APOSETOLO EDIA KARA 13:29-45

²⁹Ia dekenai torea gaudia ibounai idia hamomokania vadaeni neganai, satauro dekena amo idia abia diho, guria gabuna lalonai idia atoa.

³⁰To Dirava ese mase dekena amo ia hamauria.

³¹Bona dina momo lalonai, ia danu Galilea dekena amo Ierusalema dekenai idia lao taudia ese inai Iesu idia itaia nega momo. Bona hari inai taudia ese inai Iesu idia gwauraia hedinarai noho Israela taudia dekenai.

³²“Bona hari Dirava ese iseda sene taudia ia henia gwauhamata Sivarai Namona ai ese ai harorolaia umui dekenai.

³³Inai gwauhamata be Dirava ese ia hamomokania vadaeni ita dekenai, idia edia tubudia. Edena bamona? Dirava ese Iesu ia hatorea isi vadaeni, Salamo iharuana lalonai ia torea bamona: ‘Oi be lauegu Natuna. Hari dina oiemu Tamana lau lao vadaeni.’

³⁴Dirava ese mase dekena amo ia hamauria, bona iena tauanina do ia bodaga lau lasi, badina inai hereva Dirava ese ia gwauraia: ‘Davida dekenai lau henia hanamoa gaudia, helaga bona momokani, be dohore lau henia umui dekenai.’

³⁵Bona Salamo lalonai ma ia hereva ia gwau: ‘Oiemu Helaga Tauna dohore oi negea kava lasi ia bodaga.’

³⁶“Badina be Davida ese iena nega lalonai taunimanima edia huanai ia gaukara, Dirava ena ura hegeregere. Gabeai ia mase, bona iena sene taudia dekenai ia lao, bodaga ia davaria.

³⁷To Dirava ese mase dekena amo ia hamauria Tauna be bodaga ia abia lasi.

³⁸Inai dainai lauegu varavara taudia e, namona be umui diba, inai Iesu dainai, kara dika gwauatao ai haroro umui dekenai, bona Iesu dekenai abidadama taudia ibounai edia dika dekena amo Iesu ese idia ia ruhaia.

³⁹Mose ena taravatu henunai emui kara dika idia kokia diba lasi, bona umui maoromaoro diba lasi. To Iesu idia abidadama henia taudia ibounai be ia ese edia dika ibounai ia kokia, bona idia be maoromaoro vadaeni.

⁴⁰Unai dainai umui naria namonamo, namo lasi peroveta taudia idia gwauraia gaudia be umui dekenai idia vara, idia gwau:

⁴¹‘Ura lasi taudia e, umui itaia, umui hoa, bona umui mase. Badina be emui dina dekenai gaukara ta lau karaia. Inai gaukara be, dohore umui abia dae lasi, bema tau ta ese ia hadibaia umui.’ ”

⁴²Paulo bona Banaba be dubu ena murimurina dekenai idia raka neganai, taunimanima idia noinoi, idia gwau, “Vaira Sabati Dina unai hereva ma dohore umui gwauraia lou.”

⁴³Hebou ia ore neganai, Iuda taudia momo bona idau bese taudia, Iuda edia guriguri kara idia badinaia taudia, be Paulo bona Banaba edia murinai idia raka. Ruaosi ese idia dekenai idia hereva, dohore idia goada karaia, bona Dirava ena hariharibada lalonai do idia noho.

⁴⁴Gabeai Sabati Dina dekenai hanua taudia momo herea Dirava ena hereva kamonai totona idia hebou.

⁴⁵To Iuda taudia ese inai taunimanima momo idia itaia neganai, idia mama. Paulo ena hereva idia ura koua mai hereva dika danu.