Text copied!
CopyCompare
Rau Ke Maro - Aposol - Aposol 1

Aposol 1:4-26

Help us?
Click on verse(s) to share them!
4Ngan ye kene atu in iye di aposol ki tina ngan tigaua be tikan so, motong la iwete pang di nen, “Ai, kin kayege Yerusalem be. Bong kayepe nanga, inbe kanam ye so dook mata yo Tamak ipamede betanga medana ye be ole ikauu pang ye lo ponana ki i. Muku ngan awete pang ye be ole ikauu pang.
5Ngan nanga, Yowan in irriu di tooltool ye ran sokorai leu, bong ole mooloo tiap, inbe Maro irriu ang ye Amunu Silene.”
6Le nga ye kene atu in Yesu iye di aposol ki tigaua, inbe titoru nen, “Tool Mai, nga be amtorong. Nookoot nga ole kupamedam tooltool ke Isrel mulu a nen ngan tool kiam atu iyei tool kuto mai a matan kalam am le imot lapau, too tiap?”
7Motong la Yesu iraua betanga kidi nen, “Ai, i ang so kiang be lomim galanga ye ke le lal yo Tamak ya taunu itaru ye gurana ki, in tiap.
8Bong ye kene yo be Maro Amunu Silene isi yang le ipamedang ye gurana ki koot nga, ngan ole kakaua betanga kiau a la kaweta pang di tooltool ye so yo kakamata koot nga. Ngan ole kamadit ye betanga pang di tooltool nanga la Yerusalem nga, inbe ye malala nga le imot yo iken ye tana mai Yudia nga, inbe ye tana mai Samaria, inbe ipa so le la itaua ni yo tana i imot ye i.”
9Yesu iwete pang di nen a imot, motong la matadi kenen ye, inbe ilo pang ye malala ke Maro, ngan le eng tene iduku le ke be tikamata mulu tiap.
10Le nga di aposol ki tina matadi kenen pang lang katene go ye ni yo ipa ye a ilo i, inbe pattu leu be di tooltool ru pombe a tikodo potai pang ye di. Ngan di tooltool ru tina ngan sousoungu kidi kookoonoo.
11Motong la tiwete pang di aposol ke Yesu nen, “Ai, ang tooltool ke Galili nga, nga yelei a kakododo ni, inbe matamim lo pang lang katene nga? Yesu tani yo Maro ikauu le iyegang a ilo pang ye malala ki i, in ole imulu a isi dawa ben tina yo nookoot nga kakamata, inbe ilo pang ye malala ke Maro nga.”
12Motong la di aposol ke Yesu tina, ngan timadit a tiyege kawal Olip, inbe timulu a tilo pang Yerusalem. Ngan kawal Olip tani in iken manga mooloo ye malala mai Yerusalem tiap.
13Le nga ye kene yo tipa le lo pombe ye in nga, ngan tilo le lo tiyepe ye rumu sokalana ke ete yo be tiyepe ye i. Ngan di aposol tina ngan edi nen; Pita ye Yowan ye Yemis ye Antares ye Pilip ye Tomas ye Batolomiu ye Matiu ye Yemis san yo Alpias natunu i, inbe Simon yo tool ke sorringi di Rom ye tana kidi Yuda i, inbe Yuta san yo Yemis natunu i.
14Di ngan kanakana ngan tiye Madia yo Yesu tinana i, inbe di garup kapala tiye Yesu di taini, ngan di le imot man tigaua inbe tipatarau.
15Ye kene tani in di tooltool yo titara lodi medana pang Yesu koot nga, ngan kinkatingi kidi ben 120. Motong la Pita imadit le lo ikodo kataunu kidi, inbe iwete pang di nen.
16Iyei ne, “Ai, ang diek kapala yo katara lomim medana pang Yesu nga, mukot yege ni ngan Maro Amunu Silene ila Dawiti lono le iwete betanga atu a tiwode ilo ye Rau ke Maro. Ngan le betanga tani in kanono pombe moolmool ye Yuta yo irara di tooltool be la tikaua Yesu a tiparama i.
17Muku ngan ya in ede atu yo taye tagaua inbe taye tayei urata gaongo i.”
18(Ngan Yuta tani in tiyimoo a ikap pat ye urata dook tiap ki yo iyeii i, in kootoonoo. Motong la ikap pat ki tina ngan la iyimi tana atu ye. Motong la imol ke ete a ipamu kutono le du irauu ye tana ki tani le kapono perbe, inbe kodokodo ki imasukurai a idu tana.
19Le nga di tooltool le imot yo tiyepe Yerusalem nga, ngan tilongo bingi ki, motong la tisu tana tani in ene ye Akeldama ye di tapdi koodi nga. Ngan betanga yo Akeldama i, in punu ben, Tana Ke Rara.)
20Motong la Pita iwete mulu nen, “Ngan betanga yo tiwode ilo ye Rau ke Woungu in nen, ‘Rumu ki tani in sila iken sokorai. Le kin tooltool sa iyepe ye be.’ Inbe betanga damono ki yo iken ye rau tani i, in iwete nen, ‘Katara tool atu mulu a ikoli ye urata.’
21“Ngan nen le dada dook mata yo be tatoo a tatara tool in nen. Ole takamata di tooltool yo kanakana ngan taye di tayepe, inbe taye Tool Mai Yesu tapa a tala be taman nga.
22Le takamata di tooltool yo taye di tayepe ye kene yo Yowan ipamaditi urata ke rriungu di tooltool ye i, in le ise ye lal yo Maro ikaua Yesu a iyegidi inbe imulu a ilo pang ye malala ki i. Ngan ole tatara tool yo nen i, ngan la be ole isu idi inbe taye taraia bingi dook mata pang di tooltool ye maditingi ke Yesu nga.”
23Ngan Pita iwete pang di nen a imot, motong la tipootoo di tooltool ru edi. Ngan atu in Yosep yo tikiuu ye Basabas, inbe tiwete ene san ye Yastus i, inbe tool san in ene la Matias i.
24Motong la di tooltool tina tipatarau pang Maro nen, “Tool Mai, ong in lom galanga yam am tooltool nga le imot lomam. Le di tooltool ru nga nangai kupootoo i, in kupaposi pam
25a be nen ngan iyei aposol a ikolo Yuta, yesoo iyege urata ki ke aposol, inbe ikoo a la iyepe so ye malala dook tiap ki yo be la iyepe ye i.”
26Motong la tikatte madamada be tikamata, ngan le madamada ipaposo Matias. Le nga titaru be ikaua urata tani in a ila iseke di aposol tina yo sangaul be atu nga.

Read Aposol 1Aposol 1
Compare Aposol 1:4-26Aposol 1:4-26