Aposol 16:4-31

⁴Motong la Paulu iye Selas tiye Timoti tani in tipa a tila ye malala mai in le ngan tipa mulu a tila ye san, inbe tiwetewete pang di tooltool yo titara lodi medana pang Yesu koot nga, ngan ye betanga tani yo muku ngan di aposol ke Yesu, tiye di kuto maimai tigaua Yerusalem a tirauu i, in pang di be titoo.

⁵Ngan tina tipamede lodi ye betanga nen nga, le di tooltool tina yo tigaua ye bareme ke Yesu nga, ngan kinkatingi kidi idikdik mulu a ilo pang ete ye ke nga le imot.

⁶Motong la Paulu iye di ene tina ngan tipa kataunu ke tana mai ru yo Pirigia inbe Galesia ngan leu, yesoo Maro Amunu Silene iwetekala di be kin tila la tiwetewete bingi dook mata pang di tooltool ke tana mai Esia be.

⁷Motong la tipa le tila ye ker ke tana mai Misia, le nga be tipa so a tila la pombe ye tana mai Bitinia, bong ngan Yesu Amunu ilele di mulu be kin tila be.

⁸Le nga tikapusu Misia, inbe tipa so le du pombe ye malala mai Toroas.

⁹Motong la tiyepe a bong be tiken, ngan Paulu ikamata mianga atu. Ngan le ikamata tool atu ke tana mai Masedonia be ikodo, inbe itoru Paulu a imangmang ye nen, “Paulu, kupa so le kupot Masedonia, a nen ngan pot kulonam lapau!”

¹⁰Ngan Paulu ikamata mianga tani in a imot, motong la ammadit tina ngan le amsere dada yo be amdu pang Masedonia ye i. Ngan lomam galanga nen, Maro la ikiu am be du amwetewete bingi dook mata ki pang di tooltool ke Masedonia i.

¹¹Motong la amyiri ye ookoo atu la Toroas nga, le nga amkooi gorro motmot atu yo ene Samoteres in a amdu. Le nga du amyepe nango le bongbongini ki, motong la amkooi mulu le du pombe Niapolis nga.

¹²Motong la amyege Niapolis, inbe ampa mulu le la pombe Pilipai. Ngan malala tani in di Rom tilong tiyepe ye, inbe tiyeii le iyei ben malala maiyoko atu le imuku pang tana mai yo Masedonia i. Le nga la amyepe ye ke kapala ye malala tani in.

¹³Amyepe nango, inbe lal kidi Yuda ke sungunu pombe, le nga ampa ye dada ke koongoo ke malala mai tani in a amdu ke diki, motong la ampa le amla ye ran atu koonoo. Ngan lomam tar be potai pang ye ran tani in o ni sa dook mata ke pataraungu. Amla ngan amkamata di garup pattu yo tigaua a tiyepe nga. Motong la du amye di amwur a amwetewete.

¹⁴Ngan di garup tina yo tiwurur a titar talngadi ye betanga kiam nga, ngan atu in ene la Lutia i. Ngan Lutia tani in garup ke malala mai Taiataira, inbe ya in iyei urata ye wam kooroonoo dook mata a iyawar be ikap pat ye. Inbe ya in isung pang Maro kidi Yuda lapau. Ngan nen le Tool Mai iportaka Lutia lono le itar talngana ye betanga ke Paulu yo iwetewete nga.

¹⁵Le nga tirriui Lutia tani in iye di tooltool yo iye di tiyepe ye rumu ki, ngan lapau. Motong la iwete pam nen, “Kumata le lomim tar ben au i atara lok medana moolmool pang Tool Mai nga, ngan kaman man ayang tayepe ye rumu kiau i.” Ngan iwete pam nen le koon mede ye betanga le nga amtoo betanga ki.

¹⁶Ye kene atu in ampa a be amla pang ye ni ke pataraungu, ngan amtauaraia garup poranga atu yo so sadi idiwidiwoo i, in dada. Ngan garup tani in so sadi iyepe ye le ke be iwete nin so yo be pang dama ni ngan pompombe nga. Ngan nen le di tooltool yo tiyei kuto maimai panga nga, ngan tikap wele pat ye urata ki tani yo iyeii i.

¹⁷Motong la garup tani in itoo am amye Paulu, inbe koonoo le mai, a iyei ne, “Ai, di tooltool nga kapraingi ke Maro yo iyepe ete ni! Di ngan timan be man tiwetewete pang ye dada yo be Maro ikau ang a ipamulang ye i!”

¹⁸Ngan iyei dada nen ye ke alunu nga, le nga Paulu ilongo betanga ki le le tinin booroomoo ye, motong la iportak tina ngan le ipasak pang so sadi tani in nen, “Ai, awete pong nen, ye gurana ke Yesu Kirisi ene nga, ngan kupas a kukoo ye garup in.” Ngan le pattu leu, inbe so sadi tani in ipas a ikoo ye a ila.

¹⁹Ngan so sadi tani in ipas ye garup poranga tani a ikoo, inbe di kuto maimai ki tikamata ben dada kidi yo ke kaungu pat in tigarungu koot nga, le nga timan tina le tila la tiparama Paulu iye Selas, inbe tiyololo di yaru a be tila pang ye di kuto maimai kidi ye ni ke gaongo.

²⁰Motong la tikap di yaru a tila ye di tooltool maimai tina ke karatanga betanga a la tiwete pang di nen, “Ai, di tooltool ru nga ke Yuda, ngan yaru nga man tiyei dada dook tiap le tigarung burungu kidi tooltool ke malala mai kiidi i.

²¹Inbe yaru nga timan be man tipatomonai di tooltool kiidi a be titoo dada le momo kapala yo tigunkalidi tooltool ke Rom be tayei be nga.”

²²Ngan di tooltool malala mai tina yo timan tigaua nga, ngan tilongo tina yo di kuto maimai ke garup tani in tiwete nen nga, le nga di lapau titaula ye di a tisopo koodi ye betanga pang Paulu iye Selas tina. Motong la di tooltool maimai ke karatanga betanga tina ngan tiwete pang di tooltool be tidur sousoungu ke Paulu iye Selas, inbe tikap koro a tisalit di yaru ye nga.

²³Ngan le di tooltool tina ngan tirau welewele di le dook tiap yege, motong la titar di yaru lo rumu dook tiap kidi talnga dikidiki lono. Inbe di tooltool maimai ke karatanga betanga tiwete betanga medana pang tool yo matan kala rumu dook tiap tani i, in be matan kala di yaru dook.

²⁴Motong la tool tani yo matan kala rumu dook tiap i, in ilongo betanga medana nen, le nga ikap di yaru lo itar di ye rumu sokalana yo iken rumu dook tiap tani in lono meneng kataunu yege ni. Inbe ikapisi yaru kedi le imede ye kai yo tisapu le menmenngana i.

²⁵Paulu iye Selas tina ngan tiyepe nango le bong kataunu, motong la yaru tipatarau, inbe tiwou woungu yo ke Maro nga. Le nga di diede kapala yo tiye di tiyepe rumu dook tiap tani in lono nga, ngan titar talngadi pang di.

²⁶Ngan yaru tiyei nen le mooloo tiap inbe nauningi mai itak le saua ke rumu dook tiap in golong golongbe. Le tina dada ke rumu dook tiap tani in koon panganga le imot, inbe ooroo medana tina yo tipau di tooltool ye nga, ngan posok posokbe ye di le imot lapau.

²⁷Le nga ye kene tani in tool yo matan kala rumu dook tiap tani, in imadit ngan ikamata dada yo koon panganga le imot nga, le nga iyeisa di tooltool yo tiyepe rumu dook tiap in lono nga, ngan o tikoo a imot oo. Motong la iposo pul ki ke patokongo in a be ya taunu ikurummate ye.

²⁸Bong ngan Paulu ikamata, le nga koonoo panga le mai a ilele nen, “Ai, kin ong taum kugarungong be! Am le imot nanga la amyepe nga.”

²⁹Paulu koonoo nen, motong la tool tani yo matan kala rumu dook tiap i, in koonoo pang di tooltool be tikaua sul panga a tise. Motong la tool tani in idada a ilo ye rumu sokalana yo Paulu iye Selas tiyepe ye i. Ngan itattadai a itangarur, le nga igun turunu du Paulu iye Selas tina, ngan kedi punu.

³⁰Motong la tool tani in imadit a ikap di yaru a tisi ke tana, motong itor di yaru nen, “Di maimai nga, ngan ole ayei belei, a be nen ngan Maro ikau au a ipamulau nga?”

³¹Motong la yaru tiwete panga nen, “Kumata le be kutara lom medana pang Tool Mai Yesu nga, ngan ole Maro ikau ong kuye di tooltool yo kuye di kayepe ye rumu kiong nga, ngan a ipamulang ye so dook tiap yo be igarungang i.”