Aposol 1:5-26

⁵Na'ankure Joni'a tintfanu mono tina frezmante'ne, hianagi ama knaretira upa knafi, tamagra ruotge Avamuteti tina fregahaze.

⁶Aposol nagamo'za eritru hu'za magopi manite'za, agafa hu'za Jisasina antahige'naze. Ramoka amagna, Israeli vahe'mokizmi nomani'za zamazeri fatgo nehu'na, kva krizmantegahue hu'nana knafi?

⁷Agra anage huno zamasmi'ne, tamagri'zana omane'neakita tamasmi'sugeta ontahigahaze, nanknarero, nanknafino Nenfa'a agra hanave'afi, anankna huhamprinte'ne.

⁸Hu'neanagi ruotge Avamumo tamagrite esigetma, tusi'a hanave eritetma, Nagri nagenkea Jerusale kumate huama nehutma, Judiane Sameriane huama nehutma, afete mopa omeatre eme atre arega ome huama hugahaze.

⁹Ana naneke zamasmiteno, negageno hampompi ufrege'za onke'naze.

¹⁰Monafi kete'za mani'nageno, ame' huno efeke kukena hu'na'a ne'tremoke anante oti'ne'ne,

¹¹anage hu'na'e, Galili vahe'mote na'a higetma amarera oti'netma monafinka negaze? Ama ana Jisasi tmatreno monafi negageno mreri'neaza huno, ete anahu kna huno egahie, huke zamasmi'na'e.

¹²Anante mago agona Olivie nehaza agona atre'za Jerusale e'naze, e'i ana agona Jerusale tva'onte me'ne, kama vu'amo'a, mani fruhu kna zupa vute'za neaza avamente me'nea agone. (1 kilomita avamenteku hu'ne.)

¹³Zamagrama Jerusale ufrete'za, nemaniza nompi anagame umreri'za hunaragintepinka mani'naze. Pita ene Joniki, Jemisi ene Endruki, Filipi'ene Tomasiki, Bataromio ene Matiuki, Jemisi Alfiasi nemofo ene Saimon Zelaiotiki, Judasi nemofo Jemisiki hu'za anampi umani'naze.

¹⁴Maka ana naga'mo'za magoke antahintahifi maka'zupa nunamu nehu'za mago'a a'nene, Meri Jisasi nerera'zane, Jisasi nefu'za mani'naze.

¹⁵Ana knafina zamentinti nehaza nagapinti Pita'a 120ti'a naza naga amu'no zamifi otino anage hu'ne.

¹⁶Nafuhete, Ruotge Avamumo ko Deviti asmigeno avontafe krente'neana, Judasi zamareno vige'za ha' vahe'mo'za azeri'naze kemo'a avufa'a forehie.

¹⁷Tagrane mani'neno, agra ama mono eri'zana eri'ne.

¹⁸(Menina Judasi havi avu'ava'mo ana mopa miza se'ne, ana mopafi kanahegeno rimpamo tagatiramine.

¹⁹E'ina huno frige'za Jerusale kumate vahe'mo'za ana naneke nentahi'za ana mopagu Aramu kefi Hakaltemie hu'naze, zamagra kefina Korantmi'nea mope hu'naze.)

²⁰Anazanku Zgame avontafipina anage huno kre'ne, Atregeno mago'zana noma'afina omaneno, Anampina atregeno mago vahere huno omanino, (Sam-Zga 69:25), Atregeno mago vahe'mo agri nona erino, eri'zana erino huno avona krente'ne. (Sam-Zga 109:8)

²¹Ana hu'negu tagra mago ne azeri otisunkeno, Judasi nona erisie. Ana ne'mo'a tagrane maka knama, Ramo Jisasi'ma mani'nereti vuno,

²²Joni'ma mono tima fre ante'nea knareti eno, tagripinti avareno monafi vu'neaza ke'nenimo, fri'nefinti oti'neazana huama huno tagranena vano hugahie.

²³Ana hute'za tare ne'tre znazeri oti'naze, Josefenku Banabasi'e (nehaza ne'kino mago' agi'a Jastusi'e) magora Matiasi'e.

²⁴Ana hute'za nunamu hu'za, Ramoka kagra hakare vahe'mofo zamarimpa ke'nane. Hanki ama tare ne' trenpintira, inamofo huhampri antenampi taveriho.

²⁵Ama ana eri'za erinogura, kamagema'ante'nea aposol ne' Judasi eri'zana atreno kuma'arega vu'ne.

²⁶Anante mago'zokago (lots) Tais zokago reza kazageno, Matiasi huhampri'naza su'amo eama hige'za, Matiasi azeri otizageno, 1lni'a aposol nagapi ufre'ne.