Aposol 15:1-24

¹Paulu iye Banabas tiyepe go la Antiok ngo, inbe di tooltool pattu tipa ke Yudia a tidu pang Antiok. Motong la du tipatomonai di diedi kapala yo titara lodi medana pang Yesu, ngan nen. Tiyei ne, “Ai, kumata le be katoo momo ke Mose tiap, inbe tikoro tinimim tiap lapau nga, ngan o ke be Maro ikau ang a ipamulang ye so yo be igarungang i, in tiap.”

²Ngan Paulu iye Banabas tilongo betanga yo di tooltool tina ngan tiwete nga, le nga yaru katedi malmal pang di a tiye di tiparkookoo a tiparsu ye betanga tani. Motong la di diedi kapala yo titara lodi medana pang Yesu nga, ngan tipootoo Paulu iye Banabas be tiwanga di a tiye di diedi kapala tilo pang Yerusalem a be lo tiye di aposol ke Yesu, inbe di kuto maimai ke bareme ke Yesu yo tiyepe Yerusalem nga, ngan tigaua inbe tikarata betanga tani in.

³Motong la di tooltool tina yo tigaua ye bareme ke Yesu nga, ngan tiwanga Paulu iye Banabas tiye di diedi tina a tilo nga, ngan le tipa kataunu ke tana mai Ponisia le Samaria. Inbe tiwetewete pang di tooltool ye yo Maro iportak di tooltool yo tipa ye rara kidi Yuda tiap nga, ngan lodi koot nga. Ngan nen le di diedi kapala yo titara lodi medana pang Yesu nga, ngan tilongo bingi kidi le lodi ponana kaiye.

⁴Motong la ye kene tani yo di tooltool tina ngan tipa le lo pombe Yerusalem nga, ngan le di tooltool yo tigaua ye bareme ke Yesu nga, ngan tiye di aposol ke Yesu, inbe di kuto maimai kidi ngan lodi ponana ye di, inbe tikap di lo tiye di tiyepe. Motong la Paulu iye Banabas tigasa pang di ye so tina le imot yo Maro iyei ye yaru baedi a pompombe nga.

⁵Ngan tigasa nen, motong la di Paresi kapala yo titara lodi medana pang Yesu nga, ngan timadit lo tikodo, inbe tiwete nen, “Ai, kumata le be di tooltool yo tipa ye rara kidi Yuda tiap nga, ngan be se tigaua yidi tooltool yo tatara lodo medana pang Yesu nga, ngan ole kakoro tinidi, inbe kawete pang di a titoo ger ke Maro yo iwete pang Mose a iwodo nga, ngan dook le imot.”

⁶Motong la di aposol ke Yesu tina ngan tiye di kuto maimai ke di tooltool yo tigaua ye bareme ke Yesu nga, ngan tigaua a be tikarata betanga tani in.

⁷Ngan tigaua ngan le tiwetewete kaiye, motong la Pita imadit lo ikodo, inbe iwete pang di nen, “Ang di diek nga, ngan lomim galanga nen, mukot yege ni ngan au i la Maro ipootau be ala la araia bingi dook mata pang di tooltool yo tipa ye rara kidi Yuda tiap nga, a nen ngan be tilongo betanga yo awete nga, ngan titara lodi medana ye.

⁸Ngan Maro in lon galanga ye di tooltool tina ngan lodi oo, inbe ya in la ikaua Amunu Silene pang di dawa ben tina yo muku ngan ikauu paidi nga. Ngan ye dada yo iyeii nen i, in ipatnaii paidi be ya lon ponana ye di tooltool rara san, ngan lapau.

⁹Ngan dada yo Maro iyei paidi taye di nga, ngan gaongo leu. Bong titara lodi medana panga, ngan la le igiri noonoo kidi le lodi iken galangana dook mata ye matana nga.

¹⁰Nga yelei, a nookoot nga kakapye be kasauraia so moonoo lo Yesu di galiunu guridi nga? Ngan ger ke Maro nga, ngan imoo san, le muku ye di sasa kiidi nga inbe le se yidi yo nookoot nga lapau, ke be tasolo so moonoo nen tiap. E nga be katouo Maro, too?

¹¹Bong idi nga ole tatara lodo medana nen; Tool Mai Yesu lono paidi a iyei dada dook mata paidi, ngan la le Maro ikau idi a ipamulidi ye so dook tiap yo be igarungidi in nga, dawa ben tina yo ikap di tooltool rara san nga lapau a ipamulu di koot nga.”

¹²Motong la di tooltool tina yo tiyepe ye gaongo nga, ngan tiwetewete tiap, bong sila tipalongo a titar talngadi pang Banabas iye Paulu. Inbe yaru tiwetewete pang di ye urata maimai le mos matana matana yo Maro ikap gurana pang di a yaru tiyei kataunu ye di tooltool yo tipa ye rara kidi Yuda tiap nga, ngan a iyei ben tarkilanga pang di nga.

¹³Ngan Banabas iye Paulu tiwetewete a imot, motong la Yemis imadit a iwete nen, “Ang di diek nga, katar talngamim a kalongo betanga kiau.

¹⁴Ngan Simon in iwete paidi nen nga, ngan be iwete nini Maro yo isi kulkulunu yege ngan si ikap di tooltool yo tipa ye rara kidi Yuda tiap nga, ngan kapala, a be nen ngan man tiyei dawa ben di tooltool ki ya taunu nga.

¹⁵Ngan betanga ki tina nga, ngan gaongo leu ben kidi Maro koonoo yo tiwodo nga. Ngan tiwodo nen,

¹⁶‘Di rara ke Dawiti yo be tikoli a tiyei di tooltool kuto maimai a be matadi kala di tooltool kidi Isrel le imot nga, ngan di ngan ben rumu yo iduku a imassoroko le dook tiap koot i. Bong pang dama ni nga, ngan ole amulu a asi be si are kolo rumu tani mulu. Ngan renge le so ki kapala yo dook tiap nga, ngan ole akapkol paunu mulu, a be nen ngan si are rumu tani ye mulu le lo ikodo.

¹⁷Ngan ole ayei nen, a be nen ngan di tooltool kapala le imot ole tiserau Tool Mai, inbe di tooltool yo tipa ye rara kidi Yuda tiap bong apootoo di be tiyei di tooltool kiau nga, ngan ole tiserau lapau.

¹⁸Ngan mukot yege ni nga, ngan Tool Mai iwete betanga nen be ole so yo nen ngan pombe.’ ”

¹⁹Motong la Yemis tani in iwete mulu nen, “Au i lok yo be aweta in nen; di tooltool yo tipa ye rara kidi Yuda tiap inbe tiportak lodi a timan pang ye Maro koot nga, ngan ke be tatar gogo urata moonoo yo nen ngan lo podi tiap.

²⁰Bong be tiap nga, ngan tawodo rau pang di a taso talngadi dook ye ger yo be titoo, ngan nen. Tayei ne, ‘Kin kakan kaningi yo di tooltool tiparoro pang di maro yo kai padodo, ngan be. Inbe kin kakapsap ye dada kidi kerenge be. Inbe kin kakan asara yo tikis guridi a timmata le rara ipot lodi nga, ngan lapau be.’

²¹“Ngan ole tayei nen, yesoo mukot yege ni a ise nga, ngan di tooltool tipa be tikinkat betanga yo ke Mose nga, ngan ye malala maimai tina le imot ke di tooltool yo tipa ye rara kidi Yuda tiap nga, inbe kanakana ngan lal kidi Yuda ke sungunu be pombe nga, ngan di tooltool tina ngan tilo rumu kidi Yuda ke gaongo ngan lono lo tikinkat betanga tina ngan pang di lapau.”

²²Yemis iwete nen a imot, motong la di aposol ke Yesu tina ngan tiye di kuto maimai ke bareme, inbe di tooltool le imot yo tigaua ye bareme ke Yesu nga, ngan tikarata betanga be ole tipootoo di tooltool kidi ru a be tiwanga di a tiye Paulu ye Banabas tidu pang Antiok. Ngan le tipootoo di, ngan atu in Yuta yo tiwete ene san ye Basabas i, inbe tool san in Selas. Di ngan tiyei kuto maimai pang di diedi kapala tina yo titara lodi medana pang Yesu nga, le nga tiye di tiyepe.

²³Motong la di aposol ke Yesu tiyawara rau atu ye di a tikauu a tidu. Ngan rau tani in iwete nen, Am aposol ke Yesu, inbe di kuto maimai ke bareme, am nga di diemim kapala yo amtara lomam medana pang Yesu lapau nga. Ngan la amwodo rau naii a be amyawari pang, ang di diemam yo kapa ye rara kidi Yuda tiap, bong katara lomim medana pang Yesu koot a kayepe ye malala mai Antiok, inbe tana mai Siria le Silisia nga. Am nga amyawara lo ponana kiam pang.

²⁴Ngan am nga amlongo betanga nen, be di tooltool kiam kapala yo tipa ke ni a tisila nga, ngan sila tigarungang ye betanga kidi yo tipatomonai ang ye nga, le lomim modoko ye betanga kidi. Bong di tooltool tina ngan amwete touo kadi betanga sa be sila tiweta pang tiap.