Aposol 10:4-26

⁴Ngan Konilias tani in itattadai a matan kenen ye, inbe iyei ne, “Tool mai, soo so be kuweta pau i?” Motong la bangabangana ke Maro tani in se iwete panga nen, “Maro ilongo pataraungu kiong, inbe ikamata so yo kop sokorai pang di tooltool yo ballingadi tiap nga, ngan le lon ponana ye dada kiong yo kuyeii i.

⁵Le nookoot nga kuwanga di tooltool pattu a tila pang Yopa la tikaua Simon yo tikiui ene san ye Pita i, in a tiye timulu a timan.

⁶Ngan ya ni ngo iye Simon san yo tool ke kaungu di asara kulidi a karatanga so kapala ye i, in yaru tiyepe ye rumu ki yo ikodo potai pang ke tiek i.”

⁷Ngan bangabangana tani in iwete pang Konilias nen a ila. Motong la Konilias koonoo pang di kapraingi ki ru, inbe tool ki yo ke patokongo ngan atu. Ngan tool ki ke patokongo tani, in ya lapau igaua lono le atu pang Maro, le kanakana ngan iloni dook mata ye urata ki.

⁸Ngan la igasa pang di ye so tina le imot yo pombe pang ye nga, motong la iwanga di tol a tila pang Yopa nga.

⁹Di tooltool tina yo Konilias iwanga di nga, ngan tipa le la tiken dada. Le bongbongini ki ye so ben ke matana sangaul be ru nga, ngan tipa le tila potai pang ye malala mai tani in. Ngan ye kene tani in Pita imadit a ilo pang rumu pono be lo ipatarau.

¹⁰Ngan ipatarau go, inbe nga pitola le nga lono be ikan so pa. Ye kene tani in tikarata kaningi go, inbe ikamata so atu dawa ben mianga.

¹¹Ngan le ikamata malala ke Maro koon panganga, inbe ikamata so maiyoko atu dawa ben wam in tiwat gigini pai nga ye ooroo, inbe tipadua ke lang katene a isi pang ye pang tana.

¹²Ngan ye wam tani, in asara matana matana le imot yo kedi pai nga, inbe asara kapala yo dawa ben moto le so kapala yo tikarau nga, inbe di man matana matana yo ke lang katene nga, ngan tiken pono.

¹³Motong la Pita tani ilongo tool atu kalngana iwete panga nen, “Pita, kumadit a kurau di asara ngan sa a koni.”

¹⁴Bong ngan Pita iwete panga nen, “Atoo, Tool Mai! Au i ke be ayei nen tiap yege, yesoo asara kapala yo am Yuda amkamata ben dook tiap inbe giri leu nga, ngan momo kiam igunkalam ye be amkan tiap. Ngan la le au i akan touo sa muku tiap nga.”

¹⁵Motong tool kalngana tani yo iwete panga muku i, in iwete panga mulu nen, “So yo Maro iyei le igalanga dook mata ke kaningi nga, ngan kin kuwete be so ngan giri leu be.”

¹⁶Ngan tool kalngana tani in iwete nen le patol, motong la pattu leu inbe tiyolo wam tani in mulu a ilo pang ye malala ke Maro nga.

¹⁷Ngan wam tani in tiyole a ilo, inbe Pita nga sila lon kaua urata ye mianga ki tani in punu. Inbe ye kene tani in di tooltool yo Konilias iwanga di a timan nga, ngan man pombe. Le nga tipa a titortor di tooltool ye ni yo rumu ke Simon iken ye i, motong la timan le man tikodo ye dada ke koongoo ke rumu tani in.

¹⁸Inbe koodi a titor nen, “Ai, Simon yo tikiui ene san Pita i, in ya la iyepe in, too tiap?”

¹⁹Ngan Pita tani in nga lon kaua urata ye mianga ki go, inbe Maro Amunu Silene iwete panga nen, “Simon, di tooltool tol la timan man tiserong nga.

²⁰Le kumadit a kudu pang ye di, a nen ngan kuye di kala. Kin lom rru be, yesoo di tooltool ngo au tauk la awanga di be timan pang yong nga.”

²¹Motong la Pita tani in imadit a idu pang ye di tooltool tina du iwete pang di nen, “Ai, au tani yo kaserau in naii. Ngan yelei a le kaman nga?”

²²Le nga di tooltool tina ngan tiwete panga nen, “Am nga, Konilias yo tool turana bulbulini ke patokongo kidi Rom i, in la iwangam be amman pang yong i. Ya in tool noonoonoo, inbe itoo dada kidi Yuda yo be iyepe la Maro parmana ye i, le di tooltool kidi Yuda le imot tikamata ngan tiwete be ya in tool dook mata. Ngan bangabangana ke Maro atu, yo ipootoo panga ya taunu i, in iwete panga be iwangam man amkau ong a kula pang rumu ki, a be nen ngan la ilongo betanga kiong yo be kuwete nga.”

²³Motong la Pita ikap di ben di lowo ki a iye di tilo rumu ki lo tiken ye bong in. Tiken a bongbongini ki, motong la Pita imadit a iye di tooltool tina ngan be tila, ngan le di diene kapala ke Yopa yo titara lodi medana pang Yesu nga, ngan titoo lapau a tiye di tila.

²⁴Tila ngan le la tiken dada, le bongbongini ki, motong la tipa le la pombe ye malala mai Sisaria. Ngan Konilias tani in itar matana ye di be timulu nga, le nga ikiu di rara ki, inbe di tooltool yo ki nga, ngan man tigaua a tinama Pita.

²⁵Ngan yeisa be Pita man pombe a be ilo rumu lono, ngan Konilias tani in ipa le iman potai pang ye kene punu, inbe igun turunu le du damon toko tana, a be isung panga.

²⁶Bong ngan Pita itoko baene a ipamaditi, inbe iwete panga nen, “Kumadit le se kukodo. Au i tool dawa ben ong i.”