Aposol 10:18-47

¹⁸Inbe koodi a titor nen, “Ai, Simon yo tikiui ene san Pita i, in ya la iyepe in, too tiap?”

¹⁹Ngan Pita tani in nga lon kaua urata ye mianga ki go, inbe Maro Amunu Silene iwete panga nen, “Simon, di tooltool tol la timan man tiserong nga.

²⁰Le kumadit a kudu pang ye di, a nen ngan kuye di kala. Kin lom rru be, yesoo di tooltool ngo au tauk la awanga di be timan pang yong nga.”

²¹Motong la Pita tani in imadit a idu pang ye di tooltool tina du iwete pang di nen, “Ai, au tani yo kaserau in naii. Ngan yelei a le kaman nga?”

²²Le nga di tooltool tina ngan tiwete panga nen, “Am nga, Konilias yo tool turana bulbulini ke patokongo kidi Rom i, in la iwangam be amman pang yong i. Ya in tool noonoonoo, inbe itoo dada kidi Yuda yo be iyepe la Maro parmana ye i, le di tooltool kidi Yuda le imot tikamata ngan tiwete be ya in tool dook mata. Ngan bangabangana ke Maro atu, yo ipootoo panga ya taunu i, in iwete panga be iwangam man amkau ong a kula pang rumu ki, a be nen ngan la ilongo betanga kiong yo be kuwete nga.”

²³Motong la Pita ikap di ben di lowo ki a iye di tilo rumu ki lo tiken ye bong in. Tiken a bongbongini ki, motong la Pita imadit a iye di tooltool tina ngan be tila, ngan le di diene kapala ke Yopa yo titara lodi medana pang Yesu nga, ngan titoo lapau a tiye di tila.

²⁴Tila ngan le la tiken dada, le bongbongini ki, motong la tipa le la pombe ye malala mai Sisaria. Ngan Konilias tani in itar matana ye di be timulu nga, le nga ikiu di rara ki, inbe di tooltool yo ki nga, ngan man tigaua a tinama Pita.

²⁵Ngan yeisa be Pita man pombe a be ilo rumu lono, ngan Konilias tani in ipa le iman potai pang ye kene punu, inbe igun turunu le du damon toko tana, a be isung panga.

²⁶Bong ngan Pita itoko baene a ipamaditi, inbe iwete panga nen, “Kumadit le se kukodo. Au i tool dawa ben ong i.”

²⁷Motong la Konilias imadit a iye Pita tiwetewete a tilo pang rumu lono, ngan ikamata di tooltool budanga mai yo man tigaua a tiyepe nga.

²⁸Tilo, motong la Pita iwete pang di nen, “Ai, ang nga lomim galanga nen, ye momo kiam Yuda nga, ngan am nga ke be amye di tooltool yo tipa ye rara kidi Yuda tiap nga, ngan amgauagaua tiap. Inbe igunkalam le ke be ampa a amla rumu kidi la matamam so di a amye di amyepe tiap lapau. Bong ngan Maro iwete pau nen, be kin awete pang di tooltool be di ngan tooltool dook tiap inbe giri leu ye Maro matana, ngan be.

²⁹Ngan nanga, alongo yo kawanga pau nga, ngan la le asak betanga kiang tiap, bong atoo koomim a aman nga. Le nookoot nga be atorang nen, soo so kawanga pau ye i?”

³⁰Motong la Konilias tani in iwete panga nen, “Airi ngan so atu pombe pang yau, le nga katai in ke pai ki. Ye kene tani in rrai ye so ben ke matana tol, le nga ayepe rumu lono kiau a apatarau, inbe palbe leu be akamata tool atu yo sousoungu ki ikoko le pilik pilikbe i, in pombe le ikodo ke dama kiau,

³¹inbe iwete pau nen. Iyei ne, ‘Konilias! Maro ilongo pataraungu kiong, inbe ikamata so yo kop sokorai pang di tooltool yo ballingadi tiap nga, ngan le lono ponana ye dada kiong yo kuyeii i.

³²Le nookoot nga ole kuwanga di tooltool pattu a tila pang Yopa la tiwete pang Simon yo tikiui ene san Pita i. Ngan ya ni ngo iye Simon san yo tool ke kaungu di asara kulidi a karatanga so kapala ye i, in yaru tiyepe ye rumu ki yo ikodo potai pang ke tiek i.’

³³Ngan tool tani in iwete pau nen, ngan la le palbe leu inbe awanga di tooltool nga pong a timala nga. Le lok ponana pong yo kuyei dada dook mata a kuman nga. Ngan nanga, nookoot nga am le imot yo man amgaua ni ye Maro matana nga, ngan be man amlongo betanga le imot yo Tool Mai ikap pong be man kuwete pam nga.”

³⁴Motong la Pita iyiti koonoo be iwete ngan le iyei ne, “Moolmool yege, nookoot nga la lok galanga nen, Maro in lono dook mata pang di tooltool kapala, inbe lono dook tiap pang di kapala, ngan tiap.

³⁵Bong iyei dada dook mata gaongo leu pang di tooltool ke ni mai i le imot yo titoo dada dook mata yo be tiyepe parmana ye nga, inbe titoo dada dook mata ki yo noonoonoo nga.

³⁶Ang nga lomim galanga ye betanga yo Maro ikauu pam, am di tooltool ke Isrel, in oo. Ngan Maro iwete pam nen, be bingi dook mata ke Yesu Kirisi yo Tool Mai kiidi le imot i, in ya la irautoo kate malmal ke Maro yo paidi i, a be nen ngan idi le imot lo tayepe ye lo silene yo ke Maro i.

³⁷Inbe ang nga lomim galanga ye so yo pombe ye tana mai Isrel i le imot, in oo. Ngan so tani in pombe muku la Galili ngo, ye kene yo Yowan iwetewete pang di tooltool ye dada yo be irriu di ye in nga.

³⁸Inbe ang nga lomim galanga nen, Yesu yo ke Nasaret i, in Maro ikaua Amunu Silene le ipa ye gurana mai panga. Inbe ya in Maro iyepe ye, le nga ipa ye ni mai i le imot a ilon di tooltool, inbe ikarata di tooltool yo tool kuto mai kidi so sadi igarung di nga, ngan le tinidi dook mata mulu.

³⁹“Le am nga be amwetewete pang di tooltool ye so le imot yo amkamata iyei ye tana kiam Yuda, inbe ye malala mai Yerusalem nga. Ngan tool tani in la tituka lo kai palasingi kaini, inbe tiraumate le imata i

⁴⁰Bong iken ye ke ru, inbe ye ke tol ki nga, ngan Maro ipamaditi mulu ye ni ke matenge. Motong la Maro imalum panga be ya taunu ipaposi pang di tooltool kapala a tikamata ye matadi.

⁴¹Ngan le ipapos pang di tooltool ke Yuda le imot be tikamata, ngan tiap, bong ipapos pam, am tooltool yo Maro ipootam koot nga, ngan be amkamata, a nen ngan amkaua betanga ki la amweteweta pang di tooltool. Ngan am nga la amye amkan be amyin, ye kene yo imadit mulu ye ni ke matenge nga.

⁴²Motong la iwete tootoo pam be amkaua betanga ki la amweteweta pang di tooltool, inbe ampagalanga lodi nen, ‘Yesu in tool tani yo Maro ipootoo be ole iyei tool ke karatanga betanga i, inbe ya in ole ikarata betanga ke di tooltool yo tiyepe matadi rerene go nga, inbe di tooltool yo timmata koot nga, ngan lapau.’

⁴³Ngan di Maro koonoo le imot yo ke muku nga, ngan betanga kidi yo tiwodo ye ngan iwete nen, ‘Ye tool ataleu i, in ene, ngan ole Maro igiri noonoo kidi tooltool nga le imot yo titara lodi medana panga nga.’ ”

⁴⁴Pita iwetewete nen pang di tooltool tina ngan go, inbe Maro Amunu Silene isi le si ipapon di tooltool tina le imot yo tiyepe a tilongo betanga ke Maro nga.

⁴⁵Le nga di Yuda yo titara lodi medana pang Yesu a tiye Pita tani in timan nga, ngan tikamata di le titakrai ye yo Maro ikaua Amunu Silene ye lo ponana ki a ipatioo lo ye di tooltool yo tipa ye rara kidi Yuda tiap nga, ngan podi lapau nga.

⁴⁶Di Yuda tina ngan lodi galanga ben Maro la iyei di nen i, yesoo tilongo di tooltool rara san tina ngan tiwetewete ye di malala malala koodi, inbe tiyitmaka Maro ene. Motong la Pita iwete pang di nen,

⁴⁷“Ai, di tooltool nga tikaua Maro Amunu Silene dawa ben idi nga. Le sei tool be ikodokala di, a be nen ngan tarriu di ye ran tiap i?”