APOSETOLO EDIA KARA 16:21-36

²¹Bona kara haida idia gwauraia, inai kara be mai taravatu ita dekenai. Ita be Roma taudia bona unai kara ita karaia diba lasi.”

²²Taunimanima momo danu idia hereva dika ruaosi dekenai. Kota biaguna taudia ese ruaosi edia dabua idia darea oho, bona hereva idia gwauraia, au dekenai idia dadabaia.

²³Idia ruaosi idia kwadia dikadika, gabeai dibura ruma lalonai idia negea, bona idia hereva goada dibura gima tauna dekenai, idia do ia naria namonamo.

²⁴Gima tauna ese unai hereva goada ia kamonai neganai, idia ruaosi dibura ruma ena lalona momokani daiutu dekenai idia ia negea vareai. Idia ruaosi edia aena ia kwatua auka, au metauna rua edia huanai.

²⁵To hanuaboi momokani neganai, Paulo bona Sila idia guriguri noho bona ane dekenai Dirava idia hanamoa, dibura taudia danu idia kamonai.

²⁶Bona karaharaga tano ia marere bada dainai dibura ruma ena du idia mareremarere, iduara ibounai sibona idia kehoa, bona dibura taudia ibounai edia kwatua auri sibona idia kokia.

²⁷Gima tauna ia noga, ia toreisi, ia itaia iduara ibounai idia kehoa. Ia laloa dibura taudia ibounai be idia heau vadaeni. Inai dainai iena kaia ia veria daekau, ia sibona do ia alaia gwauraia.

²⁸To Paulo ia boiboi goada, ia gwau, “Oi sibona oi hadikaia lasi, badina be ai ibounai iniseni ai noho.”

²⁹Dibura ruma gima tauna ia boiboi lamepa idia mailaia, bona ia heau vareai haragaharaga. Mai heudeheude danu Paulo bona Sila edia aena badinai ia moru diho.

³⁰Vadaeni, idia ia hakaua lao murimuri dekenai, bona ia gwau, “Lohia taudia e, dahaka lau karaia Dirava ese lau do ia hamauria totona?”

³¹Idia ruaosi idia gwau, “Lohiabada Iesu oi abidadama henia, bona hamauria do oi abia, oi bona oiemu ruma bese taudia danu.”

³²Bona ruaosi ese Lohiabada ena hereva, ia bona iena ruma noho bese taudia ibounai dekenai idia gwauraia.

³³Vadaeni unai hora lalonai, inai gima tauna ese idia ruaosi ia hakaua lao, idia edia bero ia huria. Bona ia, mai ena ruma bese taudia ibounai danu nega tamona bapatiso idia abia.

³⁴Bona ia ese iena ruma lalonai Paulo bona Sila ia hakaua vareai, bona idia dekenai aniani ia henia. Ia, mai ena ruma bese taudia danu idia moale bada, Dirava idia abidadama henia dainai.

³⁵Dabai, kota biagudia ese pulisi tau badadia idia siaia lao, idia gwau, “Inai taudia umui ruhaia idia lao.”

³⁶Dibura ruma gima tauna ese Paulo ia hamaoroa, ia gwau, “Kota biaguna taudia ese hereva idia siaia vadaeni, lau ese umui do lau ruhaia. Vadaeni, umui lao, mai maino danu.”