APOSETOLO EDIA KARA 12:10-22

¹⁰Hegima taudia gini-gunana bona iharuana raruosi ese vada e rakadia hanai, bena auri ikoukouna amo e lasi, hanua ilasi-henina ikoukouna. Hari ikoukou na sibona idia vairadiai vada e hekeho hata, bona raruosi e raka lasi, ariara ta amo e raka hanai. Bena hari aneru ese e rakatania.

¹¹Bena Petro lalona e parara, eto, Harihari name diba momokani, Lohiabada ese ena aneru vada e siaia, Herod imana amo bona Iuda taudia e larova karadia iboudiai amo vada eme hamaurigu.

¹²Lalona e hadaia, bena Maria ena ruma ela: una Maria na Ioane Mareko sinana. Unuseni ai taunimanima hutuma e hebouva, e ḡuriḡuriva.

¹³Bena Petro na iduara ai vada e pidipidi. Bena kekeni ta, ladana Roda, na ikehona ela;

¹⁴a Petro gadona dibana, bena ena moale bada dainai iduara se kehoa, to e heau vareai, e hamaorodia, Petro na iduara murinai gini.

¹⁵Idia ese ia e gwau henia, eto, Oi na e kavamu a? A ia na e hereva goadagoada, eto, Lasi, na gwau momokanimu. Idia eto, Una na readia ia laulauna.

¹⁶A Petro na e pidipidi loulou, ela bona idia ese iduara e kehoa, e itaia, vada e hoa bou.

¹⁷Bena ia ese imana amo e taodia ahu, asi reḡerḡedia bae noho; bena Lohiabada ese dibura rumana amo e hakaua lasi sivaraina e hamaorolaidia. Bena ma eto, Iakobo bona varavarada na ba hamaorodia. Bena e rakatanidia, idau gabu ela.

¹⁸Daba e rere, heloḡo-heloḡo dia maraḡi tuari taudia bogaragidiai e vara, Petro na ede ela heloḡo-heloḡona.

¹⁹Herod ese e tahua, to se davaria. Bena hegima taudia e nanadaidia murinai e gwau isi, bae hakaudia lasi, bae aladia mase. Bena Iudea e rakatania, e diho, Kaisarea ela, unuseni ai eha noho.

²⁰Herod ese Turo mai Sidono taudia e badu henidia dikadika; una dainai idia iboudiai lalodia e hatamonaia, bena dekena ela. Idia ese Ḡaubada ena mahuta daiutuna ita-taona tauna, ladana Blasto, e hamarumarua guna; murinai herohemaino e gwauraia, badina be Ḡaubada ena tano amo edia tano taudia ese aniani e abiva.

²¹Bena e gwauraia hidi dinana ai, Herod ese pavapava dabuadia e doki, hahemaoro teronona ai e helai kau, e haroro henidia matama.

²²Bena hanua taudia e lolo, eto, Ena na dirava ta gadona, dia taunimanima gadona.