Aposol 11:9-29

⁹Hianagi ana ageru'mo mago'ene anage monafinti hu'ne, Anumzamo'ma azeri agruma hu'neniazana, haviza huno agaru osu'ne hunka osuo!

¹⁰Anazana tagufa (tri) zupa fore huteno, ete ana mika'zana avazu higeno monafi mareri'ne.

¹¹Anama nehigeno, Sisaria kumateti huzmantege'za tagufa vahe'mo'za, nemanua nonte ehnati'naze.

¹²Avamumo nasamino i'o osunka ana vahe'ene amane vuo hige'na, 6si'a nenafu'za nagrane azageta Konilias nontega vu'none.

¹³Koniliasi kegeno ankeromo noma'afi oti'neno asami'nea kea, anage huno tasami'ne, huzamantege'za Jopa vu'za Saimoni'e nehaza ne', mago agi'a Pitana avare'za esageno,

¹⁴agra mono naneke neramasaminkeno, kagri'ene mika nagaka'anena, kefo zantmifinti tamahoke ahegahie.

¹⁵Anante naneke erigafa hu'na nehugeno, Ruotge Avamu'mo zamagrite erami'ne, ese'ma tagrite e'neaza huno emani'ne.

¹⁶Ana hige'na Ramo'ma huno, Joni'a tinu mono tina fre ramante'neankina, Avamunu tina frermantegahue hu'nea kegu nagesa antahi'noe.

¹⁷Ana hu'negu Anumzamo'ma magozahu muse'zama (gift) zamagri'ma zami'neana, anahu kna huno Agra Ramofo Jisasi Kraisinte tamentinti nehunkeno tami'neaza hu'negu, iza'na nagra Anumzamofo eri'zankura i'o huzamantegahue?

¹⁸Ana kema zamagrama antahite'za, kema huzmanteku'ma hazana netre'za, Anumzamofo ra agi ami'za anage hu'naze, Anumzamo'a megia vahera zamarege'za zamagu'a rukarehe hu'za zamasimu e'nerize hu'naze.

¹⁹Ananknafi Stivenina ahe nefri'za mago'a nagara zamahe fragu vazige'za, atre'za Fonesiane, Saiprasine, Antiokune, nevu'za ru vahete mono osu, Jiu vaheteke mono kea ome zamasmi'naze.

²⁰Hu'neanagi Saipras vahe'ene Sairini vahe'mo'za zamagripinti mago'a Antioku e'za, agafa hu'za Ramofo Jisasi knare musenkea huama hu'za Griki vahe zamasmi'naze.

²¹Ramofo hihamumo zamagripi me'negu, tusi'a vahe'mo'za zamagu'a rukarehe hu'za Ramofonte zamentinti hu'naze.

²²Anama zamagrama hazankemo'a, Jerusale mono vahete ege'za nentahi'za, zamagra Banabasi huntageno Antioku vu'ne.

²³Agrama eno Anumzamo'ma asunku'ma humazmanteaza negeno, muse nehuno zamazeri hanaveti ke zamasmino, tamage huta tmaguareti Ramofonte maniho hu'ne.

²⁴Banabasi'a knare ne' mani'neno, Avamupi aviteno amentinti hu'negeno, maka vahe'mo'za Ramofonte e'naze.

²⁵Ana huteno Banabasi'a Tasisi kuma atreno Soli omegenaku vuno,

²⁶ome ke fore huteno avareno Antioku kumate uhanati'na'e. Ana kafufina Banabasi'ene Solikea mono vahe'zga mono kea hunezamikeno tusi'a vahe fore hu'ne. Anante amage'ma nentea disaipol naga'mo'za pusa (kristen) mono vahere huno zamagi'a eri'naze.

²⁷Ana knafina mago'a kasnampa vahe'mo'za Jerusaleti erami'za, Antioku kumate ehanati'naze.

²⁸Mago'zmia Agabasi'e hu'za nehaza ne'mo, otino Avamumofo hanavefi maka mopafina agate'za fore hugahie huno hu'ne. Romu kamanimo kva kri'nea mopa ramimpi, ana kemofo avufga'a (Klaodias Sisama ran kva emania knafi fore hu'ne).

²⁹Jisasi amage'ma nentamo'za, mago mago'mo'za zagoma eri'naza avamente eritru huta Judia mani'naza tafuheintega (mono nagate) zamaga'zanku hugahazanki atre'zmantesune nehu'za,