APOSETOLO EDIA KARA 16:3-15

³Paulo ia ura Timoteo ia danu idia lao, inai dainai ia abia, iena kopina ia utua. Inai bamona ia karaia, badina be Iuda taudia unai gabu dekenai idia noho be idia diba Timoteo ena tamana be Helene tauna.

⁴Hanua ibounai idia raka hanaia neganai, aposetolo bona kwarana taudia Ierusalema dekenai edia leta ena sisiba idia henia, Keristani taudia dekenai. Idia hamaoroa, do idia kamonai henia noho.

⁵Vadaeni, ekalesia taudia edia abidadama ena goada ia bada daekau, bona dina ibounai edia hutuma be ia bada daekau lao.

⁶Vadaeni Paulo mai ena bamona taudia danu Perigia bona Galatia tano idia raka hanaia, badina be Lauma Helaga ese edia dala ia koua, ia gwau, “Asia tano dekenai Sivarai Namona umui harorolaia lasi.”

⁷Idia be Musia ena hetoa dekenai idia ginidae, Bitunia idia lao totona, to Iesu ena Lauma ese edia dala ia koua.

⁸Inai dainai, Musia tano ena murina kahana dekenai idia raka hanaia, idia diho lao kone, Troa hanua dekenai.

⁹Hanuaboi lalonai Paulo ia mata hanai. Ena nihi lalonai Makedonia tauna ta ia itaia, iena vairana dekenai ia gini, bona Paulo dekenai ia noinoi, ia gwau, “Makedonia kahana dekenai oi mai, oi durua ai.”

¹⁰Mata hanai Paulo ese ia abia dainai, karaharaga Makedonia lao dalana ai tahua. Ai diba Dirava be ai dekenai ia boiboi, Sivarai Namona unuseni do ai haroro henia.

¹¹Vadaeni lagatoi dekenai Troa ai rakatania, bona ai heau maoromaoro Samotrake dekenai. Dabai ma ai heau. Neapoli hanua ai ginidae.

¹²Unai gabu ai rakatania, ai lao Filipi, unai be Makedonia ena hanua bada herea. Roma tuari orea ta unuseni ia noho.

¹³Sabati Dina dekenai hanua ena ikoukou murimuri kahanai ai raka, sinavai dekenai ai lao. Ai diba guriguri gabuna be unuseni. Ai helai diho, bona unuseni idia haboua hahine taudia dekenai ai hereva.

¹⁴Hahine ta ena ladana be Lidia, ia be Dirava ia gari henia hahine. Iena hanua be Tuatira, bona ena gaukara be dabua kakakaka ia hoia. Aiemai hereva ia kamonai, bona Lohiabada ese iena lalona ia kehoa, bona ia ese Paulo ia kamonai henia.

¹⁵Ia, mai ena ruma taudia danu bapatiso idia abia, gabeai ai dekenai ia noinoi, ia gwau, “Bema umui laloa lau be Lohiabada lau abidadama henia hahine, namo umui mai egu ruma, unuseni umui noho.” Ia ura bada ai noho ia dekenai.