Aposol 2:13-23

¹³Hianagi mago'amo'za anama haza zankura anage hu'za zamagi'za nereza, zamagra kahefa waini ti ne'za negi nenegahaze! Hu'za hu'naze.

¹⁴Hianagi Pita otino 11ni'a amage' nentaza naga'ane mani'neno, ranke huno zamasmino, tamagra Judia vahe'ene, miko Jerusale mani'namota ama huankea tamagesa anteta antahi ankereho.

¹⁵Amama kema nehaza zanku'ma tamagesa hakare nehazana, menina nantera 9 kiloki hu'neanki'za, zamagra negi tina one'naze.

¹⁶Hu'neanagi ama'i korapa kasnampa ne'mo, Joeli hu'nea nanekemofo avufa'a meni negaze.

¹⁷Hagi vagare knafina, Anumzamo'a anage hu'ne, Nagra Avamuni'a vahepi eri herafi atresugeno, tamagri ne'mofa tamimo, kasnampa kea huama nehina, kasefa vahe'mo'za ava'na keaza nehanageno, ranafa tamimo'za ava'na kegahaze.

¹⁸Nagri eri'za vahete'ene, vene'nere ene, a'nerera Nagra Avamu'ni'a ana knafina eri herafi atresugeno zamagra kasnampa kea hugahaze.

¹⁹Nagra monafina ruzahu'za eri fore nehu'na, kaguva avame'za ama mopafina erifore nehu'na, korane, tevene, hampone tokira hugahie.

²⁰Zgemo'a rukrahe huno hani hanigeno, ikamo'a kora hanigeno, henka tusi'a hanave'nentake Ramofo kna egahie.

²¹Ana nehanigeno miko vahe'mo'za, Ramofo agi hanta nevazisamo'za zamu'vazinke'za knare kuma erigahaze. (Jol 2:28-32)

²²Israeli vahe'motma ama kea antahiho, Nazareti ne' Jisasina, Anumzamo azeri oti'nea ne'mo, kaguva zane ruzahu'zane, avame'zana Anumzamo'a, Agripi runtanino amuno tamifina eri'zana erigeta, keta antahita hu'naze.

²³Ama ana nera, Anumzamo antahino ahegahaze huno korapa retro hu'nea kante antetma, tamagra avaretma megi'a vahe zamazampi antage'za, keka zafare hanto ahegeno fri'ne.