APOSETOLO EDIA KARA 19:1-11

¹Apolo na Korinto ai e nohova negana ai, Paulo gunika kahana amo e lasi, Efeso ai e kau; Iesu ibadinana taudia haida unuseni ai ma e davaridia.

²Bena ia ese e nanadaidia, eto, Iesu o abiabiraia negana ai Lauma Helaḡa danu o abia a? Idia e haere, eto, Lasi, Lauma Helaḡa herevana na do asia kamonai.

³Ma e nanadaidia lou, eto, Dahaka bapatisona o abia? Idia eto, Ioane ena bapatiso.

⁴Paulo eto, Ioane ese helalo-kerehai bapatisona mo taunimanima e henidia; bona e hamaorodia danu ia murina amo bainema tauna na bae abiabiraia, Iesu bunai.

⁵Una hereva e kamonai, bena Lohiabada Iesu ladana ai bapatiso ma e abia.

⁶Bena Paulo ese imana na idia latadiai e ato kau negana ai, Lauma Helaḡa na idia latadiai vada e diho. Bena idia na gado idau-idau ai e hereva, bona e peroveta danu.

⁷Taudia iboudiai gwauta-rarua sisivana.

⁸Paulo na dubu ai e dae kau loulouva, hua toi davana e haroro loulouva mai haheaukana ida, Dirava ena basileia herevadia e hahedibalaiva, taunimanima lalodia e aniva.

⁹A haida ese lalodia e ha-aukadia, e gwau edeede, bona dala matamatana e ḡonaḡonalaia hutuma vairadiai. Taunabunai Paulo ese e rakatanidia, Iesu ibadinana taudia danu e hakaudia oho; bena dina iboudiai Turano ena hahediba rumana ai e hahedibava.

¹⁰Laḡani rua unu e kara tomava; taunabunai Asia tanona ai e nohova taudia, Iuda taudia bona Helene taudia, iboudiai ese Lohiabada ena hereva e kamonaiva.

¹¹Siahu karadia hereadia danu Dirava ese Paulo imana amo e karava;