Aposol 18:9-22

⁹Motong la ye bong atu in Paulu ikamata Tool Mai ye mianga be iwete panga nen, “Ai, kin kutattadai be! Bong kuwetewete le ikenen leu, inbe kin kupakomo koom be.

¹⁰Au i ole ayepe yong, le tool sa ke be imadit a igarungong, nga tiap, yesoo di tooltool kiau alunu kaiye nanga la tiyepe ye malala mai i nga.”

¹¹Tina Paulu ikamata mianga nen nga, le nga sila iyepe nango la Korin ngo ye rai kerana atu inbe taudu limi be atu, inbe ipatomonai di tooltool ye betanga ke Maro.

¹²Bong ye kene yo Gaiyo iyei tool kuto mai pang tana mai Akaia ye in nga, ngan le di Yuda tina ngan tigaua lodi le atu, inbe timadit a tikadono Paulu. Le nga tikauu a lo tipatakode ye ni ke karatanga betanga, inbe tiwete nen.

¹³Tiyei ne, “Ai, tool i nga ikapye be ipatomonai di tooltool, a be nen ngan tiwil betanga yo iken ye ger kiam nga, inbe tisung pang Maro ye dada san.”

¹⁴Di Yuda tina ngan tiwete nen, le nga Paulu tani in iyiti koonoo be iraua betanga kidi. Bong ngan Gaiyo imadit le iwete pang di Yuda tina ngan nen, “Di Yuda nga, kumata le be tool i ipaskimooloonoo ger kiidi sa, too be iyeie dada dook tiap sa nga, ngan la be ole dook mata ke be au i alongo betanga yo kiang nga.

¹⁵Bong be ang ngan lomim modoko ye betanga kasin pa, inbe ye di tooltool edi yo iken ye ger kiang ang tapmim nga, ngan la le be kaman pang yau nga, ngan dook tiap. Be nen ngan ole ang tapmim kakarata betanga tani in. Au i o ke be alongo betanga ke so yo nen ngan a akarata tiap.”

¹⁶Gaiyo iwete pang di Yuda tina nen, motong la inganga di a tikoo ye rumu ke karatanga betanga tani.

¹⁷Motong la di tooltool tina yo Gaiyo inganga di nga, ngan di le imot tiportak be tiparama Soten, tool kuto mai yo matan kala rumu kidi Yuda ke gaongo i, inbe tirauu sila nangan la damadama ke rumu ke karatanga betanga ngan. Bong ngan Gaiyo tani in lon modoko ye dada yo tiyeii i, in tiap.

¹⁸Paulu iyepe kaiye nango la Korin ngo, motong la iye Pirisila ye Akuila timadit a tiyege di diedi kapala yo titara lodi medana pang Yesu nga, inbe tipa le tila ye malala mai san yo Senkiria i. Le nga ye kene tani yo Paulu la iyepe Senkiria ye in nga, ngan tikoto kutono, yesoo itoo momo kidi Yuda ye yo muku ngan ipamede betanga medana atu pang Maro nga. Motong la iyiri ye ookoo atu a be ikooi ye a idi pang Siria nga. Ngan le ikaua Pirisila iye Akuila lapau a tiyei ene, inbe tiye tikooi ye ookoo tani in a tidi.

¹⁹Tikooi a tidi, le di pombe ye launu ke Epeses, motong la Paulu iyege Pirisila iye Akuila sila tiyepe nango, inbe ya taunu ilo rumu kidi Yuda ke gaongo in lono lo iye di Yuda tiwetewete nga.

²⁰Le nga ye kene tani in di Yuda tina titoru nen, “Ai, nga ole si amyong tayepe kasin ngan.” Bong ngan Paulu iyei ne, “Atoo, o ayepe tiap.”

²¹Paulu tani in iwete nen, motong la be ipa, ngan iwete pang di nen, “Kumata le Maro ya taunu lono dook mata be amulu a aman pang yang nga, ngan la be amulu a aman nga.” Motong la Paulu iyege Pirisila iye Akuila sila tiyepe, inbe iyiri ye ookoo mulu a iyege malala tani yo Epeses i.

²²Ngan ookoo tani yo iyiri ye i, in ikooi a idi ngan le di isolo ye tiek ke malala mai Sisaria. Motong la Paulu ipa tana a ilo pang Yerusalem lo matan so di tooltool yo tigaua ye bareme ke Yesu nga, inbe iwete lo ponana ki pang di. Motong la iyege di sila tiyepe, inbe imulu a idu pang Antiok nga.