Aposol 18:5-22

⁵Masedoniati Sailasi'ene Timotike eramike akeno, Poli'a agafa huno mika Jiu vahera zamazeri atru huno mono kege'za maka kna nezamasmino, Jisasi'a, Agra'a tazahuno taguvazi nere huno eriama huno zamasmi'ne.

⁶Ana nehigezama ha'ma rente'za krunagema huntaza vahera anakre ku'a (saket) zafino kugusopa rupopo nehuno anage huno zamasmi'ne, tamagri kora kumimo'a tamagritami tamasenire megahie! Nagripina mago knazani'a omane'tfa hugahie. Amareti agafa huno vaniana, Jiu vahe'rompage megi'a vahete vugahue.

⁷Huno nezamasmino Poli'a anante osi mono nontetira atreno, mago megi'a nera agi'a Taitus Jastusi'e nehaza ne'mo, Anumzante mono hunentea ne'mofo nontega atru nehu'za mono nehaza nomofo asopare me'negeno vu'ne.

⁸Atru nehu'za mono nehaza nonte kegva nehia nera (presitent) Krispusi'e nehaza ne'ene, mika agri kvafi nemaniza vahe'mo'za Ramofonte zamentinti hu'naze. Ana nanekema nentahi'za, rama'a Korinti vahe'mo'za zamentinti hu'za mono ti fre'naze.

⁹Ramo'a kerage ava'nagna zampi anage huno Polina asami'ne, korera osuo, keaga huvava nehunka, keagama hu'zana azeoritfa huo.

¹⁰Na'ankure Nagra kagrane manigahuankino, kahe frikura mago'mo'a kagri kavufarera azana onte'tfa hugahie, na'ankure ama'na rankumapina Nagri vahera rama'a mani'naze, nehigeno ke'ne.

¹¹Higeno anampina mago kafugi sigisi'a ika mani'neno, ana vahera Anumzamofo keaga rempi huzami'ne.

¹²Kalio'ma, ugagota ra kvama (Gavana) Akaea kumatema mani'nege'za, Jiu vahe'mo'za oti'za mago antahintahi eri retro hu'za, avare'za ke refakohu trate (koti nonte) vu'za,

¹³anage hu'naze, ama ne'mo'a ruzahu huno tagri tra kemo'a osu'nea kante, vahekura mono antahiho huno nezmasmie nehazageno,

¹⁴Poli'ma agi'reaka hu'na ke hanuanki huno higeno, Kalio'a amanage huno Jiu vahera zamasmi'ne, mago'a hazenke zankuro, tusi'a havi kefo zanku Jiu vahe'motmama hanazana, knare hanige'na, nagra tamagri kerera hagerfigahue.

¹⁵Hianagi amama hunentaza kemo'a tamagra kegu'ene tamagigu'ene, tamagratmi kasege eri hankave netizanki tamagratmi erifatgo hiho. Nagrira nave'osigu ama'na naneke'a erifatgo osugahue.

¹⁶Anante kema refakohu tratetira agra'a zamahe natitrene.

¹⁷Anante mika'mo'za mono nonte kva nehia ne' Sosteni azeri'za kema refkohu tramofo avuga agafa hu'za hae'naze. Ana hu'nazanagi Galio'a ana zankura agesa ontahi'ne.

¹⁸Mago'a rama'a knama Korinti kumate Poli'a maniteno'a, afuhe'mokizmia hufru huno mani'neho hunezmanteno, votifi hageri tkaheno Siria nevigeke Prisila'ene Akuilake agrane vu'na'e. Na'ankure Anumzamofo avure'ma huvempama hu'negu, Sensarea kumate Poli'a anuzokara vagateno erivo'vo hu'ne.

¹⁹Efesasi uhanatite'za, anante Poli'a Prisila'ne, Akuilagizni'a ome nezanetreno, agra osi mono nompi umarerino, Jiu vahe'ene naneke hugantugma hu'za antahi'naze.

²⁰Antahige'za za'zakna tagrane manisane nehazageno, knarere huno osu'ne.

²¹Hianagi hufru hunezmanteno anage hu'ne, Anumzamofo avesi'zama me'nenige'na, ete'na tamagritega egahue. Anage nehuno Efesasiti'ma votifi,

²²vuno Saeseria unehanatino, Jerusalem umarerino mono vahera musenke hunezmanteno, anantetira Antioku urami'ne.