Aposol 27:35-41

³⁵Paulu tani in iwete pang di nen a imot, motong la ikap porong pattu, inbe imadit lo ikodo dama kidi, a iwete lo ponana ki pang Maro ye, motong la itepala porong tina a ikan.

³⁶Di tooltool tina ngan tikamata Paulu yo iyei nen nga, le nga ipamede di, motong la di le imot lodi dook mata a tikan so lapau nga.

³⁷Ngan am tooltool tina le imot yo amyepe ye ookoo tani in pono nga, ngan kinkatingi kiam ben 276.

³⁸Di tooltool tina ngan tikan so dook le kapodi sung, motong la tikatte dingding patunu ke kaningi, ngan idu tiek lono, a be nen ngan ookoo imarra, inbe sukbe pang ete.

³⁹Ye kene tani in sila amyepe le nga ke ise be se ipiti matana, ngan di tooltool ke ookoo tani ngan tikamata tana, bong tikilala ni tani in tiap. Bong tikamata launu atu yo ululu ki dook mata i. Le nga lodi tar be kumata le guradi nga, ngan ole tiyeie ookoo a ikooi le di isauloko ye ni tani in.

⁴⁰Motong la tisaput rre ye pat tina yo tikatte du iparama ookoo ngan le imot sila ikino tiek lono. Inbe tipolo rre yo tipau pie maimai ru yo ke kaungu pie ye ookoo nga, ngan lapau. Motong la tiyiti le yo iken ke ookoo damono i, in ilo ete, a nen ngan be muru itingi nga, ngan ookoo tani in ikooi a idi pang tana.

⁴¹Bong ngan ookoo ikooi a amdi nga, ngan le di isaurai le isauloko ye ululu yo iken tiek lono nga. Le nga ookoo tani in damono isaurai le imede le ke be ipulles tiap. Ngan nen le dugu maimai iraua kirini ke mur i, in le le perperbe le dook tiap.