APOSETOLO EDIA KARA 2:14-43

¹⁴To Petero, aposetolo taudia 11 danu idia toreisi, iena gadona ia habadaia, ia haroro taunimanima momo dekenai, ia gwau, “Iudea taudia, bona Ierusalema dekenai umui noho taudia e, inai kara ena anina do lau hadibaia umui, lauegu hereva umui kamonai.

¹⁵Inai taudia be idia kekero lasi, umui laloa bamona, badina hari negana be 9 okaloka dabai.

¹⁶To inai be Ioela, peroveta tauna ia gwauraia guna ena hereva gauna, ia gwau:

¹⁷‘Dirava ia gwau: Inai nega do kahirakahira ia doko neganai, lauegu laumana dohore lau bubua diho, taunimanima ibounai dekenai. Vadaeni umui emui natudia tau bona hahine, be dohore idia peroveta karaia, bona emui uhau taudia ese, Dirava ena hunia gaudia do idia itaia. Ma danu emui buruka taudia do idia nihi.

¹⁸Inai danu, unai dinadia dekenai, lauegu hesiai taudia bona hesiai hahine dekenai, egu Laumana do lau bubua diho, bona dohore idia peroveta karaia.

¹⁹Ma lau ese hoa gaudia do lau hedinaraia guba dekenai, bona toa gaudia tanobada dekenai: Rara bona lahi bona kwalahu.

²⁰Dina be dohore ia dibura, bona hua be dohore ia kakakaka, rara bamona. Inai bamona toa idia vara neganai do umui diba, Lohiabada ena Dina Badana bona namo hereana be do ia kahirakahira vadaeni. Unai Dina be mai garina momokani.

²¹Bona Lohiabada ena ladana dekenai do idia boiboi taudia ibounai be mauri do idia davaria.’

²²“Israela taudia e, inai hereva dekenai umui kamonai: Iesu, Nasareta tauna, Dirava ese umui dekenai ia siaia hedinaraia, bona siahu kara bona hoa kara bona toa kara umui emui huanai Dirava ese ia karaia iena imana dekenai, umui danu diba.

²³Inai Iesu, be Dirava ese iena ura bona ena diba hegeregerena ia laloa guna, umui emui imana dekenai do ia atoa. Vadaeni umui ese taravatu laloa lasi taudia edia imana dekena amo Iesu umui hasatauroa, bona umui hamasea.

²⁴To Dirava ese ia hatorea isi lou, mase ena hisihisi dekena amo ia ruhaia, badina mase ese Iesu ia dogoatao diba lasi.

²⁵Badina Davida be inai bamona Iesu ia herevalaia, ia gwau: ‘Lohiabada be nega ibounai egu vairana dekenai lau itaia. Ia be lau kahirakahira ia noho dainai, gau ta ese lau ia hagaria lasi.

²⁶Unai dainai lauegu kudouna ia moale, bona mai moale danu lau hereva noho. Lau be taunimanima sibona, to Dirava ese ia gwauhamata gau namodia, be lau naria noho.

²⁷Badina be mase taudia edia gabu dekenai, lauegu lauma do oi rakatania lasi. Bona oiemu Helaga Tauna be bodaga do ia abia lasi, oiemu ura dainai.

²⁸Mauri dekenai ia lao dalana oi hadibaia vadaeni lau dekenai. Lauegu moale dohore oi habadaia, oiemu vairana dekenai lau noho dainai.’

²⁹“Lauegu varavara taudia e, iseda sene tauna Davida lau herevalaia umui dekenai be namo. Ia mase, idia guria, bona hari inai nega, iena guria gabuna ia noho ita dekenai.

³⁰To ia be peroveta tauna, bona ia diba danu, Dirava ese gwauhamata ia henia vadaeni ia dekenai, ia gwau, ‘Oiemu bese tauna ta dohore ia helai oiemu helai gabuna dekenai.’

³¹Bona Davida ese diba guna hereva ia gwauraia, Keriso dohore ia toreisi lou, ia gwau, ‘Dirava ese do ia rakatania lasi mase taudia edia gabu dekenai, bona iena tauanina ese bodaga do ia abia lasi.’

³²“Inai Iesu be Dirava ese ia hatorea isi vadaeni, ai ibounai be ai itaia, bona ai diba vadaeni.

³³Ia be Dirava ese ia abia daekau vadaeni, iena imana idibana kahana dekenai. Bona ia ese Tamana ia gwauhamata henia gauna, Lauma Helaga ia abia, bona ia bubua diho vadaeni. Harihari unai Lauma ena siahu umui itaia, bona umui kamonai danu.

³⁴Badina be Davida ia daekau lasi guba dekenai Iesu hegeregerena, to ia sibona ia gwau: ‘Lohiabada ese lauegu Lohiabada dekenai ia hamaoroa, ia gwau: Lauegu idiba kahana dekenai oi helai,

³⁵ela bona oi dekenai idia tuari taudia, be oiemu aena atoa gauna dohore lau halaoa.’

³⁶“Unai dainai, Israela bese taudia ibounai idia diba momokani be namo, inai Iesu, satauro dekenai umui hamasea tauna, be Dirava ese Lohiabada bona Keriso ia halaoa vadaeni.”

³⁷Inai hereva idia kamonai neganai idia gari momo, idia ese Petero bona aposetolo taudia dekenai idia nanadaia, idia gwau, “Aiemai varavara taudia e, dahaka do ai karaia?”

³⁸Petero ia hereva idia dekenai, ia gwau, “Umui ibounai ese emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona, bona Lauma Helaga do umui abia, Dirava ena harihari gauna.

³⁹Badina be gwauhamata ia noho umui dekenai, bona umui emui natudia dekenai, bona daudau idia noho taudia ibounai dekenai, io, Lohiabada iseda Dirava ia boiboi henia taudia ibounai dekenai.”

⁴⁰Hereva momo dekenai danu Petero ese idia ia sisiba henia, bona ia hereva goadagoada, ia gwau, “Inai nega noho gagevagageva taudia dekena amo umui heau mauri.”

⁴¹Iena hereva idia abia dae taudia be bapatiso idia abia, bona unai dina tamona lalonai, taunimanima 3000 bamona be edia orea lalonai idia vareai.

⁴²Nega ibounai idia haboua noho, aposetolo edia hadibaia herevadia idia kamonai totona, bona turana idia karaia, aniani idia ania hebou, bona idia guriguri danu.

⁴³Bona ibounai idia gari, badina hoa kara bona toa kara momo aposetolo taudia ese idia karaia.