Aposol 17:6-33

⁶Ana vahe'mo'za Poline Sailasi kizanima hake'za erifore nosu'za, Jasonine, mago'a zamentinti nehaza afuhe'inena zamazu hu'za rankumamofo kva (siti ofisa) vahete vu'za ranke hu'za anage huzmante'naze, ama vahe'mo'za mopane mopane hazenke eri fore nehaza vahera ama e'naze.

⁷Hagino Jesoni'a muse huno nantu vahe noma'afi osi'agna manihogu zamarente'ne! Zamagra Sisa hanave tra kea ha' renente'za anage hu'naze, mago kinima mani'neana agi'a Jisasi'e hu'za nehaze!

⁸Ana vahe'mo'za rama'a vahe'zga zamazerisavri nehazageno, rankumamofo kva vahe'mo'za ana kea antahi'naze.

⁹Anante ran kumamofo kva vahe'mo'za Jesoni ene zamentinti naga'mo'za mizasaza zago erite'za, henka zamatrage'za vu'naze.

¹⁰Zamentinti naga'mo'za ame hu'za Poline Sailasinena kenageke huznantage'ke, Beria ran kumate vu'na'e. Uhanatiteke Jiu vahe osi mono nonte vu'na'e.

¹¹Ana Jiu vahe'mo'za antahi'za zamimo'a knare huno ama hu'negu, Tesalonaikama nemaniza Jiu vahe'mo'za nehazaza osu'naze. Na'ankure mono kema ha'ana muse hu'za eneri'za, tamage amagemo'a hu'nefi hu'za maka zupa avon tafepi ke'ankere'naze.

¹²E'ina hu'negu rama'a Jiu vahe'mo'za zamentinti nehazageno, zamagima me'nea Griki a'nene vene'nemo'zanena zamentinti hu'naze.

¹³Hu'neanagi Tesalonaika mani'naza Jiu vahe'mo'za antahizama, Poli'a Anumzamofo kea Beria ome huama nehie kema nentahi'za, zamagranena anantega e'za, keomente emente hu'za, zamagu zamagesa eri savari hu'naze.

¹⁴Anante Anumzante mani'naza naga'mo'za, Polina huntageno ame huno hagerinkena vu'ne, hianagi Sailasi'ene Timotikea anante Beria kumate mani'na'e.

¹⁵Hanki Poli'ene vu'naza vahe'mo'za, avega hu'za Antens ran kumate ome netrazageno, Sailasine Timoti kiznigu nagritega ame huke e'o kema humazamantetege'za, atre'za ete Beria vu'naze.

¹⁶Poli'ma Atens kumate zanavega anteno mani'negeno, rimpamo'a kna nehigeno asunku hu'ne, na'ankure ana kumapina havige anumza tro'ma hunte'naza'zamo'a, rama'a me'negeno negeno ana hu'ne.

¹⁷Ana huteno mago'a Jiu vahe'ene, Anumzamofonku koro nehaza megi'a vahe'ene osi mono nompi ome zamaretru huno nezamasmino, maketi kumapi maka kna emeri atruma haza vahera nanekea zamasmi'ne.

¹⁸Anahu kna huno mago'a Epikurien vahe'ene, Stoik vahe'mo'zanena vahe'mofo nomani'zama rezagane'zama negaza vahe'mo'za (Filosofa) kehakare hunentageno mago'amo'za anage hu'za antahi'naze, Nankna ke ama neginagi vahe'mo'a hunaku nehie? Ruga'amo'za hu'za, Agra ru anumzanku nehia nere. Na'ankure Jisasi agi agenkene, fripintima oti'nea knare musenkegu hu'naze.

¹⁹Ana hutege'za Polina avareza (areopagus) kanisol vahe'mo'za ke erifatgo nehazare vu'za anage hu'naze, Knare ama'i kahefa kema rempima hunezamina kea hananketa antahisumpi?

²⁰Na'ankure tagra tagesa hakare huna ke kagra nehane, hagi ke agafa'amo'a na'ane hu'nefi antahinaku nehune.

²¹Maka Antens vahe'ene ru mopareti vahe'mo'za ana kumapi emani'naza vahe'mo'za knazimi'a atre'za manine'za kahefa zama fore hia zamofo naneke huge antahige hu'naze.

²²Ana higeno Poli'a kanisol vahe'mo'za ke erifatgo nehazare otino (Areopagus) anage hu'ne, Antens vahe'mota, nagrama koana hakarezante tamagra monora hunentaze.

²³Na'ankure nagra vano nehuna urava'o hu'na rezagane'na monoma hunentaza'zama koana, mago itama (alta) husga huntenarera anage hutma krente'naze, ontahinona Anumzanetege hutma hu'naze. E'ina hu'negu ontahinetma mono'ma hunentaza zamofonku, e'i nagra huama hu'na neramasmue.

²⁴Ama mopane maka'zama me'neaza tro hu'nea Anumzamo, Agra'a monafine mopafinena Ra mani'neno, vahe'mo'za zamazanu ki'naza mono nompina nomanie.

²⁵Mago'a zankura atupara nosigeno vahe'mo'za zamazanu tro hu'za aza nosaze. Na'ankure agra'a asimu anteno mani'zana zamigeno zamasimu antageno, maka'zana hakare vahe'mofona nezamie.

²⁶Magoke vahepinti Agra maka kaziga kuma ante'za manisaza vahera tro hu'ne. Mopafi manivitesazegu nehuno, manisnaza kna'a nenteno, kumama manisaza kumara, kankamu zamino e'ire manigahaze huno huzmantetere hu'ne.

²⁷Anumzamofonku hake'za nege'za, agrikura zamazama hu'za hake'za erifore hu'nazanagi, agra tagrira magoke magokemota afetera omani'ne.

²⁸Na'ankure agripi manineta mika'zana nehuta, ama mopafina manita neone, mago'a tamagri fronka kemo'a anage hu'ne. Na'ankure tagranena agripinti fore hu'none.

²⁹Anumzampinti fore huta mani'none hanuta, kolima silvare'ma, havereti'ma vahe'mo'zama antahintahi zamiretima tro huntea zankura Anumzamo e'inahu kna hu'ne huta ontahisune.

³⁰E'inahu hu'za zamagena hu'miza e'naza kna'a, Anumzamo'a agesa ontahi'ne, hagi menina agra miko kaziga vahera hankave nentake ke huno, tamagu'a rukarehe hiho huno hu'ne.

³¹Na'ankure ama mopama Agrama refako hania kna, agra'a fatgo avu'ava zampi ko huhampri tegeno me'ne. Mago ne' huhampri ante'neana miko vahera amate huzameri huno fri'nefinti azeri oti'ne.

³²Fri'nefinti azeri oti'nea naneke nehige'za nentahiza, mago'amo'za agiza re'naze. Hianagi mago'amo'za anage hu'naze, mago'ane ama nanekea hananketa antahigahune hu'naze.

³³Poli'a havige mono kumara (Areopagus) atreno vu'ne.