APOSETOLO EDIA KARA 13:1-20

¹Ekalesia oreana Antioka dekenai be mai peroveta bona hadibaia taudia haida. Edia ladana be inai: Banaba, Simeona Nigera, Lukio, Kurene tauna, Manaena (ia be king Heroda ena turana gunana ta), bona Saulo.

²Idia ese Lohiabada dekenai idia toma diho bona aniani idia taravatua neganai, Lauma Helaga ese idia ia hamaoroa, ia gwau, “Banaba bona Saulo ruaosi umui abia siri, badina be gaukara ta lau abia hidi, idia karaia totona.”

³Vadaeni, aniani idia taravatua, bona idia guriguri, bona edia imana idia ruaosi edia kwarana latanai idia atoa, bona ruaosi idia siaia lao.

⁴Lauma Helaga ese idia ruaosi ia siaia lao, vadaeni idia diho lao Seleukia kone dekenai. Unuseni dekena amo idia hanaia Kupro motumotu dekenai.

⁵Salami dekenai idia ginidae neganai, Dirava ena hereva be Iuda taudia edia dubu haida lalonai idia harorolaia. Ioane Mareko danu ese idia ruaosi ia durua.

⁶Idia ese Kupro motumotu ibounai idia hanaia, idia lao bona Papo hanua. Unuseni meamea tauna ta idia davaria, ia be Iuda edia peroveta koikoi tauna ta. Iena ladana be Bariesu.

⁷Ia be gavana tauna, Seregio Paulo ena turana ta. Inai gavana be lalona namo tauna. Ia ese Banaba bona Saulo ia boiria idia mai ia dekenai, ia ura Dirava ena hereva idia hadibaia.

⁸To unai meamea tauna, ena ladana be Eluma, Helene gado dekenai, be ia ura ruaosi edia dala ia koua. Ia ura be gavana ena abidadama dala ia koua.

⁹To Saulo, iena ladana ta danu be Paulo, be Lauma Helaga ese ia hahonua, bona ia ese Eluma ia itaia goada noho, ia gwau,

¹⁰“Oi be Diabolo ena natuna, kara maoromaoro ibounai oi ura koua. Oi be koikoi bona dika ibounai dekenai oi honu. Lohiabada ena maoro daladia hagagevaia kara edena negai do oi hadokoa, a?

¹¹Hari oi kamonai, Lohiabada ese iena imana oi dekenai ia atoa noho harihari, bona oiemu matana do idia kepulu, dina ena diari do oi itaia lasi ia lao bona nega ta.” Vadaeni, nega tamona, ori bamona, bona dibura idia diho Eluma ena latanai, bona ia raka kahana kahana, durua taudia ia tahua, iena imana do idia dogoatao, bona do idia hakaua lao.

¹²Vadaeni, gavana ese inai idia vara gaudia ia itaia, bona Keriso ia abidadama henia. Badina be Lohiabada ena hadibaia hereva dekenai ia hoa bada herea.

¹³Paulo mai ena bamona taudia danu Papo idia rakatania, lagatoi dekenai idia lao Perega. Unai gabu be Pamupulia tano lalonai. Unuseni Ioane Mareko ese idia ia rakatania, ia giroa lou Ierusalema dekenai.

¹⁴To idia be Perega idia rakatania, bona idia raka lao gunika kahana dekenai, ela bona Antioka dekenai idia ginidae. Inai Antioka be Pisidia tano lalonai. Sabati Dina dekenai idia be dubu lalonai idia raka vareai, idia helai diho.

¹⁵Mose ena taravatu bona peroveta buka idia duahia murinai, dubu biagudia ese Paulo bona Banaba dekenai hereva idia siaia, idia gwau, “Aiemai varavara e, bema taunimanima hagoadaia hereva ia noho umui dekenai, umui hereva.”

¹⁶Paulo ia toreisi, bona iena imana ia abia isi, ia gwau: “Umui Israela taudia, bona Dirava dekenai umui gari taudia e, umui kamonai.

¹⁷Inai bese Israela ena Dirava ese iseda tamadia ia abia hidi, bona iseda bese taudia Aigupito lalonai idia noho neganai, idia dekenai bese badana ia havaraia. Gabeai iena imana ia abia isi mai siahu danu, bona unai tano dekena amo idia ia hakaua lao.

¹⁸Lagani 40 bamona taunimanima lasi tano dekenai Dirava ia hesiku lasi, ia ese idia ia naria.

¹⁹Kanana tano lalonai Dirava ese bese 7 ia hamakohia, bona edia tano Israela taudia dekenai ia henia, haria dala dekenai.

²⁰Unai kara ibounai idia vara lagani 450 lalonai bamona. Israela taudia ese unai tano idia abia vadaeni murinai, Dirava ese gunalaia taudia idia dekenai ia henia, ela bona Samuela peroveta tauna ena nega.