APOSETOLO EDIA KARA 16:16-28

¹⁶Dina ta guriguri gabuna ai lao neganai, hesiai kekeni ta ia davaria ai. Unai kekeni be meamea lauma ese ia abia. Ia be vairai do idia vara gaudia ia gwauraia. Inai kekeni ena biaguna ese moni momo idia abia iena meamea kara dekena amo.

¹⁷Inai kekeni ese Paulo bona aiemai murinai ia raka, ia boiboi, ia gwau, “Inai taudia be Ataiai Momokani Dirava ena hesiai taudia. Umui hamauria totona dalana idia gwauraia noho umui dekenai.”

¹⁸Dina momo inai bamona ia karaia. Ela bona Paulo ena lalona ia hesiku, vadaeni ia giroa, bona inai lauma dekenai ia gwau, “Iesu Keriso ena ladana dekenai lau hamaoroa oi, inai kekeni oi rakatania.” Vadaeni, nega tamona lauma ese ia rakatania.

¹⁹To kekeni ena biaguna ese idia itaia, edia moni abia dala ia doko vadaeni. Inai dainai idia ese Paulo bona Sila idia dogoatao, bona hoihoi gabuna dekenai idia veria lao, hanua lohia taudia edia vairanai.

²⁰Kota biaguna taudia edia vairanai ruaosi idia hakaua lao, idia gwau, “Inai ruaosi be Iuda taudia, bona iseda hanua idia hadikaia noho.

²¹Bona kara haida idia gwauraia, inai kara be mai taravatu ita dekenai. Ita be Roma taudia bona unai kara ita karaia diba lasi.”

²²Taunimanima momo danu idia hereva dika ruaosi dekenai. Kota biaguna taudia ese ruaosi edia dabua idia darea oho, bona hereva idia gwauraia, au dekenai idia dadabaia.

²³Idia ruaosi idia kwadia dikadika, gabeai dibura ruma lalonai idia negea, bona idia hereva goada dibura gima tauna dekenai, idia do ia naria namonamo.

²⁴Gima tauna ese unai hereva goada ia kamonai neganai, idia ruaosi dibura ruma ena lalona momokani daiutu dekenai idia ia negea vareai. Idia ruaosi edia aena ia kwatua auka, au metauna rua edia huanai.

²⁵To hanuaboi momokani neganai, Paulo bona Sila idia guriguri noho bona ane dekenai Dirava idia hanamoa, dibura taudia danu idia kamonai.

²⁶Bona karaharaga tano ia marere bada dainai dibura ruma ena du idia mareremarere, iduara ibounai sibona idia kehoa, bona dibura taudia ibounai edia kwatua auri sibona idia kokia.

²⁷Gima tauna ia noga, ia toreisi, ia itaia iduara ibounai idia kehoa. Ia laloa dibura taudia ibounai be idia heau vadaeni. Inai dainai iena kaia ia veria daekau, ia sibona do ia alaia gwauraia.

²⁸To Paulo ia boiboi goada, ia gwau, “Oi sibona oi hadikaia lasi, badina be ai ibounai iniseni ai noho.”