Aposol 20:1-28

¹Ana ke hakarema haza'zamo vgaregeno, Jisasi amage nentaza disaipol nagara Poli'a kehige'za emeritru hazageno, zamumro kea anteteno, hufru huno knareki manineho hunezmanteno, atreno Masedonia vu'ne.

²Ana mopa kazigama vano huno rama'a keretima zamentinti naga zamazeri hanavematiteno, Grisi ehanati'ne.

³Anantega 3'a ika maniteno, Siria kaziga ventefi vunaku'ma nehigeno, mago'a Jiu vahe'mo'za haenaku ke retro haza nanekema nentahino'a, eteno Masedonia mopafi kampi vunaku Poli'a agesa antahi'ne.

⁴Mago'a vahe'mo'za Poli'ene vu'nazana, Beria kumateti ne' Sopati, Perusi nemofoki, Tesalonikati Aristakusi'ene Sekanduskegi, Debe kumateti Gaiusiki, Esia kumateti Timotiki, Tikikusiki, Trofimasi'za vu'naze.

⁵Ama ana vene'nemo'za vugote'za Troasi ome tavega ante'naze.

⁶Zo'ore bretima Juda vahe'mota nenona kna'mofo amefiga'a hompama vagaregeta, Filipai kumara atreta ventefi mrerita 5fu'a zge ferupi nevuta, Troasi kumate tavega ante'nare uhnatita ana kumate mago sonta umani'none.

⁷Ana Sontamofo pusa kna're bretima kori'za (komonion) neku eritruma nehunkeno'a, Poli'a oki vugahue huno agesa nentahi'no keaga nezmasmino, mono kea huvava nehigeno kerage amu'no ase'ne.

⁸Anagamu kino mareri'nea nomofo hunaraginte pinka rama'a rampe tvira manenegeta atrua hu'none.

⁹Hagi mago nehaza nera agi'a Jutikasi'e, zaho kamofo atupare (windo) marerino mani'neno, Poli'ma keagama huvava huno nevigeno'a, antahirega avukoko higeno, mase himarenefinti, tagufa nonteti anagamuti asaga huramino ahe fri'ne.

¹⁰Hianagi Poli'a uramino agri agumpi umseno azana rugagino anu'nekino tmasunkura osiho hu'ne. Tamagra antria osiho, na'ankure agra ofri'neanki amne mani'ne huno hu'ne.

¹¹Nehuno Poli'a eteno anagamu marerino, bretima korige'za netageno, za'za kna zamagranena keaga nehigeno ko'atigeno zamatreno vu'ne.

¹²Ana nehazavea ofrino mani'nege'za muse nehu'za avare'za nontega vu'naze.

¹³Ananteti tagra ventefi umarerita Asosi vunaku nehuta, Polina avarenteta vunaku tagesa antahi'none, na'ankure ama kana agra'a azeri antefatgo huno, agra mopafi vugahue huno agesa antahi'ne.

¹⁴Asosima rutagiha higeta, agrira ventefi avarenentata, Miteleni ti amunompi me'nea ran kumate vunaku vuvava hu'none.

¹⁵Anantetira maseta mago knarera ventefi nevunkeno ko'atigeta, Kiosi tinkenare uhanatita, mago knarera Samosi uhanatita, hagi ana kna'mofo amefiga'a Mailitusi vu'none.

¹⁶Na'ankure Poli'a Efesasia agateregahue huno antahi'ne, na'ankure Esia za'za kna omani'na ko knare'ma hanuna Jerusale nagra mani'nesugeno hompa (pentikos) kna fore hugahie hu'ne.

¹⁷Mailatusi uhanatite'za, Poli'a ke atrezmanteno Efesasi mono nonte kva (elda) vahe'zga eme nageho hu'ne.

¹⁸Ke hige'za agrite ageno, amanage huno zamasmi'ne, Pusante'ma Esia mopare nagiama rentoa zupa, tamagripima maka zupa mani'na e'noana, tamagratmi ko ketma antahi'naze. Esia kaziga e'na tamagrane nemanugeta nagri agafa'a nage'naze.

¹⁹Jiu vahe'mo'za nazeri havizahu kema retro'ma haza zamo'a tusi'a knazamo nagri navufare ege'na anterami'na zavira nete'na, Ramofo erizana eri'noe.

²⁰Tamagri'ma tamaza hania kea, korera osu'na huama hu'na tamasmugetma antahi'naze. Vahe'pina neramasmi'na, nonte nontera tamasmugetma ko antahi'naze.

²¹Jiu vahe'ene Griki vahera hu'ama hu'na tamagu'a rukarehe hutma Anumzante ne-etma, Ranti Jisasinte tamentinti hiho hu'na zamasmi'noe.

²²Hagi menina Ruotge Avamu'mofo ke amage antena, nagra Jerusalemi nevue, nagri navufarera na'a fore hugahio, ontahi'noe.

²³Hankino Ruotge Avamu'mo nagrira nasamino, mika ranra kumapina, kina hu'zamo'ene kna'zamo'enena kavega ante'ne hu'ne.

²⁴Hu'neanagi navufagura nagesa nontahue, tusi'a zana eri'zani'a erivaga nere'na, Ra Jisasi'ma eri'zama namino vahe'ma zamasmio hu'nea eri'za eri'na Anumzamofo asunku zankura knare nanekea vahera zamasmigahue.

²⁵Hagi menina nagra antahi'noankitma, azago menima Anumzamofo kumakuma neramasmumota, mago'enena nagri navugosafina onke'tfa hugahaze.

²⁶E'ina hu'negu, meni nagra huama hu'na neramasmue, miko vahe'mofo koran kumimo'a nagritera ome'tfa hugahie.

²⁷Na'ankure Anumzamofo miko avesi'zama'a nagra korera osu'na hu'ama hu'na neramasmue.

²⁸Tamagratmia kegva nehutma, lama afu kevua kegva hiho, Ruotge Avamu'mo tamazeri antegetma kva hu'naze. Agrama magoke Mofavre ama huntegeno koranteti'ma mizama ase'nea Anumzamofo mono nagara zamazeri fatgo hutma kavagri zamantegahaze.