APOSETOLO EDIA KARA 24:6-22

⁶Ia ese Dubu Helaḡa e hadikaia toho, to ai ese a dabaia tao, baia hahemaoro henia emai taravatu heḡereḡerena ato.

⁷A Lusia, tuari biaguna badana, ema, imamai amo e abia oho mai daḡedaḡena ida;

⁸bona e habadelaia taudia e haganidia, oi dekemu baema. Mani oi ese ba nanadaia, bena hari kara idoidiai a habadelaiamu herevadia sibomu ba diba.

⁹Bena Iuda taudia ese ena hereva e durua, eto, Unu hereva iboudiai na momomo-kakani.

¹⁰Gavana ese Paulo e lodu henia; bena Paulo ese haere. Eto, Lau dibagu oi ese laḡani hoho ina bese vada o hahemaoro henia, una dainai sibogu herevagu aina gwaurai mai moalegu ida.

¹¹Badina boma tahua boma diba, dina gwauta-rua vada ela, lau na toma-diho tolona Ierusalem ai na lla dara dae.

¹²Dubu Helaḡa ai lau tau ta ida hepapahuahumai ai asie davarigu; bona dubu maraḡidia ai eiava hanua ariaradia ai heloḡo-heloḡo ta asina havaraia.

¹³Idia danu harihari e habadelaigumu herevadia na oi vairamu ai basie hamomokani diba.

¹⁴A ina na na gwauraia hedinaraimu: idia ese kererena e gwauraiamu dalana ai lau ese senemai edia Dirava na toma henia dihomu; ḡau tamona, ḡau iboudiai taravatu ai bona peroveta bukadia ai e tore na na abi daemu danu.

¹⁵Mai egu helaro danu Dirava enai, ini hahebade taudia heḡereḡeredia. Emai helaro binai: mase taudia do bae tore isi lou, kara maoromaoro taudia bona asi edia kara maoromaoro taudia danu.

¹⁶Ina danu na goadalaiamu, lalogu na basine kerere helaoreana. Dirava vairanai bona taunimanima vairadiai.

¹⁷Laḡani haida vada e lao bubuni; bena nala, harihari ḡaudia bona boubou ḡaudia egu hanua baina laohai nato.

¹⁸Unu na kara toma, bena na haheḡoeva negana ai na Dubu Helaḡa ai e davarigu; aru taudia na lasi, heloḡo-heloḡo danu lasi.

¹⁹A Iuda taudia haida Asia amo be unuseni ai; idia na egu kara dika ta bema diba, oi vairamu ai bema mai, bema habadelaigu, una na bema maoro.

²⁰Eiava ini vada ema taudia ese bema hamaorogu, egu kara dika be edena, kaunsil taudia vairadiai na gini negana ai e davaria.

²¹A ina hereva tamona idia bogaragidiai ginigu ai na gwauraia badabada, nato “Mase taudia edia tore-isi-lou herevana dainai hari dina ai o hahemaoro henigumu”.

²²Hari “dala” herevana vada e diba maoromaoro dainai, Feliki ese idia e gwaudia tubu, eto, Lusia, tuari biaguna badana, bainema negana ai na emui hereva baina tahua namonamo.