Aposol 16:3-38

³Poli'a avareno Timoti vunaku nehuno, avufa taga huntene, na'ankure mago'a Jiu vahera ana kumatera mani'nageno ana hu'ne, makamo'za antahi'naze agri nefa'a Griki ne' mani'ne.

⁴Zamagrama kumate kumate ufare'za nevu'za, aposol naga'mozane mono (elda) kva vahe'mo'zama Jerusale kumate hu'naza kea megi'a zamentinti vahe'mo'za avaririsaze hu'naza ke ome zamasmi'naze.

⁵Anama higeno mono vahe'mo'za zamentintifina hanave e'nerizageno, mago mago knafina rama'a vahe efare efare hu'za ra hu'naze.

⁶Zamagra Pamfaliane, Galasia kaziga ugatere'za nevzageno, Ruotge Avamu'mo mono ke Esia kaziga huzanku i'o huno huzamantege'za agatere'za vu'naze.

⁷Zamagrama Misia kaziga ete'za, Bitania kaziga vunaku hu'nazanagi, Jisasi Avamu'mo zamatrege'za ovu'naze.

⁸Ana hige'za zamagra Misia agatere'za, Troasi rankumate urami'za vu'naze.

⁹Keragera Poli'a mago ava'nagnaza efore higeno keana, Masedonia ne'mo otino mani'neno asamino, tagritega erakahenka Masedonia eme taza huo huno nehigeno ke'ne!

¹⁰Ana ava'nagnaza Poli'a ketegeta, Anumzamo tasmino Masedonia vutma knare musenke ome zamasmiho nehiankita, ame huta ome zamasmisune huta hu'none.

¹¹Troasi kumateti votia erigantu atreta hagerimpi vufatgo huta Samotresi vuta, ugatereta anante kna zupa Niapolisi kumate uhanati'none.

¹²Anantetira atreta Filipai kumate vu'none, anama mani kagi'naza kumamofo, ran kumare Masedonia, Romu kamanimo kavagri'nea kumate mago'a kna ana kumate mani'none.

¹³Mni fruhu knazupa rankumamofo kafampinti atiramita tinkenare nevuta, tagesama antahunana mago'a Jiu vahe'mo'za nunamu nehaza kumara me'negahie nehuta, a'ne naga mani'nageta anante umanita agafa huta, ana a'ne naga'enena kea hu'none.

¹⁴Mago ara agi'a Lidia'e nehaza a'mo knare konariri'ane fitu tavrave hatino zagore netrea a'mo, Taitaria rankumateti a' mani'neno Anumzamofonte mono hunentea a'mo kema hu'na kea antahi'ne. Anumzamo'a agu'a eri rukrehe higeno Poli'ma hiankea antahi'ne.

¹⁵Ana a'ene noma'afi nemani'za naga'anema mono tima frete'za, anage huno Lidi'a tantahigeke hu'ne, tamagra nagriku'ma Ramofonte mani tragotenoma mani'ne hanutma noni'afi eta emaniho, huno hampo'natino tantahigeke higeta noma'afi vuta umani'none.

¹⁶Anante nunamuhu kumatega vunaku nevunkeno, kazokzo mofa'mo'a eme tage'ne. Ana mofara havi avamu'mo agu'afi mani'neno henkama fore'ma haniaza hufore nehigeno, kva'amo'za hufore'ma nehige'za knare zago e'nerizane.

¹⁷Hanki ana mofa'mo Poline tagri tamefi tavririno ne-eno kezatino zmasamine, ama vahera Marerisa Anumzamofo kazokzo eri'za eneri'za vahere. Ama vahe'mo'za kefozantamifinti tmahoke aheno tamavaresia naneke tamasmiku neaze.

¹⁸Hakare knafina ana mofa'mo anazanke hu'ne. Hu'neanagi Poli'ma anankege antahiazamo'a avesra higeno, rukrehe huno ana avamuku anage hu'ne, Nagra Jisas Kraisi agifi hugantoanki atiraminka evuo! Higeno ana mofara atreno atirami'ne.

¹⁹Hu'neanagi ana mofa'mofo kva vahe'mo'za zamema ante'za zgoma e'neriza zama vige'za, Poline Sailasi'kizni zamagra ome zanazerite'za, zanavazu hu'za kva vahe'zgare maketi kumapi uhanati'naze.

²⁰Zamagrama kagota hu'za ke fakohu (megistret) kva vahe zgare zanavare'za vute'za anage hu'naze. Ama netremokea tagri ran kumapi vahera zamazeri savari neha'e, na'ankure zanagra Juda netrenkike,

²¹zanagrama vahe'ma rempi hunezmike amaza hiho ha'azamo'a, Romu vahe'mota tavutava'za ha'renerante.

²²Rama'a vahe'mo'za eri atru hu'za ha' rezmantageno, ke fakohu kva ne'mo Poline Sailasi kizni kukena zani'a eri vararo hutreteno, knonteti knonkeve zanami'o huno huzmante'ne.

²³Tusiza hu'za sefu knonkeve znamite'za, kina nompi zanavare'za ome matevu'za nezanatre'za, kina kva ne'ku hunte'za, kegva huso'e huo hu'za asami'naze.

²⁴Ke fakohu kva vahe'mo'za, kina nompi kva ne'ku, kina nompi avarento hia ke antahiteno, agu'afinka me'nea kinanompi zanavarenteno, zafafi zanagia erinteno anaki znantege'ne mani'na'e.

²⁵Kenage amunompi Polike Sailasikea, Anumzamofontega nunamune zgame'ene nehakeno, ruga'a kina vahe'mo'za zanantahi'naze.

²⁶Ana nehakeno ame huno tusi'a imi enerigeno kina vahe nomofo agafa'amo'a tore tore hu'ne. Ame huno maka kafamo'a anagigeno, maka kina vahe zamazampi rente'naza nofimo'a evurami'ne.

²⁷Kina vahete kva ne'mo'a avu vase'nefinti otino, keana kafana anagi vgare'negeno, kazinknoma'a erino agra'a ahefrinaku hu'ne, na'ankure agesama antahiana hago kina vahe'zgamo'za fre'naze hanuno ana hu'ne.

²⁸Hu'neanagi Poli'a amanage huno ranke hu'ne, kagra kavufarera mago'zana osuo, na'ankure tagra ama ofreta maka mani'none!

²⁹Tavi tagita eho huteno ana kina nompinka ufareno Poline Sailasi kizni zanagiafi ahirahi neregeno utraka huno umase'ne.

³⁰Anante otino zanavreno atiramino fegi nevuno, amanage huno zanantahige'ne, Ina kna hanugeno kefo zaniafinti nahoke ahegahie?

³¹Ana ke'arera anage hu'na'e, Ramofo Jisasinku kamentinti nehugeno, kefozanka'afinti kahoke neheno, nonka'afima nemani'za naga'moza'nema zamentintima hanageno'a zamahoke ahegahie.

³²Anage nehuke Ramofonke nesamike, maka noma'afima mani'naza vahera zamasami'na'e.

³³Ana kenageke kina nonte kva nemo'a zanavufafi zanahe'naza namuna sese huznantetegeno, agri'ene noma'afi mani'naza nagara mono ti ana keregeke frezmante'na'e.

³⁴Kina nonte kva ne'mo zanavreno noma'afi ufareno ne'za ome tro huznanteteno, Anumzante amentinti hia zankura, tusiza huno ana miko noma'afima nemaniza naga'anena musena hu'naze.

³⁵Nantera ko'atigeno ke fakohu kva vahe'mo'za, ati vahe zga huzamanteno anage hu'ne, zanatrenke'za ana ne'trena vi'o hu'naze.

³⁶Kina nonte kva ne'mo Polina amanahu ke ome asami'ne. Ke fakohu kva vahe'mo'za (jas) zanazeri megi'a zanatre'o hunantage'na e'noe, hagi menina atiramita tanarimpa frune vi'o huno zanasmi'ne.

³⁷Hu'neanagi Poli'a ati vahe'mokizmi ke nona'a amanage huno zamasmi'ne. Zamagra rama'a vahe zamufi knare ke agafa e'orine'za havige zante tahenaze, tagranena Romu mopa agafa vahe mani'nonanagi, kinafi tavare'za emerante'naze. Hagi menina oku'a hurantenaku nehazo? Tamage anara osu'tfa hugahaze! Zamagra'zmi e'za eme tavare megi tatregahaze.

³⁸Ana naneke ati vahe'mo'za ke fakohu kva vahe ome nezamasmige'za nentahi'za, Poli'ene Sailasike Romu vahe mani'no'e hukema ha'azanku zamagogo fege'za koro hu'naze.