APOSETOLO EDIA KARA 12:5-14

⁵Unai dainai, Petero be dibura ruma lalonai idia gimaia, to ekalesia taudia ese Dirava dekenai idia noinoi goadagoada Petero dainai.

⁶Heroda ia ura kerukeru be taunimanima edia kota vairanai Petero do ia hakaua lao, vadaeni unai hanuaboi Petero be tuari taudia rua edia huanai ia mahuta noho, auri gaudia rua dekenai ia kwatua. Gima taudia danu iduara ena vairanai dibura ruma idia gimaia noho.

⁷Bona nega tamona Lohiabada ena aneru ta Petero badinai ia gini, diari danu dibura ruma ia hadiaria. Aneru ese Petero ena kopina ia botaia, ia hanogaia, ia gwau, “Oi toreisi haraga.” Vadaeni auri kwatua gaudia be Petero ena imana dekena amo idia moru.

⁸Ma inai aneru ese ia hadibaia, ia gwau, “Oiemu rami oi kwatua, bona oiemu tamaka oi atoa.” Unai bamona ia karaia. Aneru ma ia hereva. “Oiemu kouti oi atoa, lauegu murinai oi raka.”

⁹Petero ia raka murimuri dekenai, aneru ena murinai ia raka, to ia diba lasi inai aneru ena kara be momokani o lasi, to ia laloa be ia nihi.

¹⁰Idia ruaosi ese gima taudia ginigunana bona iharuana idia raka hanaia, vadaeni iduara ta, auri gauna, dekenai idia ginidae. Unai iduara be hanua lao dalana ia kehoa. Inai iduara be sibona ia kehoa idia ruaosi edia vairana dekenai. Idia raka lao murimuri, bona dala ta dekenai idia raka lao. Vadaeni nega tamona aneru ese Petero ia rakatania.

¹¹Bona Petero ena lalona ia kehoa neganai, ia gwau, “Hari lau diba momokani, Lohiabada ese iena aneru ia siaia, Heroda ena imana dekena amo, bona Iuda taudia edia ura dika dekena amo lau ia hamauria vadaeni.”

¹²Inai gau ia laloa ore, vadaeni ia lao Maria ena ruma dekenai. Inai Maria be Ioane Mareko ena sinana. Unuseni taunimanima momo idia hebou, idia guriguri noho.

¹³Petero ia pidipidi iduara dekenai. Bona kekeni ta, ladana Roda, iduara kehoa totona ia mai.

¹⁴Petero ena gadona ia kamonai bona ia diba, to ia moale bada herea dainai iduara ia kehoa lasi, to ia heau vareai, taunimanima dekenai ia hereva, ia gwau, “Petero be iduara dekenai ia gini noho!”