APOSETOLO EDIA KARA 2:4-32

⁴Bena Lauma Helaḡa ese e hahonudia, bona idau gado idau gado ai e hereva, Lauma ese e henidia heḡereḡerena.

⁵Una negana ai Iuda taudia Ierusalem ai e nohova, Dirava garina e gariva taudia, tanobada tanodia loḡora amo ema.

⁶Una rege e kamonai ai, hutuma e hebou, bena laumadia e daure, badina be ta ta ena gado ena gado e kamonai.

⁷Iboudiai e daradara bona e hoa, eto, Ini e herevamu taudia na dia Galilea taudia a?

⁸O edeheto ita iboudai ta ta ena gado ena gado korikori ai edia hereva ta kamonaimu?

⁹Patia amo, Media amo, Elam amo, Mesopotamia amo, Iudea amo, Kapadokia amo, Ponto amo, Asia amo,

¹⁰Frugia amo, Pamfulia amo, Aigupto amo, bona Kurene amo (una na Afrika kahana ta). Haida be vadivadi taudia Roma amo; haida be Iuda taumai; haida be Iuda ai e halaodia taudia;

¹¹haida danu Krete taudia bona Arabia taudia. Tatau bini Dirava ena hoa ḡaudia e herevalai henidamu, eda gado korikori ai.

¹²Iboudiai e hoa, bona e daradara, e hereva heheni, eto, Ina na dahaka?

¹³A haida ese e kirikuilaidia, eto, Idia na vine ranuna matamatana e inua, e kekeromu.

¹⁴A Petro na gwauta-taosi ida e gini tore, erena e habadaia, e haroro henidia, eto, Iudea taumui bona Ierusalem ai o nohomu taumui e, ina na ba haeroa, bona egu hereva ba kamonai.

¹⁵Ini na dia kekekero, umui o laloamu heḡereḡerena, badina be ina na doini daba.

¹⁶A ina na Ioel, peroveta tauna, ese e gwauraia guna herevana; eto,

¹⁷Dirava eto, Tanobada dokona dinadia ai Lau laumagu baina seia dobi, taunimanima iboudiai latadiai; Bena natumui mamaruanedia bona hahinedia do bae peroveta, Bona emui eregabe bae mata hanai, Bona emui iahu bae nihi.

¹⁸Oibe, unu dinadia ai egu hesiai taudia bona hahinedia latadiai Laumagu do baina seia dobi, bena bae peroveta.

¹⁹Bena hoa ḡaudia na guba ai baina hahedinarai, Bona toa ḡaudia tanobada ai; Rara bona lahi bona kwalahu.

²⁰Dina do baine dibura, Hua na rara ai bainela, Lohiabada ena dina badana bona herea-daena baine kahira-kahira negana ai.

²¹A Lohiabada ladana bae hatoa taudia na bae mauri.

²²Israel taumui e, ina hereva ba kamonai: Iesu, tau Nasaret, Dirava ese dekemui e siaia vasi, bona siahu karadia bona hoa karadia bona toa na bogaragimui ai e hahedinarai, Dirava ese ia imana amo e karava; umui danu dibamui.

²³Ia hari, Dirava ena lalo-hadai bona ena diba ese e henimui tauna, umui ese murimuri taudia imadia amo vada o hasatauroa.

²⁴A Dirava ese e hatorea isi lou, mase ena iḡui e ruha; badina be mase na ia idogo-taona asi dibana.

²⁵David danu ia herevana e gwauraia; eto, Lohiabada na nega idoinai vairagu ai na itaia, Badina be ia na idibagu kahana ai, Basina marere helaoreana.

²⁶Taunabunai lalogu eme hisi dae, Malagu eme moale bada, Hidiogu na helaro ai baine taruha;

²⁷Badina be laumagu na mase taudia edia gabu ai basio rakatania, Bona emu Helaḡa Tauna na basine pata.

²⁸Mauri daladia vada o hadibagu; Oi vairamu itana ai egu moale baine ḡuḡuru.

²⁹Varavaragu e, seneda David herevana na hamaoromui momokanimu: ia na e mase, e guria, bona gara na doini mia ita dekeda ai.

³⁰To ia be peroveta tauna; dibana danu Dirava vada e gwau henia hamata, ia besena ta ese ena terono ai baine helai kau eto.

³¹Una dainai e diba guna herevana e gwauraia, Keriso ena tore-isi-lou herevana, ia na mase taudia edia gabu ai basine noho, bona tau-anina basine pata.

³²Hari Iesu na Dirava ese e hatorea isi; ai iboumai ai danu dibamai.