Aposol 11:1-15

¹Motong la bingi idada le la di aposol ke Yesu tiye di diedi kapala yo titara lodi medana pang Yesu a tiyepe ye tana mai ke Yudia le imot nga, ngan tilongo betanga ben di tooltool yo tipa ye rara kidi Yuda tiap nga, ngan tikaua betanga ke Maro lapau nga.

²Le nga ye kene yo Pita imulu a ilo pombe Yerusalem nga, ngan di Yuda yo titara lodi medana pang Maro inbe tikodo le timede mata ye dada ke koranga tinidi nga, ngan tipasak panga.

³Tiyei ne, “Ai, ong i yelei a kudu ngan le kulo rumu lono kidi tooltool yo tikoro tinidi tiap nga, ngan lo kuye di kayepe, inbe kakan so nga?”

⁴Motong la Pita igasa dook pang di a iwete nin so tina yo pombe pang ye nga, ngan le imot. Ngan le iwete nen,

⁵“Au i ayepe malala mai Yopa nga, ngan apatarau a ayepe, inbe akamata so atu ben mianga. Le nga akamata so maiyoko atu dawa ben wam in tiwat gigini yo pai nga ye ooroo, inbe tipadua ke lang katene a isi pang yau.

⁶Ye kene tani in be matak lo pang ye wam tani nga, ngan akamata di asara ke tana yo kedi pai nga, inbe di asara gok tipa ye di asara kapala yo dawa ben moto le so nga, inbe di man matana matana yo ke lang katene, ngan lapau.

⁷Ngan akamata di so tina, motong la alongo tool atu kalngana iwetewete pau nen, ‘Pita, kumadit a kurau di asara ngan sa a koni.’

⁸“Motong la awete panga nen, ‘Atoo, Tool Mai! Au i ke be ayei nen tiap yege, yesoo asara kapala yo am Yuda amkamata ben dook tiap inbe giri leu nga, ngan momo kiam igunkalam ye be amkan tiap nga, ngan au i akan touo sa muku pitiap yege.’

⁹“Ngan awete nen, bong ngan tool kalngana tani yo iwetewete ke malala ke Maro a isi pang yau muku i, in iwete pau mulu nen, ‘So yo Maro iyei le igalanga dook mata ke kaningi nga, ngan kin kuwete be so ngan giri leu be.’

¹⁰Ngan tool kalngana tani in iwete nen le patol, motong la tiyolo so tina ngan le imot mulu a ilo pang ye malala ke Maro nga.

¹¹“Ye kene tani in so tina ngan imulu a ilo, inbe di tooltool tol yo tiwanga di ke Sisaria pau a timan nga, ngan man pombe ye rumu yo amyepe ye i.

¹²Motong la Maro Amunu Silene iwete pau nen, ‘Kin lom rru be, bong kuye di tooltool ngan kala.’ Motong la di diek limi be atu yo titara lodi medana pang Maro nga, ngan titoo au lapau a aye di amla, ngan le ampa so le amlo ye rumu ke tool tani.

¹³Amlo rumu lono ki, motong la iwete pam ye yo ikamata bangabangana ke Maro atu isi pombe rumu lono ki, inbe iwete panga nen, ‘Ole kuwanga di tooltool pattu a tila pang Yopa, la tikaua Simon yo tikiui ene san ye Pita i, in a tiye timan.

¹⁴Ngan kumata le be tool tani in iman nga, ngan ole man iwete betanga sa pong ye dada yo be Maro ikau ong kuye di rara kiong, inbe di tooltool kiong yo kuye di kayepe nga, ngan le imot a ipamulang ye so dook tiap tani yo be igarungang in nga.’

¹⁵“Tool tani in iwete nen a imot, motong la be amadit ye betebetanga pang di, ngan Maro Amunu Silene isi le si ipapon di, dawa ben yo kulkulunu ngan Maro Amunu Silene tani in isi yidi nga.