Text copied!
CopyCompare
Buka Helaga - APOSETOLO EDIA KARA - APOSETOLO EDIA KARA 13

APOSETOLO EDIA KARA 13:4-45

Help us?
Click on verse(s) to share them!
4Lauma Helaga ese idia ruaosi ia siaia lao, vadaeni idia diho lao Seleukia kone dekenai. Unuseni dekena amo idia hanaia Kupro motumotu dekenai.
5Salami dekenai idia ginidae neganai, Dirava ena hereva be Iuda taudia edia dubu haida lalonai idia harorolaia. Ioane Mareko danu ese idia ruaosi ia durua.
6Idia ese Kupro motumotu ibounai idia hanaia, idia lao bona Papo hanua. Unuseni meamea tauna ta idia davaria, ia be Iuda edia peroveta koikoi tauna ta. Iena ladana be Bariesu.
7Ia be gavana tauna, Seregio Paulo ena turana ta. Inai gavana be lalona namo tauna. Ia ese Banaba bona Saulo ia boiria idia mai ia dekenai, ia ura Dirava ena hereva idia hadibaia.
8To unai meamea tauna, ena ladana be Eluma, Helene gado dekenai, be ia ura ruaosi edia dala ia koua. Ia ura be gavana ena abidadama dala ia koua.
9To Saulo, iena ladana ta danu be Paulo, be Lauma Helaga ese ia hahonua, bona ia ese Eluma ia itaia goada noho, ia gwau,
10“Oi be Diabolo ena natuna, kara maoromaoro ibounai oi ura koua. Oi be koikoi bona dika ibounai dekenai oi honu. Lohiabada ena maoro daladia hagagevaia kara edena negai do oi hadokoa, a?
11Hari oi kamonai, Lohiabada ese iena imana oi dekenai ia atoa noho harihari, bona oiemu matana do idia kepulu, dina ena diari do oi itaia lasi ia lao bona nega ta.” Vadaeni, nega tamona, ori bamona, bona dibura idia diho Eluma ena latanai, bona ia raka kahana kahana, durua taudia ia tahua, iena imana do idia dogoatao, bona do idia hakaua lao.
12Vadaeni, gavana ese inai idia vara gaudia ia itaia, bona Keriso ia abidadama henia. Badina be Lohiabada ena hadibaia hereva dekenai ia hoa bada herea.
13Paulo mai ena bamona taudia danu Papo idia rakatania, lagatoi dekenai idia lao Perega. Unai gabu be Pamupulia tano lalonai. Unuseni Ioane Mareko ese idia ia rakatania, ia giroa lou Ierusalema dekenai.
14To idia be Perega idia rakatania, bona idia raka lao gunika kahana dekenai, ela bona Antioka dekenai idia ginidae. Inai Antioka be Pisidia tano lalonai. Sabati Dina dekenai idia be dubu lalonai idia raka vareai, idia helai diho.
15Mose ena taravatu bona peroveta buka idia duahia murinai, dubu biagudia ese Paulo bona Banaba dekenai hereva idia siaia, idia gwau, “Aiemai varavara e, bema taunimanima hagoadaia hereva ia noho umui dekenai, umui hereva.”
16Paulo ia toreisi, bona iena imana ia abia isi, ia gwau: “Umui Israela taudia, bona Dirava dekenai umui gari taudia e, umui kamonai.
17Inai bese Israela ena Dirava ese iseda tamadia ia abia hidi, bona iseda bese taudia Aigupito lalonai idia noho neganai, idia dekenai bese badana ia havaraia. Gabeai iena imana ia abia isi mai siahu danu, bona unai tano dekena amo idia ia hakaua lao.
18Lagani 40 bamona taunimanima lasi tano dekenai Dirava ia hesiku lasi, ia ese idia ia naria.
19Kanana tano lalonai Dirava ese bese 7 ia hamakohia, bona edia tano Israela taudia dekenai ia henia, haria dala dekenai.
20Unai kara ibounai idia vara lagani 450 lalonai bamona. Israela taudia ese unai tano idia abia vadaeni murinai, Dirava ese gunalaia taudia idia dekenai ia henia, ela bona Samuela peroveta tauna ena nega.
21Gabeai idia noinoi, king ta do idia abia, bona Dirava ese Saulo Kisa, Beniamina ena iduhu tauna, idia dekenai ia henia, ia be edia king lagani 40 lalonai.
22Saulo ia kokia murinai, Dirava ese Davida ma ia haginia, ia be edia king ia lao. Taunimanima ibounai edia vairanai Dirava ese ia hereva, ia gwau, ‘Davida, Iese ena natuna lau davaria vadaeni, egu lalokau tauna, egu ura kara ibounai do ia karaia.’
23Davida ena tubuna dekena amo, Dirava ese Israela edia Hamauria Tauna Iesu ia havaraia, iena gwauhamata hegeregere.
24“Iesu ia do mai lasi neganai, Ioane ese lalona giroa ena bapatiso Israela taudia ibounai edia vairanai ia harorolaia.
25Ioane ena gaukara be kahirakahira ia ore neganai ia gwau, ‘Umui be dahaka umui laloa, lau be daika? Lau be Ia lasi, to egu murinai Tau ta do ia mai. Iena tamaka varona, be lau hegeregere lasi do lau ruhaia.’
26“Lauegu varavara e, Aberahamo ena bese natudia e, bona Dirava dekenai umui gari taudia ibounai e, ita dekenai inai hamauria hereva be ia siaia mai vadaeni!
27Badina be Ierusalema noho taudia bona edia lohia idia diba lasi Iesu be Hamauria Tauna. Momokani idia ese peroveta taudia edia hereva be Sabati Dinadia ibounai idia duahia, to anina idia diba lasi. Inai dainai idia ese Iesu ena mase idia gwauraia, bona inai dala dekenai peroveta taudia edia hereva idia hamomokania.
28Hamasea badina ta idia davaria lasi, to idia ese Pilato idia noia, do ia alaia mase.
29Ia dekenai torea gaudia ibounai idia hamomokania vadaeni neganai, satauro dekena amo idia abia diho, guria gabuna lalonai idia atoa.
30To Dirava ese mase dekena amo ia hamauria.
31Bona dina momo lalonai, ia danu Galilea dekena amo Ierusalema dekenai idia lao taudia ese inai Iesu idia itaia nega momo. Bona hari inai taudia ese inai Iesu idia gwauraia hedinarai noho Israela taudia dekenai.
32“Bona hari Dirava ese iseda sene taudia ia henia gwauhamata Sivarai Namona ai ese ai harorolaia umui dekenai.
33Inai gwauhamata be Dirava ese ia hamomokania vadaeni ita dekenai, idia edia tubudia. Edena bamona? Dirava ese Iesu ia hatorea isi vadaeni, Salamo iharuana lalonai ia torea bamona: ‘Oi be lauegu Natuna. Hari dina oiemu Tamana lau lao vadaeni.’
34Dirava ese mase dekena amo ia hamauria, bona iena tauanina do ia bodaga lau lasi, badina inai hereva Dirava ese ia gwauraia: ‘Davida dekenai lau henia hanamoa gaudia, helaga bona momokani, be dohore lau henia umui dekenai.’
35Bona Salamo lalonai ma ia hereva ia gwau: ‘Oiemu Helaga Tauna dohore oi negea kava lasi ia bodaga.’
36“Badina be Davida ese iena nega lalonai taunimanima edia huanai ia gaukara, Dirava ena ura hegeregere. Gabeai ia mase, bona iena sene taudia dekenai ia lao, bodaga ia davaria.
37To Dirava ese mase dekena amo ia hamauria Tauna be bodaga ia abia lasi.
38Inai dainai lauegu varavara taudia e, namona be umui diba, inai Iesu dainai, kara dika gwauatao ai haroro umui dekenai, bona Iesu dekenai abidadama taudia ibounai edia dika dekena amo Iesu ese idia ia ruhaia.
39Mose ena taravatu henunai emui kara dika idia kokia diba lasi, bona umui maoromaoro diba lasi. To Iesu idia abidadama henia taudia ibounai be ia ese edia dika ibounai ia kokia, bona idia be maoromaoro vadaeni.
40Unai dainai umui naria namonamo, namo lasi peroveta taudia idia gwauraia gaudia be umui dekenai idia vara, idia gwau:
41‘Ura lasi taudia e, umui itaia, umui hoa, bona umui mase. Badina be emui dina dekenai gaukara ta lau karaia. Inai gaukara be, dohore umui abia dae lasi, bema tau ta ese ia hadibaia umui.’ ”
42Paulo bona Banaba be dubu ena murimurina dekenai idia raka neganai, taunimanima idia noinoi, idia gwau, “Vaira Sabati Dina unai hereva ma dohore umui gwauraia lou.”
43Hebou ia ore neganai, Iuda taudia momo bona idau bese taudia, Iuda edia guriguri kara idia badinaia taudia, be Paulo bona Banaba edia murinai idia raka. Ruaosi ese idia dekenai idia hereva, dohore idia goada karaia, bona Dirava ena hariharibada lalonai do idia noho.
44Gabeai Sabati Dina dekenai hanua taudia momo herea Dirava ena hereva kamonai totona idia hebou.
45To Iuda taudia ese inai taunimanima momo idia itaia neganai, idia mama. Paulo ena hereva idia ura koua mai hereva dika danu.

Read APOSETOLO EDIA KARA 13APOSETOLO EDIA KARA 13
Compare APOSETOLO EDIA KARA 13:4-45APOSETOLO EDIA KARA 13:4-45