APOSETOLO EDIA KARA 18:4-14

⁴Sabati Dinadia ibounai Paulo be dubu lalonai ia haroro. Ia ura Iuda taudia bona Helene taudia edia lalona do ia kehoa.

⁵Sila bona Timoteo Makedonia dekena amo idia mai neganai, Paulo ese iena nega ibounai ia haroro goada noho. Iuda taudia dekenai ia hadibaia goada Iesu be Keriso.

⁶To idia ese iena hereva idia koua mai hereva dikadia danu neganai, Paulo ese iena dabua ena kahu ia negea oho, bona ia gwau, “Vadaeni, umui emui kerere be emui latanai ia noho, lau be kerere lasi. Harihari lau be idau bese taudia dekenai do lau lao.”

⁷Unai gabu ia rakatania, ia lao tau ta ladana Titio Iusto ena ruma dekenai ia noho. Unai tau be Dirava dekenai ia gari henia tauna. Iena ruma be ia gini dubu ena badinai.

⁸Krisipo, unai dubu ena gunalaia tauna ese Lohiabada ia abidadama henia, iena ruma bese taudia ibounai danu. Korinto taudia momo danu ese Paulo ena haroro idia kamonai, idia abia dae danu, bona bapatiso idia abia.

⁹Hanuaboi ta neganai, Lohiabada ese nihi dekenai Paulo dekenai ia hereva, ia gwau, “Oi gari lasi, oi hereva noho, oiemu hereva oi hadokoa lasi.

¹⁰Badina lau be oi dekenai lau noho, tau ta ese oi do ia hadikaia lasi, badina be lauegu taunimanima be momo inai hanua lalonai.”

¹¹Vadaeni, Paulo ese lagani ta bona hua 6 unuseni ia noho, Dirava ena hereva ia hadibaia noho.

¹²Galio be Akaia tano ena gavana dagi ia abia neganai, Iuda taudia ese Paulo dekenai idia dagedage mai lalona tamona danu. Idia dogoatao, kota dekenai idia hakaua lao.

¹³Idia gwau, “Inai tau ese taunimanima ia hadibaia noho, taravatu do idia utua dalana dekena amo Dirava do idia tomadiho henia.”

¹⁴Paulo ia ura hereva, to Galio ese Iuda taudia ia hamaoroa, ia gwau, “Umui Iuda taudia e, bema inai tau ese kara dika ta o kerere badana ta ia karaia neganai, umui dekenai lau kamonai be mai badina.