Aposol 13:35-50

³⁵E'ina hu'negu mago'ene zgame avon tafepina anage huno kre'ne, Kagra atresankeno ruotge hu'nemo'a onkasrigahie. (Sam-Zga 16:10)

³⁶Deviti'a, agrama manino e'nea knafina Anumzamo'ma erigahane huno hunte'nea eri'zana eri vagareteno, frige'za negehoma asentenafi ome asentageno avufamo'a kasri'ne.

³⁷Hu'neanagi Jisasina fri'nefinti Anumzamo azeri otigeno onkasri'ne.

³⁸E'ina hu'negu nenafutma antahita keta hiho, ama ana ne'pinti kumi tamia eri atresia ke huama hu'na neramasmune.

³⁹Ama ana nete'ma zamentinti hanu'za fatgo vahe manigahaze. Mosese kasegemo'a tamazeri fatgo osugahie.

⁴⁰Ana hu'negu tamagra kava hu'nenkeno, kasnampa vahe'mo'za hu'naza nanekemo'a tmagritera fore osino.

⁴¹Kiza zokago kema nehaza vahe'tmina, keho! Tamano nevazinketma antri hutma fritma haviza hugahaze! Nagra knare eri'za enerugetma tamentinti'a nosaze. Vahe'mo'ma tamasmi'nigeta tamentintia osugahaze, huno kre'ne. (Hava 1:5)

⁴²Anage huteke Poli'ene Banabasike atineramikeno, vahe'mo'za ama ana nanekea ru mni fruhu kna (sabat) zupa knare eme tasmigaha'o, hu'za zanasmi'naze.

⁴³Mono'ma osi mono nompi (sinagog) huvgarete'za, vu'za e'za nehageno, rama'a Jiu vahe'mo'zane, Anumzanku koro nehaza megi'a vahe'mo'za, Poline Banabasi kizani zanavriri'za nevzage'ne, zamazeri hanaveti ke hu'ne, Anumzamofo asunku'zampina hanavetita maniho hu'ne ana vahera zamasmi'na'e.

⁴⁴Hanki anante Mni fruhu kna (Sabat) zupa, ran kumapi mani'naza vahe'mo'za kuma azute'za Ramofo ke antahinaku emeritru hu'naze.

⁴⁵Mika vahe eritru nehzage'za Jiu mono vahe'mo'za nezmage'za kanive reneznantegeno Poli hiankegura mago zamarimpa huoznante'za, ana vahe'mo'za ha' reznante'naze.

⁴⁶Poli'ene Banabasi'kea hanavetike koro osu anage hu'na'e, Esera Juda vahe'motma Anumzamofo nanekea tmasmi'nonanagi, tamagra tmefi ana kea hunemitma fatgoma hutma mani'netma manivava asimu erizankura tame'nosigu, megi'a vahete tagra rukarehe nehu'e.

⁴⁷Ramo'a amanage huno hanavege hurante'ne, Nagra huhampri kantoankinka, kagra megi'a vahera tvi zami mani'nenka, kumipinti zamazahu kea erinka mopa atupare uhanatigahane huno tasami'ne. (Aisa 42:6, 49:6)

⁴⁸Megi'a vahe'mo'za ana naneke nentahiza muse nehu'za, Ramofo kegu tusi'za hu'za musenkase nehazageno, mani'vava zamasimu erigahaze huno huhampri zamante'nea vahe'mo'za zamentinti hu'naze.

⁴⁹Ana hazageno Ramofo kemo ana mopa kaziga haezganino vuno eno hu'ne.

⁵⁰Hu'neanagi Jiu vahe'mo'za, Anumzamofonku koro nehu'za zamagi me'nea a'nene, zamagi me'nea vene'nene zamarimpare ke hu'za zamazeri otige'za, Poline Banabasi kiznia, ana mopa kazigatira zamahe anati tre'naze.