APOSETOLO EDIA KARA 14:9-22

⁹Inai tau ese Paulo ena hereva ia kamonai. Bona Paulo ese ia itaia noho, ma ia diba inai tau ena abidadama be hegeregere dainai, ia hanamoa diba.

¹⁰Vadaeni, Paulo ia hereva goada, ia gwau, “Oi toreisi, oi gini maoromaoro oiemu aena dekenai.” Vadaeni ia roho daekau, ia raka.

¹¹Taunimanima momo ese Paulo ena kara idia itaia, bona Lukaonia gado dekenai idia boiboi, idia gwau, “Dirava be taunimanima ena toana dekenai idia diho mai ita dekenai.”

¹²Bona Banaba ena ladana idia atoa Dio, bona Paulo ena ladana idia atoa Hereme, badina ia be hereva gwauraia tauna dainai.

¹³Dio ena dubu be hanua ena vairanai, bona unai dubu ena hahelagaia tauna ese hanua ena ikoukou dekenai ia lao, boromakau tau bona herahera ia mailaia, ia bona taunimanima danu ese boubou idia karaia aposetolo ruaosi dekenai totona.

¹⁴To aposetolo ruaosi, Paulo bona Banaba ese idia kamonai, bona edia dabua idia darea, taunimanima edia huanai idia heau lao, idia boiboi, idia gwau,

¹⁵“Tatau e, badina dahaka umui karaia inai bamona? Ai danu taunimanima, umui bona ai be hegeregere. Ai be Sivarai Namona umui dekenai ai mailaia, umui be dohore inai anina lasi gaudia umui rakatania, bona do umui giroa mauri Dirava dekenai totona. Ia ese guba bona tanobada bona davara bona idia lalonai noho gaudia ibounai ia karaia.

¹⁶Gunaguna neganai Dirava ese bese idauidau edia ura kara dalana ia koua lasi.

¹⁷To ia ese taunimanima dekena amo ia hunia lasi. Lasi, ia ese iena noho ia hamomokania noho, iena kara nomodia dekena amo, gaudia inai: Medu ia siaia diho guba dekena amo, bona aniani haboua nega namodia ia henia umui dekenai. Boga kunu ia henia umui dekenai, bona emui kudouna dekenai moale ia havaraia.”

¹⁸Inai bamona ruaosi idia hereva, hanua taudia idia koua gwauraia, to hanua taudia idia ura bada boubou idia karaia dainai, idia ruaosi ese unai dala idia koua mai hekwarahi bada danu.

¹⁹To Iuda taudia haida be Antioka bona Ikonio dekena amo idia mai, bona idia ese taunimanima momo edia lalona idia ania. Vadaeni taunimanima momo ese Paulo idia hodoa nadi dekenai, hanua ena murimuri dekenai idia veria, idia laloa ia mase vadaeni.

²⁰To Iesu idia abidadama henia taudia be Paulo dekenai idia gini hagegea, vadaeni ia toreisi, hanua dekenai ia vareai lou. Kerukeru dabai ia bona Banaba danu be Derebe hanua dekenai idia lao.

²¹Idia ruaosi be Derebe hanua dekenai Sivarai Namona idia harorolaia, bona hanua taudia momo be Iesu ena diba tahua taudia idia halaoa. Gabeai Lusitera bona Ikonio bona Antioka dekenai idia giroa lou.

²²Ruaosi ese Iesu ena diba tahua taudia edia kudouna idia hagoadaia. Idia hereva goada, idia gwau, “Abidadama umui dogoatao noho.” Bona idia gwau, “Hisihisi momo lalonai Dirava ena Basileia do ita raka vareai.”