APOSETOLO EDIA KARA 1:7-26

⁷Idia dekenai Iesu ia gwau, “Egu Tamana sibona ena siahu dekenai ia laloa dina bona nega, umui be diba lasi.

⁸To, umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”

⁹Unai bamona ia hereva, bona idia ese edia matana dekenai Iesu idia itaia noho neganai, guba dekenai ia daekau lao. Bona ori ta ia koua, vadaeni idia itaia lou lasi.

¹⁰Idia be matana dekenai guba idia itaia noho, Iesu ia daekau lao neganai, tau rua mai dabua kurokuro idia dekenai idia gini.

¹¹Bona idia gwau, “Galilea taudia e, badina dahaka umui gini bona guba dekenai umui itaia noho? Inai Iesu, hari umui ia rakatania, bona guba dekenai ia daekau lao, be dohore ia giroa mai, hari umui itaia ia daekau hegeregerena.”

¹²Inai murinai Ierusalema dekenai idia giroa lou, unai ororo ladana Olive dekena amo, inai Olive Ororo bona Ierusalema ena daudau be kilomita ta bamona.

¹³Ierusalema lalonai idia raka vareai neganai, ataiai daiutu dekenai idia daekau, idia edia noho gabuna be unai. Edia ladana be inai, Petero, Ioane, Iamesi, Andrea, Filipo, Toma, Batolomeo, Mataio, Iamesi Alepeo, Simona, ia be Roma taudia lulua totona orea tauna, bona Iuda Iamesi.

¹⁴Idia ibounai be, nega momo guriguri totona idia haboua, mai edia lalona tamona, hahine haida danu idia dekenai idia haboua, bona Maria, Iesu ena sinana, bona Iesu ena tadina taudia danu.

¹⁵Unai neganai Petero be diba tahua taudia edia vairana dekenai ia gini, inai haboua taudia be 120 bamona.

¹⁶Ia gwau, “Lauegu varavara taudia e, Buka Helaga ena revareva ia momokani vadaeni, Lauma Helaga ese Davida ena uduna dekenai ia gwauraia herevana, Iuda ena sivaraina. Inai tau, Iuda, ese Iesu dogoatao taudia ia hakaudia lao.

¹⁷Ia be aiemai orea tauna ta bona aiemai gaukara dekenai ia be durua tauna ta.

¹⁸“Iena kara dika davana moni ia abia dekenai tano ta ia hoia, gabeai ia be iena kwarana dekenai ia moru, ia mase, bona iena bogana ia pou, bona iena bogana anina ia bubua murimuri dekenai.

¹⁹Ierusalema dekenai idia noho taudia ibounai ese inai sivarai idia kamonai, bona unai tano ena ladana edia gado dekenai idia gwauraia be Akeledama, unai anina be ‘rara tano.’

²⁰“Badina be Salamo buka lalonai be inai bamona ia torea vadaeni: ‘Iena ruma be anina lasi be ia namo. Tau ta lalona dekenai do ia noho lasi.’ Ma Salamo ta lalonai inai bamona ia torea: ‘Iena dagi danu idau tauna ese do ia abia.’

²¹“Unai dainai Lohiabada Iesu ena toreisi lou ia gwauraia hedinarai diba tauna ta iseda orea lalonai ita abia vareai be namo. Ia be Iesu bona ita danu ia loaloa hebou tauna ta, Iesu ena bapatiso negana, ia mai bona Dirava ese guba dekenai ia abia daekau negana.

²²Unai bamona tauna, Iesu bona ita dekenai ia noho nega ibounai, ita abia hidi be namo. Ia ese ita danu Iesu ena toreisi lou do ita gwauraia hedinarai.”

²³Unai dainai tau rua idia abia hidi, Iosepa ena ladana idia gwauraia Barasaba, ena ladana ta danu be Iusto, bona tau ta ena ladana be Mataia.

²⁴Gabeai idia guriguri, idia gwau, “Lohiabada e, taunimanima ibounai edia lalona be oi diba, inai tau ruaosi, mani oi hedinaraia daika be oi ese oi abia hidi, inai aposetolo gaukara bona hesiai gaukara do ia abia,

²⁵badina be Iuda ese iena kara dika dainai inai gaukara ia rakatania, iena gabu korikori dekenai ia lao.”

²⁶Vadaeni nadi rua dekena amo abia hidi laki gadara idia karaia, bona Mataia ena nadi ia uini. Unai dainai aposetolo taudia 11 ese Mataia idia abia vareai aposetolo edia orea lalonai.