APOSETOLO EDIA KARA 26:1-27

¹Bena Agripa ese Paulo e hamaoroa, eto, Mani sibomu a hereva. Bena Paulo ese imana ai e taodia ahu, e haere matama, eto,

²King Agripa e, na moalemu badina be Iuda taudia ese e habadelaigumu ḡaudia iboudiai na oi vairamu ai hari dina ai aina haerelai.

³Badina be Iuda taumai emai kara bona emai hepapahuahu iboudiai vada o diba bada, taunabenai na noimumu mani emu kara a haheauka, egu hereva ba kamonai.

⁴Egu kara, tauhaugu negana ema harihari, egu bese taudia bogaragidiai bona Ierusalem ai danu, Iuda taudia iboudiai vada dibadia.

⁵Matamana amo idia na dibadia lau, bona bema ura bema gwauraigu lau na Farisea taugu, toma-diho oreana bunai ena kara metaudia idoidiai na badinava.

⁶Harihari ina hahemaoro gabuna ai name gini, badina be Dirava ena gwauhamata na laroamu, senemai e henidia gwauhamatana.

⁷Iduhu gwautaruaosi ese una gwau-hamata ihamomokanina e laroamu dainai idia ese Dirava e toma henia diho boi toma henia diho ranimu mai goadadia ida. Ḡaubada e, una helaro dainai Iuda taudia ese e habadelaigumu.

⁸Badina be dahaka umui na o tomamu Dirava ese mase taudia e hatoredia isi herevana na basita abia dae diba?

⁹Lau danu lalogu na hadaia, nato Iesu tau Nasaret ladana ihadikana karadia momo bama kara bema namo.

¹⁰Unu na kara toma Ierusalem ai. Hahelaḡa taudia ese siahu e henigu, bena helaḡa taudia hutuma be dibura rumadia ai na koudia; bona e revadia mase negadia ai, lau danu nato bae mase.

¹¹Dubu iboudiai lalodiai danu lau ese na dadabadia loulou; na hahisidia, bae ere dika totona. Na badu henidia dikadika dainai, na ḡavadia ela bona hanua idaudia ai ma na daḡedaḡe henidia.

¹²Taunabunai, Ḡaubada e, una ḡaukara dainai Damasko dalana ai na raka lao. Siahu bona hahedua na hahelaḡa taudia ese vada e henigu.

¹³Bena dala ai, dina tubua negana ai, diari ta guba amo e tara dagu na itaia, dina hururu-hururuna e hereaia, lau mai bamogu ida e ḡeḡemai ahu.

¹⁴Ai iboumai ai tano ai a hekida diho; bena lau mo gado ta na kamonai, Heberu gadodiai e hereva henigu, eto “Saulo e, Saulo e, dahaka dainai o daḡedaḡe henigumu? Ikodo e lahamu bena o hisihisimu”.

¹⁵Lau nato “Lohiabada e, oi na daika?” Ia eto “Lau na Iesu, o daḡedaḡe henigumu.

¹⁶A tore isi, badina be emu ai vada name hedinarai badina binai: egu hesiai tauna ai baina halaomu, vada o ita ḡaudia bona do baina hahedinarai henimu ḡaudia danu ba gwaurai hedinarai.

¹⁷Heberu taudia bona idau bese taudia imadia amo baina hamaurimu. Idia dekedia baina siaimu lao,

¹⁸matadia bae papa; bena dibura bae rakatania, diari bae haḡerea. Bona Satana ena siahu bae rakatania, Dirava bae haḡerea; unu amo edia dika bae hegwau tao, bona ahudia do bae abi, lau iabiabiraigu ese vada e hahelaḡadia taudia bogaragidiai”.

¹⁹Taunabunai, King Agripa e, guba amo e hahedinarai henigu ḡauna na asina gwau edeede henia;

²⁰a Damasko taudia na haroro henidia guna, gabeamo Ierusalem taudia bona Iudea kahana taudia iboudiai bona bese idau-idau taudia danu na haroro henidia, bae helalo kerehai, bona Dirava bae haḡerea, bona helalo karadia danu bae kara.

²¹Badina binai Iuda taudia ese Dubu Helaḡa lalonai e dabaigu tao, bae alagu mase eto.

²²A hekaha be Dirava ena amo vada na davaria, una negana ema bona harihari; vada na gini tutuka-tutuka, kikina badana vada na haroro henidia. A idau ḡau asina gwauraia, peroveta taudia bona Mose ese e gwaurai guna ḡaudia mo na gwaurai.

²³Ḡaudia bini: Keriso na baine hisihisi guna, bena mase amo baine tore isi lou, bena diari ese Heberu taudia bona bese idauidau taudia baine hadiarilaidia.

²⁴Ia na unu e haere toma, bena Festo e lolo, eto, Paulo e, oi na o kavamu; emu aonega badana ese lalomu vada e hakavaia.

²⁵A Paulo na e haere, eto, Namo-herea taumu Festo e, lau na dia kava; momokani bona lalo-parara herevadia na gwauraimu.

²⁶Badina be Ḡaubada danu ini mai goadagu ida na gwaurai heniamu ḡaudia na dibana. Vada name diba ini ḡau ta ienai se hehunimu, badina be ina ḡau na dia daiguni ai asie karaia.

²⁷King Agripa e, peroveta taudia edia hereva o abi daemu a? Vada dibagu o abi daemu.