APOSETOLO EDIA KARA 14:4-23

⁴Bena hanua taudia na e hahepararava; haida na Iuda audia ediai e taova, a haida be aposetolo ediai e taova.

⁵Bena idau bese taudia bona Iuda taudia haida edia hanua lohiadia ida e henega hebou, raruosi bae taodia tari, nadi amo bae hododia eto.

⁶To raruosi vada e diba, bena e heau, Lukaonia tanona ela, Lustera bona Derebe hanuadia ai bona una tano idoinai

⁷sivarai namo e harorolaia.

⁸Lustera ai ae-hedairike tauna ta e helaiva; ia na boga amo e vara isi asi raka dibana.

⁹Ia ese Paulo ena haroro e kamonai; bena Paulo ese e raraia tao, dibana danu ena abidadama ese baine hamauria diba, bena e hereva badabada, eto,

¹⁰A tore isi, a gini maoromaoro. Bena ia na e roho isi, e raka.

¹¹Aru taudia na Paulo ena kara e itaia, bena Lukaonia gadodiai e lolo, eto, Dirava be taunimanima heida-idadiai vada eme diho ita dekedai.

¹²Bena edia dirava ladadia e nemaidia: Banaba e nemaia Deo, bona Paulo e nemaia Hereme, badina be ia na hereva herea tauna.

¹³Deo ena dubu be hanua vairanai; bena ena hahelaḡa taudia hanua ikoukoudia ela, boromakau mamaruanedia bona herahera ḡaudia e laohai, aru taudia ida bae boubou eto.

¹⁴Aposetolo raruosi, Paulo bona Banaba, e kamonai, bena edia dabua e dare, e heau lasi ela, hutuma bogaragidiai e lolo, eto,

¹⁵Henamo e, dahaka dainai ini o kara tomamu? Ai danu taunimanima mo; daramai danu umui daraunui heḡereḡeredia. Ai na sivarai namo dekemui a mailai, umui ese mi ḡau asi anidia ba rakatani bona Mauri Diravana ba haḡerea helaoreana. Ia ese guba bona tanobada bona davara bona lalodiai e miamu ḡaudia idoidiai e kara.

¹⁶Uru gunadia edia nega ai bese idau-idau iboudiai e kahudia nege, sibodia edia ura daladia ai bae raka;

¹⁷ḡau tamona, sibona ihahedinaraina toadia mo se nege, a hahenamo karadia e karamu, medu guba amo bona madinamo negadia e henimuimu, bogamui e hakunudiamu, bona lalomui e hamoalediamu.

¹⁸Raruosi na unu e hereva toma, aru taudia bae rudia eto; to aru taudia ese boubou ḡaudia na raruosi vairadiai mokona e ato.

¹⁹A Iuda taudia haida na Antioka maraḡina bona Ikonio amo ema, aru taudia lalodia e ani; bena idia ese Paulo na nadi amo e hodoa, hanua amo e veria lasi, banava eto vada e mase.

²⁰A Iesu ibadinana taudia ese e ginia heḡeḡe, bena ia na e tore isi, hanua e lou henia. Daba ai, ia na Banaba ida Derebe ela.

²¹Raruosi ese Derebe ai sivarai namo e harorolaia, bona Iesu ibadinana taudia hutuma e abidia. Bena Lustera bona Ikonio bona Antioka maraḡina e lou heni,

²²Iesu ibadinana taudia lalodia e hagoadadia, e halodia, Iesu bae abiabiraia tarika-tarika; bona e hamaorodia, eto, Hisihisi momo lalodia amo Dirava ena basileia ai do baita raka vareai.

²³Bona una negana ai ekalesia oreadia iboudiai lalodiai heitatao taudia vada e abidia hidi, ḡuriḡuridia ai bona anivagadia ai e hahelaḡadia, e abiabiraia Lohiabadana ena.