

²⁹Ma bade Pita ivonesi bo, “Varevaresiku, vonavaghata avonavonemi. Ita kaekiki David ke tuna mani iti sisiya meyei. Irabobo ma idogoi, kana karawaga na patana da gwabitiyai emakamakai.

³⁰David na peroveta, ma iakovi da God tuna mani avanai vonakiiyapa bagibagina iterei da tupurereghina sago kana gawara ina viiya da ini kiivavo.

³¹Bera karakava ita tupuwa na David iakovi, tuna kubiine namada ivi sisiyei da Keriso rabobowai ita vomiiri. Ivona bo, ‘God ina Vivinevine Wawayina ke ina kuyowei da karawaga kamonai ina kena, ma tupuwina ke ina voterei da ina bowa.’”

³²“Ma peyarikai Yesu kakitai ma kakovi da vonavaghata da God rabobowai ivi yawasi

³³ma iterepai da katagheyanai emakamakai. Ma ina Mamai God vonakiiyapa bagibagina iterei Yesu kurina da Kanuma Vovokaravina ita verei. Ma karako Yesu nani Kanumina ivonatawei ioru kurikai da iyamna na kokitakitai ma koiyanei.