Aposol 2:4-17

⁴Ngalau Yamar geb eisir avut be givin sawa etok ge Ngalau Yamar geb eisir avos ru be inei yaun giengk amolmol walang ok avos gitangi ge gile.

⁵Be givin etok amolmol Juda ane as amolmol mateu ane subu ebe imbweg itangi taku walang ok ge gile ok, iro is-ate sut isov Jerusalem ge be imbweg etok.

⁶Amolmol tepwengge iute gen bil-bilinge etok be tepwengge iro isate sut ile ipil dongke-ngge. Bekob iute ebe Yisu ane amolmol-gen inei yaun giengk eisir avos gitangi ge ok, be ikuri vunu-ngge.

⁷Be tas gitung gile ma be ilat bais be inei, “Nam-nambed ete ande eisir etenik inei yaun giengk eitit avond gitang-tangi ge nik? Ve etok eisir Galilaia ane ge bambamo etenik?

⁸Be wali nam-nambed ete ande eitit etenik tepwengge taute ebe eisir inei yaun giengk eitit avond be gile gitangi roro-ngge weik ebe eitit ate taute be tanei nangge tamand-gen tis tinand-gen avos ok?

⁹Ve etenik eitit amolmol avo ti ane ti ane nangge Patia be Midia be nangge Ilam tis Mesopotamia be Judia tis Kapadosia, be nangge Pontas be Esia.

¹⁰Be nangge Frisia tis Pampilia be Aigipten, be nangge Libia as taku ebe gibloblo Sairini ok, be tis eitit Rom ane ebe tanme tambweg etek ok.

¹¹Be eitit Juda be tis amolmol subu ebe ivang mul ve eitit Juda and luev ok be eitit Krit be tis Arabia ane bambamo ete taro it-ate sut tanme tambweg etek? Bemem ande eitit etenik tepwengge taute ebe eisir inei Pomate ane gen bwalbwale bambamo giengk eitit and yaun be gile gitangi roro-ngge.”

¹²Be tas gitung gile ma be inei, “Gen etenik wat tis ane lavo ti?”

¹³Bemem eisir nok as amolmol subu ilgum molok gile Yisu ane amolmol-gen be inei eisir inum bui vavis.

¹⁴Bwayage-kob Pita gimdil be givarkei givin aposel 11 ebok be gital yaun avo bamo gitangi amolmol tepwengge be ginei, “Eitit Juda be tis amolmol tepwengge ete galkik tanme tambweg Jerusalem nik unaute kob! Gen bamo etenik ane dabe dang eteik:

¹⁵Yem unei amei anum bui vavis beti gilgum dabangg-amei gwet be tiate, bemem dang-etenok ite. Vasov nik ge 9 kilok tistumi be gitangi ebe ve inum bui vavis ok ite nangge.

¹⁶Bemem gen etenik gitangi yaun ebe warik Joel amol ebe ginei Pomate avo ok ginei ok.

¹⁷Ve Pomate ginei; ‘Atob ayeu nalgum dang-eteik nindeb mul ane. Ayeu atob namb angg Ngalau Yamar nitangi amolmol tepwengge. Be yem natungg-aimgen tepwengge amol be avie, atob inei mateu avos weik amolmol ebe inei Pomate avo ok. Be aim amol gaptol singamolomb atob indi gen walang ano weik ebe mev ok, be atob nasu mev nitangi tumbungg-aimgen. Be atob ayeu namb Ngalau Yamar nitangi angg amolmol kulkul ane weik etok ge, avie be amol. Be atob eisir inei mateu avos weik amolmol ebe inei Pomate avo ok. Atob ayeu nalgum as-matano be menihlang weik tambok, be nalgum aiweng be niro mwele weik ebe twerk ok. Be nangge nalk atob ayeu nalgum gen bwalbwale bamo ti. Atob twerk tis yev be yev umkumk bamo nimungg, bekob atob Amol Bamo ane as-mate ebe ve ninumul ninme ok menihlang. Be ei ane as-mate etok atob tandi tanei as-mate bamo ti, be atob bogbogo weik ebe yev giro taku be bogbogo ok. Be nivin etok atob amolmol tepwengge ebe as tangir gitangi Pomate gile ok, ete atob Pomate nemb eisir ru.’”