Aposol 14:1-14

¹Antioku mani'nakeno fore hu'neankna kna'za fore hu'ne, Poli'ene Banabasikea Ikonia kumate vuke, Jiu vahe osi mono nompi (sinagog) hampo'natike hakare vahe'mo antahi ama hu'are, mono kea huama nehake'za, rama'amo'za Jiu vahe'ene Griki vahe kevumo'za zamentinti hu'naze.

²Hu'neanagi Jiu vahe'mo'za zamentinti ana kegura nosuza, megi'a vahe antahintahi eri savri hazage'za, ana netrena ha' rezanante'naze.

³Ana hazageno mago'a knafina anantega mani'neke, mono kea hanavetike Ramofonkura nehune, asunku'zamofo kea nehakeno, avame'zane kaguvazanena zanagri znazampi eri fore hu'ne.

⁴Hu'neanagi ana ran kumapi mani'naza vahe krerafamo'za amu'nompinti refako hu'za, mago'amo'za Jiu vahetega vazage'za, mago'amo'za aposol vahetega vu'za hagerafi'naze.

⁵Megi'a vahe'ene Jiu vahe'mo'zane kva vahe zamine, zamazeri haviza huta have knonu tare netrena zanahefrigahune hu'za nehazageke,

⁶Poli'ene Banabasikea ananke nentahi'ne, freke Likonia rankumamofo osi kumatrena Listrane Debine ana kaziga asoparega meno vu'nea mopare umani'na'e.

⁷Anantega umani'neke mago'ene Knare Muse Kea huama hu'ne zamasmi'na'e.

⁸Listra kumatera mago agia havizahu ne' ksente'nea ne' mani'ne, ksente'neregatira kana vano nosia nere.

⁹Ana ne'mo Poli'ma huama hiankea mani'neno antahine. Poli'a ana ne'ma avufi kefatgo huno negeno'a, amentinti nehiankino knare huntegahie nehuno,

¹⁰ran ke huno asami'ne, kagareti oti fatgo huo huno higeno, ana ne'mo, haru huno marerino tamino nehuno otino vu'ne.

¹¹Poli'ma hiazama ana vahe tamimo'za nege'za, Lakonia kefinti ranke hu'za anumzantamimo vahe fore huno tagrite ne-e hu'za hu'naze!

¹²Zamagra Banabasinku Ziusi (havi anumzane) nehu'za, Polinku Hemesi'e (havi anumzane) hu'za kahefa zanagi ante'naze. Na'ankure Poli'a ke ne'ku hu'naze.

¹³Ziusi havige anumzamofo mono nona, ran kumamofona megi'a, tva'onte me'nea nomofo kva ne'mo'a mago'a, bulimakaona nevareno mago'a avasase'zantamine erino ran kumamofo kahante vige'za, agrane ana mika vahe'mo'za kre sramna huznantenaku hu'naze.

¹⁴Hu'neanagi aposol Poli'ene Banabasikea ananke nentahike kukena zani'a tagato tagatu nehu'ne, zanagare'ne ana vahetamimofo amunompi ufre'ne kezatike anage hu'na'e.