Aposol 21:15-35

¹⁵Ana knama evutegeta trotra nehuta otita Jerusale vu'none.

¹⁶Mago'a Sisaria kumate nemniza disaipol nagamo'za tagrane ne-eza tavare'za Saiprasi ne' Masoni nompi vazageta, korapa amage nentea disaipol ne'mofo nompi umanigahune hu'nona ne'mofo nompi umani'none.

¹⁷Jerusale uhanatunke'za Anumzamofo naga'mo'za muse nehu'za tavatagi'za knare hutma aze hu'naze.

¹⁸Uvasonkeno ko'ma atigeno, Poli'a, Jemisine maka mono kva vahe'zgama (eldas) mani'naza ome zamagenaku tagrane vu'ne.

¹⁹Poli'a ome zamageno zamatagiteno, agra agafa huno mago' mago'zama Anumzamo'ma mono eri'za megi'a vahepima e'nerigeno hu'neazana zamasmi'ne.

²⁰Ama ana nanekema antahite'za, Anumzamofo agi erisaga hu'naze. Zamagra anage hu'za Polina asami'naze, kagra nerafuga antahio, nama'a tauseni'a Jiu vahe'mo'za zamentinti nehu'za, Mosese Kasege'ne amage' nentaza vahe'mo'zanena hampo'nati'za amage' nentaze.

²¹Mago'a vahe'mo'za anage hu'za kagrikura zamasmi'naze, kagra maka Jiu vahe'mo'za megi'a vahepi mani'nazana, Mosese Kasegemo'a taza osugahie hunka nehunka, mofavreramina zamufa taga huozmanteho nehunka, tagri tavu'tvamofo avu'ava osugahaze hunka hu'nananke antahi'none.

²²Tagra na'a hugahune? Kagrama kamama e'nana nanekema zamagra antahisu'za tamage hugahaze.

²³Ana hu'negu tagrama kasmisunaza huo. 4'a vene'nemo'za Anumzamofonte huvempa hu'za mani'naze.

²⁴Hanki zamavarenka kagrane magoka tamazeri agru nehutma, zamazoka'ma haresazazana miza sezmantegahane. E'ina hananke'za, maka vahe'mo'za antahi'za kema hazage'za kagriku'ma antahi'nazana tamage hu'naze hugahaze. Hu'neanagi kagraka'a kasegea amage antenka manigahane.

²⁵Hu'neanagi megi'a vahe'ma zamentinti nehaza vahetega, tagra avonkreta, havi anumzante kre sramna vuntesia zgagfane, korane anankema taga osu zgagfane onetma, monko'zana atreho huta tagesa antahiteta kre zami'none. (Apo 15:29)

²⁶Nanterana Poli'a zamareno agrane ana vahe'ma zamazeri agru huteno, ra mono nompi vuno, ana zupa mago mago'mofonte kre sramna vuno azeri agaruhu kna vgaregahie huno ome zamasmi'ne.

²⁷7ni'a kna vagare'za nehigeno, Esia provinsifinti Jiu vahe'mo'za ra mono nompi mani'nege'za nege'za, rama'a vahe zamarimpa zamazeri otige'za Polina azeneri'za,

²⁸anage hu'za ranke hu'naze, Israeli vahe'mote taza hiho! Ama ne'mo'a hakare kaziga mani'naza vahetamina rempi hunezmino, vahetine kasegetine, ra mono nontia ha' renente! Mago'enena agra Griki vahera zamareno ra mono nomofo agu'afi nevuno, ruotage hu'nea ra mono nona eri pehena nehie!

²⁹Zamagra negageno Efesasiti nera Trofimasi'a, Poli'ene Jerusalemi vano nehige'za negaza ne'ku, ra mono nomofo agu'afinka avreno marerinegahie hu'za zamagesa antahi'naze.

³⁰Maka vahe'mo'za eritru hu'za zamaga re'za e'za, Polina azeri'za avazu hu'za ra mono nomofo agu'afinti atimaneramizageno'a, ame hu'za ra mono nonkafana erigi'naze.

³¹Polima ahe friku'ma nehzageno, anampinti vahe'mo'za zamaga re'za vu'za, maka Jerusale vahe'mo'za ha' nehaze hu'za sondia vahete kva nehia nera ome asmi'naze.

³²Ana sondia kva ne'mo'a ame' huno sondia vahe'zga nezmareno, mago'a vahe'mokizmi kva vahe'zga (sensulien, hantretia sondia vahete kva nera) zamarege'za, zamaga re'za ana vahete e'naze. Polima ahenaku nehaza vahe'mo'za, sondia vahe'mokizmi kva ne'ene, sondia vahe'zgama nezamage'za, ohe'za atre'naze.

³³Anante sondia kva ne'mo'a Polina ome azeriteno, huzmantege'za tare seni nofinu anakintetageno, anante sondia kva ne'mo'a, zamantahige'ne, Agra aza'e, agra na'a hu'ne?

³⁴Hu'neanagi tusi'a vahe tamimpinti mago'amo'za ranke hu'za ra kefinti mago zanku kereso nehazageno, mago'amo'za ruge nehazageno, sondia kva ne'mo'a ke agafa'a keno eri fore osu'ne. Na'ankure rama'a vahe'mo'za kehakare nehazageno ontahino, Polina avareta sondia vahe kumapi viho hige'za avare'za vu'naze.

³⁵Agrama latare'ma ege'za, Polina sondia vahe'mo'za azerisga hu'za mareri'naze. Na'ankure rama'a vahe'mo'za ahenaku nehazageno'e.