Text copied!
CopyCompare
Buka Helaga - APOSETOLO EDIA KARA - APOSETOLO EDIA KARA 16

APOSETOLO EDIA KARA 16:2-31

Help us?
Click on verse(s) to share them!
2Varavara ibounai Lusitera bona Ikonio dekenai, idia gwau Timoteo be tau namona.
3Paulo ia ura Timoteo ia danu idia lao, inai dainai ia abia, iena kopina ia utua. Inai bamona ia karaia, badina be Iuda taudia unai gabu dekenai idia noho be idia diba Timoteo ena tamana be Helene tauna.
4Hanua ibounai idia raka hanaia neganai, aposetolo bona kwarana taudia Ierusalema dekenai edia leta ena sisiba idia henia, Keristani taudia dekenai. Idia hamaoroa, do idia kamonai henia noho.
5Vadaeni, ekalesia taudia edia abidadama ena goada ia bada daekau, bona dina ibounai edia hutuma be ia bada daekau lao.
6Vadaeni Paulo mai ena bamona taudia danu Perigia bona Galatia tano idia raka hanaia, badina be Lauma Helaga ese edia dala ia koua, ia gwau, “Asia tano dekenai Sivarai Namona umui harorolaia lasi.”
7Idia be Musia ena hetoa dekenai idia ginidae, Bitunia idia lao totona, to Iesu ena Lauma ese edia dala ia koua.
8Inai dainai, Musia tano ena murina kahana dekenai idia raka hanaia, idia diho lao kone, Troa hanua dekenai.
9Hanuaboi lalonai Paulo ia mata hanai. Ena nihi lalonai Makedonia tauna ta ia itaia, iena vairana dekenai ia gini, bona Paulo dekenai ia noinoi, ia gwau, “Makedonia kahana dekenai oi mai, oi durua ai.”
10Mata hanai Paulo ese ia abia dainai, karaharaga Makedonia lao dalana ai tahua. Ai diba Dirava be ai dekenai ia boiboi, Sivarai Namona unuseni do ai haroro henia.
11Vadaeni lagatoi dekenai Troa ai rakatania, bona ai heau maoromaoro Samotrake dekenai. Dabai ma ai heau. Neapoli hanua ai ginidae.
12Unai gabu ai rakatania, ai lao Filipi, unai be Makedonia ena hanua bada herea. Roma tuari orea ta unuseni ia noho.
13Sabati Dina dekenai hanua ena ikoukou murimuri kahanai ai raka, sinavai dekenai ai lao. Ai diba guriguri gabuna be unuseni. Ai helai diho, bona unuseni idia haboua hahine taudia dekenai ai hereva.
14Hahine ta ena ladana be Lidia, ia be Dirava ia gari henia hahine. Iena hanua be Tuatira, bona ena gaukara be dabua kakakaka ia hoia. Aiemai hereva ia kamonai, bona Lohiabada ese iena lalona ia kehoa, bona ia ese Paulo ia kamonai henia.
15Ia, mai ena ruma taudia danu bapatiso idia abia, gabeai ai dekenai ia noinoi, ia gwau, “Bema umui laloa lau be Lohiabada lau abidadama henia hahine, namo umui mai egu ruma, unuseni umui noho.” Ia ura bada ai noho ia dekenai.
16Dina ta guriguri gabuna ai lao neganai, hesiai kekeni ta ia davaria ai. Unai kekeni be meamea lauma ese ia abia. Ia be vairai do idia vara gaudia ia gwauraia. Inai kekeni ena biaguna ese moni momo idia abia iena meamea kara dekena amo.
17Inai kekeni ese Paulo bona aiemai murinai ia raka, ia boiboi, ia gwau, “Inai taudia be Ataiai Momokani Dirava ena hesiai taudia. Umui hamauria totona dalana idia gwauraia noho umui dekenai.”
18Dina momo inai bamona ia karaia. Ela bona Paulo ena lalona ia hesiku, vadaeni ia giroa, bona inai lauma dekenai ia gwau, “Iesu Keriso ena ladana dekenai lau hamaoroa oi, inai kekeni oi rakatania.” Vadaeni, nega tamona lauma ese ia rakatania.
19To kekeni ena biaguna ese idia itaia, edia moni abia dala ia doko vadaeni. Inai dainai idia ese Paulo bona Sila idia dogoatao, bona hoihoi gabuna dekenai idia veria lao, hanua lohia taudia edia vairanai.
20Kota biaguna taudia edia vairanai ruaosi idia hakaua lao, idia gwau, “Inai ruaosi be Iuda taudia, bona iseda hanua idia hadikaia noho.
21Bona kara haida idia gwauraia, inai kara be mai taravatu ita dekenai. Ita be Roma taudia bona unai kara ita karaia diba lasi.”
22Taunimanima momo danu idia hereva dika ruaosi dekenai. Kota biaguna taudia ese ruaosi edia dabua idia darea oho, bona hereva idia gwauraia, au dekenai idia dadabaia.
23Idia ruaosi idia kwadia dikadika, gabeai dibura ruma lalonai idia negea, bona idia hereva goada dibura gima tauna dekenai, idia do ia naria namonamo.
24Gima tauna ese unai hereva goada ia kamonai neganai, idia ruaosi dibura ruma ena lalona momokani daiutu dekenai idia ia negea vareai. Idia ruaosi edia aena ia kwatua auka, au metauna rua edia huanai.
25To hanuaboi momokani neganai, Paulo bona Sila idia guriguri noho bona ane dekenai Dirava idia hanamoa, dibura taudia danu idia kamonai.
26Bona karaharaga tano ia marere bada dainai dibura ruma ena du idia mareremarere, iduara ibounai sibona idia kehoa, bona dibura taudia ibounai edia kwatua auri sibona idia kokia.
27Gima tauna ia noga, ia toreisi, ia itaia iduara ibounai idia kehoa. Ia laloa dibura taudia ibounai be idia heau vadaeni. Inai dainai iena kaia ia veria daekau, ia sibona do ia alaia gwauraia.
28To Paulo ia boiboi goada, ia gwau, “Oi sibona oi hadikaia lasi, badina be ai ibounai iniseni ai noho.”
29Dibura ruma gima tauna ia boiboi lamepa idia mailaia, bona ia heau vareai haragaharaga. Mai heudeheude danu Paulo bona Sila edia aena badinai ia moru diho.
30Vadaeni, idia ia hakaua lao murimuri dekenai, bona ia gwau, “Lohia taudia e, dahaka lau karaia Dirava ese lau do ia hamauria totona?”
31Idia ruaosi idia gwau, “Lohiabada Iesu oi abidadama henia, bona hamauria do oi abia, oi bona oiemu ruma bese taudia danu.”

Read APOSETOLO EDIA KARA 16APOSETOLO EDIA KARA 16
Compare APOSETOLO EDIA KARA 16:2-31APOSETOLO EDIA KARA 16:2-31