APOSETOLO EDIA KARA 13:2-41

²Idia ese Lohiabada e toma henia dihova bona e anivagava negana ai, Lauma Helaḡa ese e haduadia, eto, Banaba Saulo ida a hahelaḡadia lauegu, badina be ḡaukara ta ikarana vada na abidia hidi.

³Taunabunai, idia na e anivaga bona e ḡuriḡuri, bena imadia na raruosi latadiai e ato kau, bena e kahudia nege.

⁴Lauma Helaḡa ese unu e siaidia toma dainai raruosi ela bona kone amo e lasi, Seleukia ai, unua amo Kupro e heau lao.

⁵Salami ai eha heau kau, unuseni ai Dirava ena hereva Iuda taudia edia dubu lalodiai vada e harorolaia matama. Ioane danu idia raruosi e durudia.

⁶Idia ese una motumotu e rakaia hanai ela bona Pafo. Unuseni ai babalau bona peroveta koikoi tauna ta e davaria, Iuda tauna, ladana na Bariesu;

⁷ia na gavana launa, Seregio Paulo, dekenai e nohova. Una gavana be lalo-parara tauna: ia ese Banaba bona Saulo e boiridia, e ura henidia, Dirava ena hereva bae hamaorolaia.

⁸A hari babalau tauna, Eluma (ia ladana ihaheḡereḡerena bunai), ese raruosi e gwaudia tubu; ena ura be gavana ese edia hereva basine abi dae.

⁹A Saulo (ia ladana ta danu Paulo) na Lauma Helaḡa ese e rohea, bena ia ese Eluma e raraia tao, eto,

¹⁰Oi na koikoi bona dika idoinai ese e hahonumumu, diabolo natuna, kara maoromaoro iboudiai o inai henimumu; Lohiabada ena dala maoromaorodia ihagagevadia basio hadokoa a?

¹¹A kamonai: Lohiabada ese imana na oi latamu ai be atoamu ina harihari; bena matamu bae kepulu, dina basio itaia ela bona nega ta. Una negana ai ḡahu bona dibura ese e hakepulua; benal e loa eva-eva, taunimanima e noidia, ia imana ai bae abi, bae hakaua.

¹²E vara ḡauna na gavana ese e itaia, bena Lohiabada ena hahediba herevadia e abi dae bona e hoalai.

¹³Paulo mai bamona ida ese Pafo e heautania, Peregaai e diho: una na Pamfulia tanona ai. Unuseni ai Ioane ese e rakatanidia, Ierusalem e lou henia.

¹⁴A raruosi na Perega amo e vareai, gunika kahana ela bona Antioka ai e kau. Una Antioka na Pisidia tanona ai. Dina Helaḡa ai idia na dubu ai e raka vareai, e helai diho.

¹⁵Taravatu bona peroveta bukadia e duahi murinai, dubu biagudia ese gwaukau na raruosi dekedia e siaia lao, eto, Varavaramai e, bema mai emui hahealo herevadia taunimanima edia, mani a gwaurai.

¹⁶Bena Paulo na e tore isi, imana ai e taodia ahu, eto, Israel taumui bona Dirava garina o garimu taumui e, a kamonai.

¹⁷Ina bese Israel ena Dirava ese seneda e abidia hidi, bona eda bese taudia na Aigupto tanona ai e nohova negana ai vada e hahutumadia, bona ia imana ese e hakaudia lasi.

¹⁸Laḡani hari-ahui sisivana tano ḡaḡaena ai e haheauka henidia.

¹⁹Kanaan tanona besena hitu e habuadia tari; bena tano na Israel taudia e henidia, edia tano korikori ai e halaoa. Unuseni ai laḡani sinahu-hani imahui sisivana e nohova.

²⁰Unu ḡau muridiai hahemaoro taudia e henidiava, ema bona Samuel peroveta tauna negana.

²¹Gabeamo idia na e noinoi, pavapava ta bae abia eto; bena Dirava ese Saulo Kisa, Beniamina ena iduhu tauna, e henidia, laḡani hari-ahui ia ese e pavapavadia.

²²Saulo e abia oho murinai, Dirava ese David ma e haginia, edia pavapava ai e halaoa; e herevalaia hedinarai, eto, David Iese vada name davaria, egu lalokau tauna, egu ura karadia iboudiai do baine kara.

²³Ia garana amo Dirava ese Israel edia Hahemauri Tauna Iesu e havaraia, ena gwauhamata heḡereḡerena.

²⁴Ia na do sema negana ai Ioane ese helalo bapatisona Israel taudia iboudiai vairadiai vada e harorolaia.

²⁵A Ioane ena ḡaukara dokona ai eto “Umui na dahaka o tomamu, lau be daika? Lau na dia ia: tau ta murigu ai be maimu; lau na dia namo ena tamaka varona baina ruhaia”.

²⁶Varavaragu e, Abraham garana loḡora e, bona Dirava garina o garimu taumui e, ina hahemauri herevana na ita dekeda vada e siaia mai.

²⁷Badina be Ierusalem taudia bona lohiadia na asi dibadia ia; bona peroveta taudia edia hereva Dina Helaḡa iboudiai e duahi to lalodia asie parara; una dainai e revaia mase, bona unu amo peroveta taudia edia hereva e hamomokani.

²⁸Ena be ihamasena badina ta asie davaria, to idia ese Pilato e noia, baine alaia mase.

²⁹Ia herevana iboudiai, vada e tore guna herevadia, na idia ese e hamomokani; bena au dorina amo e abia dobi, gara lalonai e atoa.

³⁰A Dirava ese mase amo ma e hatorea isi.

³¹Ia ida Galilea amo Ierusalem ela taudia ese dina diaḡau lalodiai e itaia loulou; bena harihari idia ese taunimanima vairadiai e gwauraia hedinaraaimu.

³²Taunabunai, seneda e henidia gwauhamatana sivaraina namona binai ai ese a harorolai henimuimu:

³³gwauhamatana bunai Dirava ese Iesu ihatore-isina ai vada e hamomokania, natuda ediai. Salamo iharuana lalonai e torea na heto; eto, Oi na lau Natugu, Hari dina ai vada na abimu.

³⁴Mase amo vada e hatorea isi bona basine pata lou herevana na ini e gwauraia toma: David na henia gwauhamatadia helaḡadia bona momokanidia do baina henimui.

³⁵Bona salamo ta lalonai ma eto: Emu Helaḡa Tauna basio kahua nege, basine pata.

³⁶Badina be David ese ena uru ai Dirava isiaina e lao heniva, Dirava ena ura heḡereḡerena ai, bena vada e mase, senena loḡora ida vada eha hebou; tau-anina be e pata.

³⁷A Dirava ese e hatorea isi tauna na pata asi dibana.

³⁸Taunabunai, varavaragu e, ia bagunai dika igwau-taodia a harorolai henimuimu.

³⁹Ia bagunai danu kamonai taudia iboudiai edia dika loḡora amo eme heruha; ena be Mose ena taravatu ai basio heruha diba, to ia bagunai do ba heruha.

⁴⁰Taunabunai, nahuamui ba toho, peroveta taudia ese e gwaurai ḡaudia na umui emui ai bae momokani na garina; eto,

⁴¹Heihi-ihirai taumui e, a itaia, ba hoa, ba mase ore; Badina be kara ta emui mauri dinadia ai na karaia, Kara na, ena be ta ese bema hamaoromui, to basioma abia dae.