APOSETOLO EDIA KARA 27:9-41

⁹Nega daudau vada e lao bubuni, bona una nega heauna be mai garina, badina be Anivaga negana vada e ore; taunabunai Paulo ese e sisiba henidia,

¹⁰eto, Tatau e, vada name diba eda laolao na do baine dika, ḡau momo bae boio, bona dia kohu mo a lagatoi danu; ita danu baita mase dahaka.

¹¹A tuari biaguna ese lagatoi itarina tauna bona lagatoi biaguna e kamonai henidia, Paulo ena hereva se abia dae.

¹²Una hetu gabuna na dia namo lahara negana ai; taunabunai hutuma na e tomava baia dobitania, Foenikia ai baia heau kau toho, unuseni ai baia noho lahara negana ai. Una Foenikia na Krete aona ta, mai matuna, ta be lasirai matuna, a ta be laurabada matuna.

¹³Lahu diho e toa, bena idia banava eto nega namona vada e davaria; taunabunai idia ese dogo e veria, bena Krete badibadina amo a heau.

¹⁴Asi vanahana guba bada-hereana miriguni kahana amo e kau,

¹⁵lagatoi e hohoa. Baia heau dae baia heau diho ato, to se heḡereḡere, bena a haḡoḡoa.

¹⁶Bena motumotu maraḡina ta, ladana Kauda, metaina ai a heau kau, unuseni ai dingi ihamaurina ai a hekwarahi.

¹⁷Idia ese dingi e veria dae; bena pae-tao kwanauna e abia, lagatoi gabenana ai kwanau e mataia, bena e veria tao. Lagatoi boe ai baine hure kau garina idia ese lara e veria dobi; bena a hagogoa.

¹⁸Hari guba sinaiana ese lagatoi e hahegure-hegurea dikadika dainai, daba e rere ai kohu nege e matamaia.

¹⁹Dina ihatoina ai, lagatoi ḡaudia danu ma e nege dobi.

²⁰Dina hoho, dina bona hisiu asie hedinaraiva, guba danu se dokova, e odamaiva; bena baiama mauri helarona e heabi oho vai tani.

²¹Idia na nega daudau asie anianiva, bena Paul ) na bogaragidiai e gini tore, eto, Tatau e, boma kamonai henigu, Krete basitama dobitania, bena ina hahedika bona kohu iha-oredia na emui ai basiema vara.

²²A harihari na hamaoromuimu, na tomu, ba goada balahelli; badina be umui ta ena mauri basine boio, lagatoi mo sibona baine boio.

²³Badina be lau na Dirava ena tau, ia isiaina na lao henimu; b-na boi hanuaboi iena aneru ta na badibadigu ai e gini,

²⁴eto “Paulo e, basio gari, Kaisara vairanai do ba gini; bona taunimanima iboudiai oi ida o laolaomu edia mauri na Dirava ese vada e henimumu”.

²⁵Taunabunai, tatau e, ba goada balaheni; badina be Dirava na abidadama heniamu, na tomamu ḡau idoidiai bae vara, vada e hamaorogu heḡereḡerena.

²⁶A motumotu ta ai do baita hure kau.

²⁷Boi gwauta-hani vaitani Adria gadobadana ai a hure eva-eva. Bena ihagwauta-hanina ai, malokihi ai, lagatoi memerodia eto tano ta vada e kahira-kahira.

²⁸Idia ese davara ena dobu e hahetohoa, roha ruahui e abia; asi vanahana ma e hahetohoa lou, roha gwauta-ima e abia.

²⁹Bena lagatoi na nadi ai baine tata kau garina ai, idia ese dogo auhani lagatoi gabenana amo e nege dobi; bena daba e naria mai kudou-hetahadia ida.

³⁰Lagatoi memerodia ese lagatoi bae pautania eto; bena dingi davara ai e tua dobi, e kara hedibaḡani, lagatoi idamana ai dogo haida inege-dobidia laona urana na heto.

³¹Bena Paulo ese tuari biaguna mai ena orea taudia ida e hamaorodia, eto, Idia na lagatoi ai basie noho, umui na basio mauri diba.

³²Bena tuari taudia ese dingi kwanaudia e rahu utu; bena dingi na davara ai vada e moru.

³³Daba e kinia, bena Paulo ese iboudiai e noidia, aniani taina bae ania. Ia eto, Dina ihagwauta-hanina binai umui na o vagamu, aniani taidia asio animu;

³⁴taunabunai, na noimuimu, aniani taidia mani avani, mauri helaoreana; badina be kwaramui huidia autamona basine boio, lasi vaitani.

³⁵Unu e gwau toma, bena aniani e abia, Dirava e hanamoa idia iboudiai vairadiai; bena e baki sisi, e ani.

³⁶Bena iboudiai lalodia vada e namo, e aniani danu.

³⁷Lagatoi ai a nohova taumai iboumai ai na sinahu-rua hitu-ahui tauratoi.

³⁸E aniani vaitani, bena lagatoi ihaharaḡana totona uit na davara ai vada e nege dobi.

³⁹Daba e rere ai, idia na tano toana asi dibadia; a tabero ta hari e itaia, mai konena, bena lalodia e hadai, eto bema mai dalana lagatoi na una kone ai bae hatataia kau lao eto.

⁴⁰Taunabunai, idia ese dogo kwanaudia e rahu utu, dogo na davara ai e rakatanidia; tari iḡuidia kwanaudia e ruha, bona idama larana na lai hoho-hohona ai e kidaia; bena lagatoi e taria diho.

⁴¹A aru e toibolo gabuna ta ai e heau kau, bena lagatoi na moemoe ai e hatataia kau. Lagatoi idamana e tataia kunukakunuka; a gabenana be hurehure ese vada e hamakohia matama.