APOSETOLO EDIA KARA 4:7-28

⁷Bena raruosi na bogaragidiai e haginidia, e nanadaidia, eto, Edena siahu ai bona daika ladana ai ina ḡau o karaia?

⁸Una negana ai Petro na Lauma Helaḡa ese e rohea, bena ia ese e haere henidia, eto, Hanua lohiamui bona heitatao taumui e,

⁹harihari o nanadaimaimu ina ae-hedairike tauna ai ese a kara namo henia na ede e namo toma?

¹⁰Vada ba diba, Israel taudia iboudiai danu bae diba, Iesu Keriso, tau Nasaret, umui ese o hasatauroa a Dirava ese mase amo e hatorea isi tauna, ia ladana dainai ina tau na umui vairamui ai eme gini mai goadana ida.

¹¹Ia be Ruma ikarana taumui ese o dadaraia nadina na Daiguni nadina ai vada ela.

¹²Hahemauri be idau tauna ta lalonai dia mia; badina be ihamaurida ladana idauna ta guba henunai se henida, lasi vaitani.

¹³Idia ese Petro bona Ioane e itadia, asi edia gari; dibadia danu idia na hahediba gabuna ta asiela bona asi aonegadia taudia; bena e hoa, bona lalodia e parara idia na Iesu bamona.

¹⁴Bena idia raruosi bona e hamauria tauna tatoiosi gini-boudia ai e itadia, bena asi edia dala ma bae hereva henidia.

¹⁵Taunabunai e haduadia, eto una hebou amo bae raka oho. Bena e raka lasi muridiai sibodia e henanadai heheni, eto,

¹⁶Idia raruosi ede baita karadia tomamu a? Badina be unu Ierusalem ai nohodia taudia iboudiai bae diba idia raruosi ese hoa karana ta vada e karaia, bona ita ese basita ḡorea diba.

¹⁷A taunimanima ese bae piua badabada na garina, raruosi baita hagaridia, bona baita taravadia, una lada na tau ta ma basie herevalai henia lou.

¹⁸Bena e boiridia, e tamanudia, Iesu ladana ai basie haroro bona basie hahediba, lasi vaitani.

¹⁹A Petro Ioane ida e haere, eto, Mani ba laloa, umui baia kamonai henimui, Dirava basia kamonai henia, una na Dirava vairanai maoro eiava lasi?

²⁰Badina be a itava bona a kamonaiva ḡaudia na basia herevalai na dia heḡereḡere.

²¹Ma e hagaridia lou, bena e kahudia nege. Ihadikadia dalana ta asie davaria, badina be taunimanima iboudiai ese Dirava e heatolaia, hari hoa karana dainai.

²²Badina be una hoa karana ese e hamauria tauna ena vara laḡanidia na hari-ahui mai dikoana.

²³E kahudia nege murinai, raruosi na turadia dekedia ela, hahelaḡa taudia bona hanua tau-badadia edia hereva iboudiai e hamaorolaidia.

²⁴Idia na e kamonai, bena lalodia e hatamonaia, Dirava e guria, eto, Ḡaubada e, guba, tanobada, davara, bona lalodiai e miamu ḡaudia iboudiai, ikaradia na Oi.

²⁵Oi danu Lauma Helaḡa ena amo ai senemai David uduna ai o hereva, eto, Bese idau-idau dahaka baduna e badumu, Bona dahaka dainai taunimanima ese ḡau asi anidia e lalo hadailai?

²⁶Hanua pavapavadia e gini tore, Bona hanua lohiadia e hebou, Lohiabada ena Keriso ida ilao-ahudia.

²⁷Momokani, ina hanua lalonai idia na e hebou, emui hesiai tauna helaḡana Iesu, oi ese o horoa tauna, ihadikana totona. Pontio Pilato bona idau bese taudia bona Israel besena taudia e hebou,

²⁸oi imamu ese e torea guna, oiemu aonega ese e haeroa guna, karana e karaia.