APOSETOLO EDIA KARA 21:10-23

¹⁰Dina haida unuseni ai noho neganai, peroveta tauna ta ena ladana Agabo, Iudea dekena amo ia mai.

¹¹Ai dekenai ia ginidae, ia ese Paulo ena gaba gauna ia abia, bona unai dekena amo sibona ena aena bona imana ia kwatua, ia gwau, “Lauma Helaga be inai bamona ia hereva, ‘Inai gaba gauna ena biaguna be Iuda taudia ese Ierusalema dekenai inai bamona do idia kwatua, bona idau bese taudia dekenai do idia henia.’”

¹²Inai hereva ai kamonai neganai, ai bona unai gabu taudia ese Paulo ai noia, Ierusalema do ia daekau lao lasi.

¹³To Paulo ia haere, ia gwau, “Dahaka dainai umui tai noho, bona egu lalona umui hamanokaia? Lau hegaegae vadaeni, Ierusalema dekenai lau do idia kwatua, to inai sibona lasi, to Lohiabada Iesu ena ladana dainai lau mase danu namo.”

¹⁴Iena laloa ai haidaua diba lasi dainai, aiemai noinoi ai hadokoa, ai gwau, “Lohiabada ese iena ura sibona ia karaia namo.”

¹⁵Dina haida idia ore neganai, emai laolao gaudia ai abia hegaegae, bona ai daekau lao Ierusalema dekenai.

¹⁶Diba tahua taudia haida Kaisarea dekena amo idia danu ai lao, ai idia hakaua lao Nasona ena ruma dekenai. Nasona be Kupro tauna, bona ia be Iesu badinaia tauna gunana ta. Iena ruma dekenai ai noho.

¹⁷Ierusalema dekenai ai ginidae neganai, Keristani taudia ese ai idia abia dae mai moale danu.

¹⁸Kerukeru, Paulo ese ai danu ia lao, Iamesi itaia totona. Ekalesia kwarana taudia ibounai idia hebou, Iamesi danu.

¹⁹Paulo ese idia ia hanamoa, bona Dirava ese idau bese taudia edia huanai ia karaia, Paulo ena gaukara dekena amo, unai sivarai ibounai ia gwauraia.

²⁰Kwarana taudia ese inai hereva idia kamonai neganai, ibounai ese Dirava idia hanamoa. Gabeai Paulo dekenai idia hereva, idia gwau, “Emai varavara tauna e, oi itaia Iuda taudia momo herea ese Iesu idia abidadama henia noho, bona idia ibounai ese Mose ena taravatu idia badinaia namonamo noho danu.

²¹Idia be idia kamonai vadaeni, oi ese Iuda taudia, idau bese taudia edia huanai idia noho taudia, oi hadibaia, oi gwau Mose ena taravatu idia rakatania, idia edia natudia kopina utua kara karaia lasi, bona sene edia kara danu idia karaia lasi.

²²Inai Iuda taudia ese idia kamonai vadaeni oi be Ierusalema dekenai oi mai vadaeni. Unai dainai dahaka do ita karaia?

²³Ai laloa inai oi dekenai ai hamaoroa gauna oi karaia be namo: Ai dekenai tau 4 idia noho, gwauhamata idia karaia vadaeni, Dirava dekenai.