Aposol 1:15-25

¹⁵Oŋga wosiru goku una mogo mamanesiŋ ŋiŋigo jareyaŋuŋ 120 ore so tumaŋgabi Pitaji botuyaŋuŋgo pakereru buŋo iŋi miya,

¹⁶“Ŋi ogopune, Yesu roru kipebuŋ, Judasji yoŋore kadi yaduya. Moro Tiriineji Judasre buŋo oi ronekoŋ kiŋ Deiwid maŋineo saŋu ruame miineji miko Miti kiki buk (Buk Song) oo quraŋgabi pega, oiji foriineke fukeya.

¹⁷Yesuji Judas roosoeko noŋunde qokogo mo gome gioine baiŋgo ore igodoŋgaru sosore ŋi qoruine aposol fukeya.

¹⁸“Judasji eebobo sembene eru furiine otebi roru oiji moreŋ rondiŋ mo furiine baya. Oi baku oo ubeine bopogaru qoruineji kerisieru moreŋgo igako beuine pougako ata beumaŋgoine kakaine gboine oi sosowo igajiri waperu wakiya.

¹⁹Oŋu fukeko Jerusalem ŋiŋigo sosowo ore biŋeine mane foreru moreŋ ore tinaine yoŋoyaŋunde buŋoo Akeldama mibuŋ. Oi noŋunde buŋoo Dari rondiŋ.”

²⁰Pitaji jikigaru iŋi yajiya, “Miti kiki (Buk Song) oo buŋo mo iŋi quraŋgabi pega, ‘Piine wambaine fukeru taine dimaiŋ. Oi moji rauine so fukeru gome pi akoŋ dimaiŋ,’ ‘Moji soine iŋore tife fukeru siŋaŋ gio baku dimaiŋ.’

²¹“Ore eru niŋo ŋi mo roosoeru igodoŋgabeneŋ niŋoke minebobo fukeru munaŋ moge oŋuine dimaku Yesuji komegone pakereya, ore Biŋeine kitiŋgaku miku goko sagaiŋ. Jonji Yesu miti meso rau teme Ofonji damaŋ oo akoŋ tumoqoqoo raru gioine fuŋgaru baku niŋore moreŋgo roregaru ra wareru goko Anutuji botunoŋuŋgo akoŋ ogagaru ropeya. Ŋi damaŋ sosowo oo kubunoŋuŋgo moko go wapebeŋ, yoŋoreone mo roosoebeneŋ sagaiŋ.”

²³Pitaji oŋu yajime ŋire baaru ŋi yoyoka tinayakuŋ mibuŋ. Mo tinaine Josef, tinaine mo Barsabas eru tinaine mo Jastus. Ŋi more tina Matias.

²⁴Tinayakuŋ miku iŋi oŋga wosiru mibuŋ, “O Ofoŋ, go ŋiŋigo maŋnoŋuŋ sosowo mane mukuge. Ore eru go ŋi yo yokoreone mo roosoege, oi noduigoŋ.

²⁵Judasji kiko eru kasigaru wakiru aposol gio bokeru sembenere so sibirigaru rakaya, iŋore ŋeŋeo ŋi moji aposol fukeru dimaku sosore ŋire gio baku goiŋ. Buŋo oi foriine.”