Aposol 20:17-35

¹⁷Ngan Paulu idi pombe Miletus, motong la iwanga pang di kuto maimai kidi tooltool yo tigaua ye bareme ke Yesu a tiyepe Epeses nga, ngan be timan pang ye be man tiye tiwetewete ngan.

¹⁸Ngan tina nen nga, le di kuto maimai tina ngan timan pombe, motong la iwete pang di nen, “Ai, kulkulunu yege, ye kene yo apola pombe ye tana mai Esia ye in le se nookoot nga, ngan ang tapmim ngan lomim galanga ye dada kiau yo ayei pang ye ke tina le imot yo ayang tayepe ye, ngan oo.

¹⁹Le ang nga lomim galanga nen, ye ke alunu san la di Yuda tina tiraua betanga a be tigarungau ye nga. Ngan ye dada kidi yo tiyeii nen i, in le tikaua lo modoko inbe touanga mai pau le atang kaiye san. Bong ngan au tauk i atarau le adu lopo ni, inbe ayei urata tani ke Tool Mai i.

²⁰Inbe ang ngan lomim galanga lapau nen, au i awetewete pang ye betanga ke Maro nga, ngan atarkoo betanga dook mata moolmool yo be alonang ye ngan sa, nga tiap. Bong apatomonai ang mallangana ye ni ke gaongo, inbe ye rumu tina yo kiang atu atu nga, ngan lapau.

²¹Kanakana ngan awetewete betanga medana pang di Yuda le di Girik be tiportak lodi pang Maro ye dada dook tiap kidi yo tiyei nga, inbe di le imot be titara lodi medana pang Tool Mai kiidi yo Yesu i.

²²“Le kalongo. Maro Amunu Silene ila lok, inbe ya taunu ipasongosongau be nookoot nga adi a alo pang Yerusalem. Ngan au i lok galanga ye soo so yo be alo Yerusalem ngan pombe pang yau, in tiap.

²³Bong au i lok galanga nen, ye malala maimai tina le imot yo apa pang ye nga, ngan Maro Amunu Silene iwete pau nen, be rumu dook tiap kidi talnga dikidiki yo be di tooltool titarau a alo lono nga, inbe urata moonoo masngana yo be di tooltool tiyei pau nga, ngan alunu san la inamau a ikenen ngo.

²⁴Bong ngan au i ke be akamata yepongo kiau ben so dook mata pau, ngan tiap. Yesoo, au i lok mede be atoo dada yo apa ye koot i, a nen ayei poraia urata yo Tool Mai Yesu ikauu pau i, in le imot ngan. Ngan urata tani i, in ke be awetewete pang di tooltool ye bingi dook mata ke Maro yo be lono pang di a iyei dada dook mata pang di nga.

²⁵“Muku ngan ayang tayepe, inbe awetewete pang ye dada yo Maro be matan kala di tooltool ki ye i. Bong nookoot nga lok galanga nen, pang dama ni nga, ngan ang tina nga le imot ngan sa o ke be ikamata matak mulu tiap.

²⁶Ngan nen le nookoot nga be awete betanga galangana pang nen. Kumata le be ang tina ngan atu be ilene nga, ngan in au busunu kiau tiap,

²⁷yesoo au i awetewete pang nga, ngan atarkoo betanga sa yang ye dada le imot yo Maro lono be katoo, ngan tiap.

²⁸Le be nen nga, ngan kin ang tapmim kakawai yang dook leu, inbe kakawai ye di tooltool le imot yo tigaua ye bareme ke Maro nga. Di ngan di tooltool tina yo ya taunu iyimi di ye rara ke Natunu nga, ngan nen le tiyei ben di sipsip ki. Ngan nen le Maro Amunu Silene ipootang be kayei kuto maimai pang di, le matamim kala di sipsip ke Maro tina ngan dook.

²⁹Ngan au i lok galanga nen, ye kene yo be ayegang ye in nga, ngan ole di gaunu gok dook tiap la be timan a man tiyepe kataunu yang, a nen ngan man tigarung di sipsip tina nga.

³⁰Inbe ang tapmim lapau, di tooltool kiang kapala ole timadit a tikap lungunu yang, inbe tipalele betanga yo moolmool i, a be nen ngan di tooltool yo ke Maro nga, ngan titara lodi medana ye betanga kidi a la titoo di ben di galiudi.

³¹Le kin kakawai yang dook leu! Inbe lomim tut ye rai kerana tol yo ayang tayepe ye nga, ngan ye ke le bong tina yo kanakana nga, ngan au i matak surun du yang, ngan nen le amaryoo ye kaungu noonoongoo pang ang atu atu, ngan tiap.

³²“Ngan nen le nookoot nga, atarang la Maro baene, inbe lok be lomim tut betanga ke Maro ye dada dook mata yo be iyei pang nga. Ngan betanga ke Maro tina ngan la be ipamedang, inbe ikap so dook mata yo Maro lono be ikap pang di tooltool ki le imot yo ipootoo di panga ya taunu nga.

³³Ye kene yo ayang tayepe ye in nga, ngan au i matak gorengana ye pat gol le silba, too wam le so ke tool siap.

³⁴Ang tapmim nga lomim galanga yau ben ye au tauk baek ngan ayei urata ye so yo be ilonau ye yepongo kiau nga, inbe ayei urata ye so yo be alon di tooltool yo aye di amyepe, ngan lapau.

³⁵Inbe ye so tina le imot yo ayei nga, ngan be apatnaia dada pang nen; kumata le be idi nga tayei urata le gurada nga, ngan la be talon di tooltool yo ke be di tapdi tilon di tiap nga. Ngan nen le ole lod tut betanga ke Tool Mai Yesu yo ya taunu iwete nga. Ngan Yesu tani in iwete nen, ‘Lo ponana ke tool yo ikap so pang ene i, in ole illoso lo ponana ke tool yo ikap so i.’ ”