Aposol 2:26-45

²⁶Tuna kubiine nuwanuwaku ibiibii kirakai ma kawakuwai avovokavakavara. Namanaki tupuwiku imitamita, nuwanuwaku nubanai Bada aitumaghanei,

²⁷iyamna kanumiku ke kuna kuyowei da karawaga kamonai ina kena, ma am bigabiga vovokaravina tupuwina ke kuna voterei da ina bowa.

²⁸Tam yawasa makamakii nonowina kana keta kuvi beyeku. Tam gwabikuwai, tuna kubiine ani nuwabiibii kirakai.’”

²⁹Ma bade Pita ivonesi bo, “Varevaresiku, vonavaghata avonavonemi. Ita kaekiki David ke tuna mani iti sisiya meyei. Irabobo ma idogoi, kana karawaga na patana da gwabitiyai emakamakai.

³⁰David na peroveta, ma iakovi da God tuna mani avanai vonakiiyapa bagibagina iterei da tupurereghina sago kana gawara ina viiya da ini kiivavo.

³¹Bera karakava ita tupuwa na David iakovi, tuna kubiine namada ivi sisiyei da Keriso rabobowai ita vomiiri. Ivona bo, ‘God ina Vivinevine Wawayina ke ina kuyowei da karawaga kamonai ina kena, ma tupuwina ke ina voterei da ina bowa.’”

³²“Ma peyarikai Yesu kakitai ma kakovi da vonavaghata da God rabobowai ivi yawasi

³³ma iterepai da katagheyanai emakamakai. Ma ina Mamai God vonakiiyapa bagibagina iterei Yesu kurina da Kanuma Vovokaravina ita verei. Ma karako Yesu nani Kanumina ivonatawei ioru kurikai da iyamna na kokitakitai ma koiyanei.

³⁴Kiivavo David na ke kunumai ita makamakai maranai ivona bo, ‘Bada God aku Bada ivonei bo, Katagheyakuwai kemakai,

³⁵ma kam ghavighaviya kudubina ku kae gaburim ana teresi.’”

³⁶“Tuna kubiine wawaya kudubimi Israel kamonai, kovi yana. Yesu ku korosi kotuparatui na God iberai da tuna Bada ma ina Vivinevine Wawayina.”

³⁷Nani korotona ghamana weni sisiyina ivi yanei na nuwanuwasi itonai da Pita ma aposol kurisi ivona bo, “Varevaresikai, aviyavisina kana berai?”

³⁸Ma Pita ivonapotesi bo, “Peyarimi, ami bera beroberosi kovi nuwapoyei ma komiirikupukuputei. Ma Yesu Keriso avanai kona babataito da God ami berabero ina notatawei ma Kanuma Vovokaravina ina veremi.

³⁹Weni vonakiiyapina bagibagina na iyavo kava ita Bada God ekwatukwatumi na peyarimi kubiimi, tami ma natunatumi kubiimi ma bade dobu rabaraba damsi kubiisi.”

⁴⁰Ma Pita sisiya rewapanisi itereterei ma ivivi nowi kirakai da ivonavona bo, “Kokitaruvimi! Weni kimtina kawakiikiisi kokiibutawesi, ti na isiwana da kovogha berona ina panani.”

⁴¹Vaghina ma, iyavo kava Pita ina sisiya ivivi tumaghanei na ibabataito. Nani maranai wawaya 3 tausan vitumaghana damsi ku kamosi irui.

⁴²Ma peyarisi nuwanuwasi kudubinai ivi nuwasago, aposol i vibeyebeyena ivivi yanei ma bade iniponipowana ma ikamkam patapata. Ma nani kamonai parawa ivovogimai.

⁴³Aposol na God ina rewapana gwabisiyai da matakira ma bera ghamaghamasi iberaberai da wawaya ikitakitai ma inotanota kavakavai.

⁴⁴Vitumaghana wawayisi kudubisi mara nonowa ivivi kiidaburana ma i sawara ku deba itereterei.

⁴⁵Ma viya i sawara bo kii tano ivivi gimara ma manena na turaturasi viya gwabisiyai kegha na ivovorereghisi.