APOSETOLO EDIA KARA 1:2-17

²ema bona e heabi isi dinana ai e abidia hidi hahedibadia e haḡanidia.

³Hisi e ani murinai, ia na maurina ai ediai e hedinarai, mai toa momokanidia diaḡau ida; dina hari-ahui lalodiai idia ese e itaia loulouva, bona ia ese Dirava ena basileia e herevalai henidiava.

⁴Bena idia ida e noho bou ai e taravadia, eto, Ierusalem basio rakatania, a Tamada ese e gwauraia hamata ḡauna, udugu amo o kamonai ḡauna, do ba naria;

⁵badina be Ioane na ranu amo e bapatisova, a dina dia hoho bae lao bubuni, bena Lauma Helaḡa bapatisona bavabia.

⁶E hebou, bena idia ese e nanadaia, eto, Lohiabada e, basileia vada ina nega ai Israel ba henia lou eiava?

⁷Ia eto, Tamada sibona ena siahu ai vada e hagaudia dinadia bona negadia umui na basio diba;

⁸a Lauma Helaḡa ese baine rohemui, bena siahu bavabia, bona lau igwaurai-hedinaraigu taumui ai baola, Ierusalem ai bona Iudea idoinai bona Samaria kahana idoinai, ela bona tanobada heḡeḡe-madai.

⁹Unu e gwau toma, bena idia ese e raraia tao, ela bona vairadiai e heabi isi. Bena ori ta ese e ḡovaia ahu, vada asie itaia lou.

¹⁰Idia na guba ai e gaga dae, ena heabi-isi e raraia; bena tatau rarua mai dabua kurokurodia ida idia dekediai e gini.

¹¹Bena eto, Galilea taumui e, dahaka dainai o ginimu, guba ai o gaga daemu? Hari Iesu na emui amo vada eme heabi isi, guba e laomu, a do ma baine lou mai, ina harihari eme dae heḡereḡerena.

¹²Bena idia na Ierusalem e lou henia, Olive ororona amo: unu gabu ruaosi padadia na Dina Helaḡa laolaona sisivana.

¹³Hanua lalonai e raka vareai, atai daiutuna ta ai e dae kau, vaia edia hebou rumana bunai. Ladadia bini: Petro, Ioane; Iakobo; Andrea; Filipo: Toma; Balolomeo; Mataio; Iakobo Alfeo; Simona, Selote tauna; bona Iuda Iakobo.

¹⁴Idia iboudiai na ḡuriḡuri totona e hebou, mai lalodia tamona ida; hahine haida danu idia ida e hebou, bona Maria, Iesu sinana, bona Iesu tadina danu.

¹⁵Una negana ai Petro na hebou taudia vairadiai e gini tore, (taudia na sinahu-ta ruahui sisivana), eto,

¹⁶Varavaragu e, revareva vada eme momokani, Lauma Helaḡa ese David uduna amo e gwauraia herevana, Iuda sivaraina; ia hari Iesu idabaitaona taudia e hakaudia lao.

¹⁷Ia na emai orea tauna ta, bona emai ḡaukara ai danu ia na mai ahuna.